IL FERÂL. I FURLANS E IL TEMPLI. (decime prime pontade)

O vin scomençât chest an dal “Ferâl”, la rubriche dedicade a pre Antoni Beline, riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
***
(decime prime pontade)
[…]  I FURLANS E IL TEMPLI
4.    LA RELIGJON DAI FURLANS
Une comunitât naturaliter christiana ma pôc catoliche
Dai miei agns di Cjargne, fondamentâi par tantis resons, o ricuardi cun afiet particolâr la int di Treli, che si diferenziavin di ducj i paîs e borcs dal comun di Paulâr. A jerin ducj unîts di ca e di là de uniche contrade che e traviersave il paîs d’insom fin dapît. Un nît di âfs operosis o, seont i paularins, un nît di liparis. Di fat ju clamavin “i ribei”. No jerin di glesie nancje par scomesse e a vevin simpri cavilât cui predis che il vescul ur mandave plui par tignîju sot che par passiju.
Par cont di sacraments e di messis al jere di sgrisulâsi e tantis feminis a jerin plui mastinis dai oms. Mi visi che o soi lât a cjatâ la Sule, une femine dute lavôr e cjase, che si disfave par fâ un plasê ma che no tu vevis di vêi indiment ni glesiis ni Signôrs. Il so om al jere muart jù pes Africhis e jê e jere restade vedue cun cuatri fruts tant piçui che “a stavin ducj sot di un zei, come i poleçs sot de glogje”. Cuant che le invidavi a vignî a messe, magari dome par fâle ingjaulâ, jê mi diseve: “Che a ledin lis sôs preferidis, che cun me al è stât vilan fin avonde”. Naturalmentri i scjampave cualchi croste di chês penzis e jo i domandavi: “Disêtmi mo, Sule. Dopo blestemât, no vêso un fregul di rimuars di cussience? Cemût si sintîso?”. “Tant ben che mai, siôr. Come cuant che si cjol il vueli di riç”.
Cul timp a àn tacât a vignî un biel troput di feminis e ancje la canae. I oms a stavin di fûr, sentâts sul muret. Chei che a vignivin dentri regolarmentri a jerin une infime minorance, di contâle sui dêts, e te opinion publiche no jerin nancje i miôr. Cun dut a chel o pues testemoneâ di no vê cjatade tante solidarietât e tante colegance in nissun altri paîs. Si devin une man tal fâ sù la cjase o tal comedâ il stali; a vore pai prâts a levin simpri in procession come lis furmiis e, magari blestemant, a àn tignût i viei a cjase, a murî intal lôr jet. Li o pues dî di vê cjatade propit un’anime luterane, che no sopuartave peandis e brenis glesiastichis e confessionâls di nissun gjenar. Par me, o scuen dî che o ài cjatade int splendide, ancje se il belanç cultuâl nol è stât esaltant.
Chi o sin rivâts un pôc al cûr de cuistion: la religjositât dai Furlans, che no ame masse une mediazion glesiastiche ma che e preferìs un contat personâl cun Diu. Se o ves di dâ dôs cualifichis a cheste religjon o religjositât, le clamarès serie e sobrie o misurade.
Une religjon serie e remissive
La serietât di une religjon e sta tal concet alt che si à de divinitât. Poben, i Furlans a àn simpri viodût e crodût intun Suprem parsore di nô, che al à tes sôs mans il nestri destin e al dispon dut a so plasiment e volê. Lu palese il nestri mût di dî: “Al sarà ce che Diu vorà”. “Ce che al è destinât nol mancje”. “Dut a glorie di Diu”. Chest sens alt (=trassendent) di Diu nus puarte a cjapâlu in maniere serie e a no tentâ compromès o fufignis. Denant di une disgracie o di un mâl, di altris bandis si scomence a clamâ ducj i sants, a impiâ cjandelis, a bati santuaris e a fâ avôts a rafiche cirint di fâi cambiâ idee o almancul di fâi sierâ un voli. Un bon Furlan chest no lu fâs. Al acete ce che Diu al à destinât, savint o pensant che al vedi reson o une sô reson par fâ chel tant. Lu vin provât in tantis disgraciis e la ultime e je stade chê dal taramot, che no vin contestât Diu par un flagjel che al podeve segnânus par simpri. O vin domandât dome di dânus une man, se al crodeve, par tornâ a jevâ in pîts.
Cheste religjon, che jo le clami serie, e à il pericul di fânus plombâ tune sorte di fatalisim, di rassegnazion, di passivitât che e pò tramudâsi in pegritât o alibi par restâ cul cûl par tiere. Une religjon dal gjenar e je une providence par cuant che ti va mâl, ma no ti judarà trop a stâ ben. Soredut e je periculose par un popul che al è za puartât, par tantis liendis storichis e resons economichis e psicologjichis, a vê pocje stime di sè, a acetâ dut, a crodi di vê dome dovês e mai dirits. Une scuele serie, al diseve don Milani, e à di insegnâ la supierbie ai umii e la umiltât ai supierbeôs.
Cuant che o feveli di sobrietât, o intint la maniere misurade, discrete, personâl, no sunsurose e no tabaiote di vivi la religjon. A diference di altris culturis, che a fasin lis garis tal esternâ la lôr religjon al limit dal folclôr e dal ridicul, nô Furlans o sin une vore gjelôs de nestre fede e int fevelìn ancje masse pôc. E lis manifestazions esteriôrs, come devozions, processions, superstizions, adunadis, se a passin une certe misure, a son cjaladis plui cun suspiet che cun afiet e stime. Al contrari dal Venit, che no si è mai masse devots e preots, un Furlan masse catolic al sune di esagjerât, di stonât, di fals. Al palese pocje serietât e pôc caratar. Paradossalmentri o preferìs un che nol va mai in glesie a un che al va masse e, fra doi mâi, o preferìs une mignestre lamie a une masse salade.
Une religjon sobrie e misurade
Cheste sobrietât e à un riflès te discrezion dal cult dai sants. O preìn dome chei che a puedin judânus cun cualchi gracie concrete, peade a la nestre vite di ogni dì. Chei sants che la tradizion e à metût sorestants di cualchi malan dai cristians e dai nemâi. Parcè che cuant che si è puars e no si à nissun di avodâsi, si pree un sant che nus dedi la gracie che nus covente par tirâ indenant. Une cjadele o une palanche par une gracie piçule. La nestre devozion a la Madone e je fate plui di solidarietât e di compassion pe sô vite martare, tant someant a la nestre, che di speculazion par vê cuissà ce plasês.
Cun cheste fonde psicologjiche e cuntune vision dal mont cussì concrete e prosaiche, al è clâr che lis organizazions, lis associazions, i moviments carismatics, lis azions catolichis no fasin lidrîs, almancul te int plui serie. E se a cjapin pît a fuarce di bati e di tontonâ, a colin a pene che al cambie aiar o che si cerce un salustri di libertât.
Sfueant lis rivistis diocesanis dal episcopât di Nogara (1928-1955) e ancje un toc di chel di Zaffonato (1956-1972), si cjate une insistence ossessive, sfuarçade, spropositade, stonade, patologjiche su l’Azion Catoliche. A vevin di tesserâsi ducj, dai canais di scune ai viei cul pît te buse, e, par dâ l’idee che la robe e cjapave simpri plui snait, si veve di cressi ogni an il numar des tessaris. Cussì l’esercit dai catolics impegnâts si infoltive simpri di plui, lis sachetis dai plevans che a scugnivin paiâ plui di cualchi tessare par fâ biele figure cul vescul a jerin simpri plui sclagnis e il dut si riduseve a numars, a organigramis, a une bufule che la prime svintade di libertât e di modernitât le à fate spreçâ. Dulà ise “la falange di Cristo Redentore”? Dulà sono “gli arditi della fede” e “gli araldi dell’amore”? Dulà sono i fans di Maria Goretti e di Domenico Savio? Dopo di jessi esplodude come il fonc de bombe atomiche, cu la stesse velocitât e je lade in fum, jemplant di desolazion e di muart canonichis, ricreatoris, glesiis, sezions di partît e vie. Une fin precipitose e innaturâl par une robe precipitose e innaturâl tal nassi.
Al sarès interessant rifleti sul rapuart fra i Furlans e il predi, che al è l’esponent plui visibil e plui concret dal templi. Un rapuart di malinfidence e di distac, di sotanance e di ironie, remissîf e ostîl. La int e rive a fâ ancje une distinzion fra il so plevan, se al è bon, e la categorie dal predessam e a salvâ la persone ancje se il judizi su la categorie al è negatîf. Intal predi, soredut intal so plevan, la int e cjale plui la umanitât che la sacralitât e une sane umanitât e je simpri preferibil a une grande sacralitât. Il judizi de int sul predi al è specularmentri contrari a di chel de istituzion glesiastiche. Pa la cuâl chel che la curie e considere un trist predi parcè che al è pôc sacrâl e masse uman al è benvolût de int e chel che la curie e considere un predi model al è a pene sopuartât de int e pôc benvolût. O ài viodût, e o podarès fâ nons e cognons, la int a vaî come scoreade la muart di un predi che al veve esagjerât tal bevi e al jere stât un pôc libertin, e no pues dismenteâ la glacere che e à compagnât al cimitieri un predi che ju veve tormentâts cun predicjis, e funzions e corezions su la castitât, su la mode, su la politiche, sul gjaul e sô mari. Istintivamentri la int si tache al predi mancul presonîr dal templi e si slontane di chel che al vîf esclusivamentri in funzion de sô sacralitât.
Cjalant in maniere gjenerâl e forsit aprossimative la categorie dal predis, che in Cjargne a jerin clamâts “corvacs”, la int e viôt il predi simpri de bande dal podê, de autoritât, dal ordin, dai grancj e dai siôrs e duncje si à di dâi il so e lassâlu lâ pai siei viaçs. E se un predi al ven fûr, come la pluritât, de biade int, il salt al è plui rissolût e impressionant. Dut chest ti puarte a no metiti mai cuintri ma a no vê mai masse confidence. Nancje te confession, viodude e vivude plui come une crôs che une liberazion. Venti sù a vevin une sorte di litanie che e diseve: “Regjina martyrum et confessorum mai”. Tant a dî che no si à mai di contâ dut, nancje al predi. Mi à fat pensâ a Pasche di chest an une femine di Vileuarbe, une des pocjis vignudis a confessâsi. “Nol è che o sinti la dibisugne, ma o soi vignude plui par vizi…”. Dut chest al fâs capî che il templi al è sopuartât come un mâl necessari, ma al reste une struture lontane, stranie, plui glotude che volude. ❚
[…]
(al va indevant sul prossim numar)
pre Antoni Beline