IL FERÂL. La Europe dai lôfs

In chest mês si è lâts a votâ ancje pal parlament european. O presentìn une riflession di pre Antoni, naturalmentri datade, di 25 agns indaûr. Tal fratimp a son sucedûts tancj gambiaments, se no altri al è colât il mûr di Berlin, e disfats i doi grancj blocs che a tignivin la Europe e il mont spacât. La globalizazion e à invadût par ogni bande, dai marcjâts a la economie, de informazion a lis comunicazions.
Cuant che, in chei agns, si cjacarave di multietnicitât in Friûl, uniche e tipiche dal nestri teritori, par vie culì di secui si son incrosadis la culture latine cun chê todescje e slave tune pacjifiche convivence di int, a nissun sorestant di glesie o di pulitiche o di economie i à interessât gran. Anzit a àn fat di dut par tignînus dividûts, par dineâ la esistence di cheste biele realtât e fâle sparî in non di une unitât che e veve il savôr dome di une sclagne e puare uniformitât.
Cumò che e rive int di ogni bande e di ogni colôr, cumò sì che o vignìn considerâts une societât multietniche.
Duncje al ven di pensâ che sì lis robis a son gambiadis, ma la prepotence e la arogance dal podê e continue. Alore l’articul di pre Antoni nol à pierdût di atualitât.
pre Roman Michelotti
Se la int no si scjalde il lat pe Europe, no si pues in veretât dâi tuart. Parcè che chest stamp di Europe, cetant piês di chês istituzions sorenazionâls che la storie nus ricuarde, e à almancul doi pecjâts di fonde.
Le àn dade dongje propit chei stâts nazionaliscj che a àn fruçât par prins une politiche e une filosufie europeane. Le àn disfate cui lôr egoisims e no son siguramentri i plui indicâts a «scrivi» la Europe gnove, difarent. In plui si ripet, a nivel slargjât, dute la division ideologjiche – partitiche che si cjatile a nivel dai singui stâts. Ce che al è saltât fûr, ducj a puedin viodilu: un grant baracon che al glot un stragjo di bêçs, cence une linfe comuniâl, cence spirt di colaborazion, cence interès che a vadin plui in là dal presit dai cudumars o dal tai dal vin. Une Europe là che si va a fâsi la forcje e a imbroiâsi un cul altri e là che al vinç il plui prepotent. Propit la Europe dai lôfs.
No stêt a vignî a dînus che chei che a tibiin culturis e nazionalitâts cjase lôr, cuntune arogance e cuntune tristerie di ingomut, a deventin agnei co si cjatin insieme. E alore, se la Europe no je miôr e difarent dal egoisim dai stâts, ce fâ di doi organisims? Par reonzi prepotence cun prepotence? Cuant mai i laris sono deventâts cussients metintsi in fraie?
In soreplui, la Europe si sint umiliade di chei doi grancj blocs, Russie e Americhe, che in fuarce di chel malandret di tratât di Yalte si àn sintût in dirit di spartî ce che al jere simpri stât unît, par plaçâ in cheste lôr braide canons, fusetis, porcariis di ogni fate. Une Europe sotane no sarà par mai un fat positîf. Pa la cuâl si pues capî benissim cui che nol à tante sen di lâ a votâ.
Se si va, al è parcè che si spere di podê gambiâ. E cun ce che o vin dit modant, no ‘nd è cui sa ce pussibilitât di cernite. Si à di votâ dome chei oms e soredut chei partît che si basin par sdrumâ la prepotence dai stâts in pro de libertât e de dignitât des nazionalitâts.
Se il vôt al à la sô impuartance, plui impuartant ancjemò al è però vê e fâsi une culture europeane. Tant a dî vierzisi idealmentri, culturalmentri, spiritualmentri a di cheste Europe des culturis, des minoritâts, de diviersitât plui largje. Cognossisi e fâsi cognossi, imparâ altris lenghis, studiâ la storie dal pinsîr, de art di chestis «nazions improibidis», sdrumâ prime par dentri e plui che al è pussibil par di fûr chês spaltadis che a àn parât a tocs une realtât nassude e cressude unide e che e à te nestre tradizion cristiane un cjantonâl.
Nol varès di sei dificil, par nô furlans, capî la bielece, il valôr, la furtune di une Europe dal gjenar, nô che o sin nassûts e cressûts tal cûr da la Europe e che o vin fat la Europe a sun di vitis e di sanc. Nô che o sin il popul de crosere. Nô che o vin rivât a fâ il grant meracul de convivence di trê grandis gjernaziis che no dome no si son sintudis mortificadis ma che a àn inmaneade une civiltât come chê furlane. La nestre storie e je un spieli sflandorôs che tal rispiet si cres, si vîf miôr, si fâs culture e ducj a vuadagnin. Cuant che invezit si fasin injustiziis, si tibiin culturis e civiltâts in non dal plui fuart, ce che al sucêt al sucêt. Come che o stin viodint in cheste «Europe Unide» là che la union e la serietât a son sparidis dopomai. Une Europe che no ven nissune voie di dâi la laut.
pre Antoni Beline