IL FERÂL. Moments di ploie e di burlaç

Oscar Wilde, tal so splendit e dramatic «De profundis», al fâs une osservazion-confession che e mertarès metude tra lis pagjinis plui sapientis e utilis dal pinsîr uman. E, in plui, no si trate di une speculazion astrate, che al pues fâle ancje un massepassût, ma le fâs un che si cjate tun dai moments plui tragjics e umiliants de sô vite e duncje nol fevele par astrazion ma par esperience direte. Al dîs il plui grant scritôr celt e duncje romantic de ete vitoriane che, inte sô vite, al veve cognossût dut ce che di bon, di biel, di estetic, di esaltant, di conturbant si podeve provâ. Al passave come une âf di rose in rose, incjocantsi di profums e di emozions lis plui raris e rafinadis, tune sorte di cjoche dai sens e di inturpidiment da la ment. Al crodeve di vê provât dut, cognossût dut, gjoldûr dut e duncje di jessi l’om plui furtunât di chest mont. Ma si sbaliave. Parcè che, al dîs cjatantsi tal scûr de preson di Reading, al veve cognossût dome une part dal zardin de vite, la plui biele e gratificant, ma simpri limitade. Al veve cognossût la part là che il soreli al regne sovran e a florissin lis rosis plui esotichis e conturbantis. E jere però une altre part dal zardin, che là che nol trai mai soreli e lis rosis a florissin dome di gnot e a àn il colôr dal sanc. Al jere il zardin dal dolôr, là che l’om si cjate te sô nuditât, fragilitât, essenzialitât, miserie, impotence ma ancje veretât. Dome cognossint ancje il dolôr, fisic e morâl, si cognòs la vite e dome cognossint il dolôr fisic e morâl l’om al pues dîsi e sintîsi om complet. Parcè che il mâl al fâs part essenziâl de vite e chel che nol à cognossût il dolôr e il mâl nol à cognossude la vite, almancul la sô part plui profonde e vere.
Po ben o pues dî cun veretât che tal gno ortut nol à mancjât il seren e il soreli e la bueresine che e fâs niçulâ lis campanelis e trimulâ lis fueis sensibilis dai arbui, ma ancjemò plui o ai sperimentât il cîl scûr come une bocje di lôf, e il gherbinat che mi inglaçave i vues e la anime, e il burlaç che mi sdrondenave cence remission, e no je mancjade la tampieste, che e à riscjât di fiscâ tun lamp il lavôr di une vite. No soi tant sant di rivâ a ringraciâ Diu pal mâl che mi à mandât o lassât vignî, però lu ringracii che mi à dade simpri tante fuarce di rivâlu a frontâ cun dignitât e sore dut lu benedìs parcè che o ai rivât instès a vivi e a vivi ben, rivant a tirâ fûr ancje dal mâl chê positivitât che Diu al à metût in ogni robe. O ai patide la malatie ma no ai vivût di malât, almancul no fin cumò; o soi stât petenât e pestât a dovê ma no ai mai rinunciât a vivi une vite dignitose, relativementri serene e impegnade al massim. O crôt che tancj predis cun plui salût di me no àn rivât a fâ ce che o ai fat jo. E cheste e je gracie di Diu de plui gjenuine. Parcè che o podevi benon cjatâ un alibi, une scuse, un rimpin par rinunciâ a vivi o par vivi in funzion de muart, che al è tramudâ la vite in no vite.
No soi tra i fanatics dal mâl, parcè che il mâl al à il non cun se. E nancje no mi va la mistiche masochistiche che tant e à regnât tune part de glesie catoliche che si veve di patî o murî. Mi visi che in ‘seminari nus disevin che «no si pues lâ in paradîs se no si à almancul un claput te scarpe». Si viôt che e je une matetât di siôrs, parcè che i puars no àn scarpis! E po parcè si scuegnial vê un claput cuant che si pues benon laudâ Diu cjaminant ben? Tant plui che jo, par naturâl, o soi un che al tete te lûs, tal cjalt, tal soreli, te positivitât, un che al ame la vite, la novitât, la ligrie, la fantasie. O jeri come un luiarut che al cjantave content beât sul so ramaçut, incjocantsi a buinoire di rosade e di lûs e sore sere fasint il plen di soreli par frontâ il scûr de gnot. Come il «garzoncello scherzoso» dal gno amì Jacum di Recanati, o ai gjoldût il «stato soave» e la «stagion lieta», ancje se curte, e mai plui no varès pensât, te sabide de mê vite e te vee de mê maturitât, che la esistence e fos stade cussì grivie.
Cundut a chel, però, e cence savê ce che mi puartarà l’avignî (di sigûr no grancj salustris), o soi a dî che ancje la malatie, il mâl fisic e morâl, i moments negatîfs de vite a àn une lôr impuartance e un lôr valôr. No dome par fâti cognossi la realtât interie de vite, ma ancje par temprâti, par rinditi plui fuart, plui essenziâl, plui sapient, plui realtîf. Par fâti gjoldi di plui di chês speris di lûs tra un burlaç e chel altri che la vite ti regale e par judâti a capî in profondiutât e no par proforme chei che a tribulin e a cainin dongje di te. Il dolôr ti da umiltât e caritât, passience e sapience, profonditât e compassion. O disarès che al rive a tirâ fûr di te e di chei dongje di te lis miôr cualitâts, cu la cuâl che tantis voltis la salût e la furtune matereâl ti rint insensibil, superficiâl, egoist e malpazient. Cul dolôr tu cressis e tu madressis, cul ben tu riscjis di restâ frut, cun dutis lis pecjis dai fruts. Tantis voltis mi domandi se o varès fat dut ce che o ài fat se o ves vude salût. O varès corût di plui, consumât di plui, ma forsit o varès strassade la vite in maniere stupide. Par chel o dîs, cu lis lagrimis tai voi e strenzint i dincj: «Grazie, Signôr, ancje dal mâl
pre Antoni Beline
da “De Senectute”