A dîs agns de muart di pre Antoni, o volìn ricuardâlu proponint vie par dut il 2017 tocs dal «De Senectute»: une riflession su l’ultime stagjon de vite. Al è un libri restât incomplet. Come ducj i siei scrits si lu lei intun flât e cuant che si rive insom al displâs che il discors si fermi a colp.
I superiôrs dal seminari i plui brâfs di scuele ju mandavin a Rome a studiâ! A pre Antoni no i mancjave ni inteligjence, ni passion pai studis, ni capacitâts didatichis. Un siumut lu veve fat di sigûr. Ma la sô pecje e jere la dissipline, la ubidience clopadice, la francjece tal dî ce che al pensave. E chest, in chê struture, nol zuiave a so favôr.
(pre Roman Michelot)
A jessi onest, un fregul di pice di fâ cariere le vevi. Mi varès plasût, par esempli, lâ a studiâ a Rome o indotorâmi in cualchi facoltât civîl. O deventavi mat pes bielis letaris, classichis e modernis, e pes lenghis, che mi varessin permetût di lâ a scandaiâ tes minieris di documents des abaziis de Slovenie e de Carintie, par capî di plui la grande ereditât di Aquilee e la sô impuartance tal inmaneâ cheste cussience sorenazionâl e cheste tolerance veramentri uniche. Stant che mi plâs l’insegnament, mi viodevi sentât suntune catedre a lei insieme cui zovins ce che Diu al à scrit e semenât tai nestris popui, tal cors dai secui, tal cûr de int. Mi sarès sintût come in glesie e o crôt che o sarès stât un mestri sevêr come serietât di studis ma liberâl tal impostâ lis cuistions e tal lâ indenant e ancje tai rapuarts cui students.
✽✽ Une scuele che ti insegne a fâti domandis, plui che a imparâ rispuestis scontadis. Une scuele che e bat stradis gnovis, ineditis, curiosis e golosis, impen di ripeti a pampagal vie lezions e resons vieris, che no tignivin plui il pont e che no stimolavin plui nissun. Cheste strade mi è stade sierade prime di viergile, parcè che no devi nissun afidament di ubidience e la scjarse condote e à dât il prin colp di pale par sapulî uficialmentri il tesaur di une discrete inteligjence che il Signôr si jere indegnât di dâmi.
✽✽ A proposit di inteligjence e di cjâf, une femine si è uso lagnade cun mê mari parcè che nô, te nestre puaretât, o fasevin ben a scuele e chei altris, a partî dai plui siôrs, a piconavin par imparâ a scrivi. Mê mari i à rispundût che no vint nuie ce lassânus in cjamps o cjasis o robis, e veve cirût di dânus almancul un bon cjâf, par podêsi rangjâ inte vite. Don Milani i varès rispuindût che Diu nol è tant carogne di fâ i siôrs ancje inteligjents e i puars ancje stupits. Come che o ài dit, a sierâmi la puarte de cariere no je stade dome la mê scjarse simpatie pe ubidience e la mê lengate che no podeve tasê, ma la salût, che mi à simpri fat cualchi scherç e mi à segnât a pene deventât predi cun segnâi che, impen di risolvisi, a levin simpri plui deteriorantsi e condizionantmi. In Cjargne al jere un predi mataran, simpri baldisan, che nol pierdeve però la sô voe di butâle in vacje.
✽✽ Un amì predi al è rivât une dì a contâi che, jù par Udin, a vevin fat vescul un de curie. “Tu vedarâs che, prin o dopo, a son bogns di fâti vescul ancje te”. E chel altri, tirant il flât a grops: “Mi fasaran vescul di Corfù, con le talpe in sù”. No pues, in cussience, escludi cheste pussibilitât, ma no ‘nd è di altris. Scugnint vivi a la zornade, come i ucei dal cîl e i zîs de campagne, no ài mai podût programâ nuie e nancje fâ progjets personâi o pastorâi, ma ogni dì o jeri content se o rivavi a fâ chel tic che mi permeteve di jessi content e di zovâur a lis mês piçulis comunitâts.
✽✽ Za il jessi rivât a corantedoi agns di messe al è un travuart che al va plui in là di ogni plui otimistiche prevision. In plui, che al è impuartant, a son stâts agns impegnâts, creatîfs, combatîfs, cence mai rassegnâmi o usâmi a la tristerie e a la banalitât, cirint ogni dì di fâ un passut indenant viers di chê perfezion e plenece che no rivarìn mai ma che o vin di smicjâ fintremai a l’ultime zornade. ❚
pre Antoni Beline