IL FERÂL. Friûl: no 150 agns da la Italie, ma “145 o 93”!

Tal 2011 il stât talian al celebrave in pompe magne i siei 150 agns di vite, une cagnere te storie gjenerâl. Pal Friûl si tratave di 5 agns di mancul, stant che la Italie e je rivade culì tal 1866. E a son propit chest an par nô 150 agns. O riproponìn il document che 5 agns indaûr o vevin publicât. No pensi che al vedi pierdût di valôr. Anzit, la Italie, cjapade di altris fastidis, no à masse premure di ricognossi i dirits des minorancis (art. 6 de Costituzion). Pluitost cu la abolizions des provinciis e cul rinfuarciment dal podê centrâl, o riscjìn di pierdi no dome i dirits e ogni autonomie, ma ancje la muse e, cuissà, di tornâ a fâ part “delle Tre Venezie”. Diu nus vuardi! (pre Roman Michelot)
Come cristians che a crodin te dignitât di ducj i oms tant che fîs dal unic Pari e, duncje, tal dirit di ducj i popui a guviernâsi sfrancjâts di prepotencis esternis, in fraternitât e strenzûts te prospetive di un destin unic, no podìn no gjoldi di cheste circostance che nus impegne, scomençant des resons di fede, a cirî l’acuardi e la passion pal ben di ducj i talians. Ma par nô cheste fieste no pues jessi complete e serene, par vie che chê che e veve di jessi la nestre “cjase comugnâl” no je, dut a vuê, vierte aes nestris sacrisantis spietis di int e di popul, come che la stesse Cjarte Costituzionâl dal Stât Talian e intindarès professâ. E che a varessin di fânus dî: achì mi sint a cjase, achì o stoi ben! Cundut l’articul 6 de nestre Costituzion, di fat, o stentìn un grum a sintîsi onorâts di chest gjenar di unitât statâl, par vie che la nestre configurazion culturâl e spirituâl, che e reste par nô une ereditât irinunziabile, e ven invezit saldo sbeleade e continuementri cjapade tant che un afront ae integritât dal Stât.
In particolâr:
• Emblematic al è il tratament che si fâs ae nestre lenghe – simbul di fonde de nestre identitât – che, cun tant di leç in proposit, i ven ancjemò inibît in maniere vergognose chel puest che i spiete te scuele e te vite publiche.
O onorìn la lenghe taliane, che nus permet di intindisi cun chei altris popui dal Stât, ma no volìn che la lenghe che par seculorums e à segnade la nestre storie e mueri par colpe di chê vignude dopo. O paìn lis tassis pe culture, ma no volìn che chestis a coventin dome pe monoculture statâl, che e cope lis diversitâts.
• O viodìn che la scuele e continue a mortificâ lis espressions plui emblematichis dal nestri stamp culturâl. Tant a dî che – fale il câs di cualchi insegnant iluminât – i nestris zovins no san nuie dal Friûl, che uficialmentri za dal 1077 al à tacât a scrivi une pagjine ilustre e civîl di esperience politiche autonomiste. E che, cul so Parlament de Patrie, si presentave inte Ete di mieç come cuasi un preludi des formis di democrazie partecipade, che in chê volte no jerin par nuie scontadis. Cuntune liende storiche che no à nuie ce invidiâ a altris regjons, che a vegnin però spampanadis tant che unichis e solis.
• La retoriche nazionaliste, massime chê riferide aes vueris, e impedìs ancjemò ae nestre int di cjalâ cun voli seren a chei popui dal Nord e di Jevade che, par gjeografie, politiche e culture a àn fate storie cun nô e che la nestre int e à simpri incuintrâts, par vie che il pan lu à vuadagnât simpri di chês bandis.
• Par clarece e onestât storiche no podìn no fâ presint che, di fat, il Friûl di soreli a mont al è stât anetût a la Italie tal 1866 e il Friûl di soreli jevât tal 1918. Duncje un toc 145 e chel altri 93 agns indaûr, no 150.
• Une considerazion a part le meretarès il fat de convivence problematiche inte regjon là che il Stât nus à sgnacâts e dulà che dut al conzure cuintri la aspirazion dal Friûl di sintîsi une unitât, clamade cul so non e atente ai siei dirits e problemis. Un fat che al spiete une urgjente rimeditazion logjistiche e struturâl ad hoc.
Dut chest al mortifiche la nestre cussience di comunitât segnade di une identitât storiche e culturâl e nol pues no gjenerâ, in cui che al à rispiet pes resons profondis de dignitât umane, un sens di disafezion ancje pes problematichis dal Stât dulà che si cjatìn a convivi.
Ribatint, alore, la nestre lealtât a di chest Stât che al ricuarde il so secul e mieç, o scugnìn però ancje dî che la nestre partecipazion aes celebrazions no je par nuie complete e scontade, parcè che e mancje di chel traspuart che e varès di vê une robe che le sintìn nestre, pal fat che nus onore. E stant che tai confins de Italie a son ancje altris popui che, come il nestri, no si sintin dal dut a cjase lôr, o ricuardìn ancje che, ai fins di une vite plui partecipade, serene e armoniche e par superâ tant dal malstâ che al esist tal nestri Stât, tocje ancje meti man a disberdeâ i problemis che o vin segnalât.
Lu disìn cun lealtât e, massime, cun perentorietât! ❚
pre Antoni Beline