A dîs agns de muart di pre Antoni, o volìn ricuardâlu proponint vie par dut il 2017 tocs dal «De Senectute»: une riflession su l’ultime stagjon de vite. Al è un libri restât incomplet. Come ducj i siei scrits si lu lei intun flât e cuant che si rive insom al displâs che il discors si fermi a colp.
La traduzion de Bibie, oltri che un fat straordenari di culture e di fede pal popul furlan e je stade par pre Antoni ancje une lûs che lu à compagnât te sô vite tormentade fisicamentri e moralmentri. Al à percepît che la man dal Signôr no lu molave. Culì al fâs propit l’esempli di Tubie, che al cjate dentri di se une lûs che lu compagne tal itinerari de sô vite, che i da fuarce e serenitât di scombati, rivant a realizâ i siei siums e il progjet di Diu.
(pre Roman Michelot)
Un dai libris plui cjârs, che mi à sustignût e consolât tai moments plui delicâts de mê vite, al è il libri di Tubie. Un librut che al è dut un concentrât di fede, di sperance, di caritât, di sapience, di spiritualitât, di pedagogjie, di mistiche. Un librut che al pò deventâ il spieli de vite di ognidun di nô in cualunche part dal mont si cjati.
**Tubie al jere stât depuartât a Ninive e duncje al viveve in diaspore, in dispersion, fûr dal so habitat, dislidrisât e sgnacât tun contest ostîl e negatîf, come che al pò jessi par tancj di nô, o forsit par ducj, il contest che si cjatìn a vivi e a operâ in cheste dispersion o disgregazion o diaspore gjeneralizade. Tal sens che ognidun di nô al sta pierdint, e al pierdarà simpri di plui, un contat vitâl e sostanziâl cuntune tiere e une lenghe e une culture ben definide, par cjatâsi a navigâ in mârs scognossûts e insidiôs, là che la segnaletiche e je scjarse o inesistent e il riscjo di lâ sot o di lâ fûr di strade al è evident e inminent.
**Tubie al à di movisi in chest contest, cence chel supuart psicologjic e antropologjic e culturâl che a vevin podût gjoldi i siei vons. E pûr al cjate no tal ambient o te tiere o te int ma dentri di sé, te tiere de sô anime, chel humus che i permet di lâ in puart cuntune navigazion riscjose, ancje se par vie di tiere impen che par vie di mâr. Tubie al à clare dentri di sè la leç di Diu, che i fâs di segnâl, di spieli, di guide, di orientament, di traietorie. Une lûs interiôr che lu compagne cun sigurece e serenitât.
**E ancje cuant che al piert il ben de lûs dai vôi, al semee che Diu lu confuarti e lu rifondi cuntune lûs interiôr inmò plui vive e sigure. Ma dongje de viste interiôr, de meditazion e dal confront seguitîf cu la leç dai vons, Tubie al cjate su la strade lungje e periculose che so fi al varà di percori par lâ in Medie un compagn di viaç, un amì atent e fedêl, che no dome al compagne il zovenut pas par pas ma al semee fat a pueste par prevignî i pericui che a podaressin mètint a riscjo il viaç e la vite e par trasformâ ogni event negatîf, ogni disgracie, tun fat positîf, tune provedence. Il câs dal pes e dal so fiât e de gnot des gnocis di Tubiute cun Sare a son une testemoneance splendide, consolant, incontestabil di cheste presince benefiche, di chest jutori providenziâl che Diu al dà ai siei fameis timorâts.
**La man dal Signôr, o dal agnul mandât dal Signôr, che ju compagne, ju vuarde, ju salve, ju fâs tornâ dongje sans e salfs e plui furtunâts di prime, e je une des garanziis che lui nus impromet e nus sigure dal moment che nus met sun cheste tiere a fâ il nestri pelegrinagjo. Lu cjati scrit in chel cuadrut cussì delicât e incorât là che il zovenut, prime di partî, al salude il pari e la mari. Denant des lagrimis de femine, Ane, che si dîs spaventade: “O speri dome che i bêçs no deventin la robe plui impuartante e che no valin a confront dal nestri frut” (Tb 5, 19), Tubie i rispuint: “No sta stâ in pinsîr e no sta vê pôre par lôr, sûr. Un agnul di chei bogns lu compagnarà, al fasarà bon viaç e al tornarà in buine salût” (v 22). ❚
Pre Antoni Beline
