Aial sens fevelâ di identitât, di difese di minorancis intun mont globalizât, intun mont che par contâ vuê si à di jessi grancj e in grant, se no no si esist, no si conte, no si à udience? Chestis lis domandis che pre Antoni si faseve intun intervent dal 2002 e che o publichìn a pontadis.
pre Roman Michelot
Identitâts al plurâl, ancje parcè che jo, la mê persone, inte vite o cambii, tant a dî nol è che o pensi simpri compagn, se no o soi stupit. No ai di jessi contraditori, ma o ai di cambiâ. Duncje, ce che o jeri a vincj agns cumò no soi plui, ma no ai tradît par chel, parcè che o ai une altre stagjon. Al è cambiât il timp ator di me e o cambi ancje jo cul timp. No sin fers, jo o ziri intun mont che al zire, mi modifichi intun mont che si modifiche. Al è dut un ingranaç, un incrosament, dut al zire e nô o vin di cjatâ il nestri zîr, la nestre armonie. La identitât e je personâl e coletive. O fevelìn de persone, ma ancje di popul. Al è par analogjie, però, parcè che cuant che o feveli di popul al è un alc che al è come la persone, ma al è un alc di plui e ancje di mancul parcè che la persone e à une identitât sigure e precise, determinade: il popul e la apartignince a di un popul e pues jessi plui o mancul sintude, plui o mancul vivude. Al pues jessi che un al parten cussì par une memorie, par une interioritât, par une simpatie, parcè che al cognòs la lenghe, parcè che i plâs… Al è un che al vîf cun intensitât chest jessi furlan.
In chest, jo o disarès, o sin identitât. O ai di cjatâ il gno pont di riferiment in chest sestant; il gno pont o ai di cjatâlu tai confronts de storie e tai confronts de gjeografie. E je une identitât verticâl inte storie dai oms, inte storie dai popui: ce puest aio jo, ce puest aial il gno popul in chest moment? Parcè che nô furlans o vin dentri cualchi celule, cualchi cromosome. Po, cualchi bastardut al sarà vignût fûr, come che al diseve Biagi: pensâ ae raze pure nissun lu fâs. Ancje a Vençon cuant che a àn fate la grande vuere a jerin cinc, sîs fruts ator che a balinavin pal paîs. E je une robe normâl dî che nô o sin Celtis. Nô o sin Celtis, Todescs, Furlans, Roseans, Slâfs, bastarts… o vin di dut. Duncje, o vin plui identitâts.
E dopo si messede e si mangje: o sin un pastrocj di popui, un microcosmi, un messedot.
(2, al va indevant)
pre Antoni Beline