Chest an a son cent agns che al è nassût pre Checo Placerean (30.11.1920). La autonomie e je stade par pre Checo un progjet di fonde. Lui le imagjinave pal Friûl che si aministràs di bessôl e ancje pe glesie cun chês autonomiis di tradizion liturgjiche, musicâl, juridiche, organizative che e veve tal Patriarcjât il spieli plui stralusint. Predi fûr dal ordenari, libar e profont, cjalât di stos dai notabii tant de politiche che de curie.
La Patrie e propon chestis pontadis di un intervent di pre Antoni par no dismenteâ un nestri grant profete.
pre Roman Michelot
Il mont di vuê, al à dit Pauli VI cun-
tune espression induvinade e splendide, al à dibisugne di testemonis, no di mestris. Mi diseve une femine che jê no je buine di insegnâi la dutrine a sô fie, parcè che no à fat il cors di catechistiche. “Nancje mê mari – i ai rispuindût – no à stât a Udin a sintî conferencis e no mi à mai spiegât nuie, ma mi à simpri mostrât cu la sô vite ce che si à di fâ. La dutrine si le mostre, no si le spieghe”. E cussì une robe vitâl come la autonomie.
No in dut pre Checo al è stât coerent cun ce che al diseve, e la int – soredut i aversaris e i prevignûts – no àn pierdude ocasion par imputâi i siei difiets e lis sôs incoerencis, ma in chest si pues dî di lui ce che Jesù al à dite di Natanael: “Ve un Israelite rût, che no ‘nd è falsetât in lui” (Zn 1, 48). Pensant a Marchet, mi ven tal cjâf la sô grande culture e erudizion di autentic umanist; pensant a Marchi mi ven tal cjâf la anarchie inte sô acezion plui radicâl e gjenuine. Pensant a pre Checo, la prime peraule che mi ven tal cjâf e je la autonomie. Come mût di pensâ, come mût di vivi, come categorie mentâl e spirituâl, come vistît naturâl, come aiar di respirâ, come Weltanschauung o vision dal mont.
Il prin incuintri cun lui lu ai vût inmò prime di deventâ predi, cuant che o jeri ancjemò inte fabriche a cjapâ lis ultimis rifiniduris, chês fatâls. O feveli dal 1964, un an prime di jessi ordenât. Nus davin la pussibilitât di saltâ fûr la joibe par lâ a fâ une ore di dutrine intes scuelis elementârs, une sorte di tirocini. Mi vevin dade une scuele des bandis di viâl Triest e o passavi, jo e Natalino Zuanella di Mataiûr, par li des muiniis di Sant Pauli in vie Trep, par cucâ lis ultimis novitâts de editorie catoliche. Li o vin viodût pe prime volte pre Checo. Impussibil no inacuarzisi. L’unic cence tonie e duncje za un scandul, l’unic cul toscan che al impestave muiniis e clients, l’unic che al cuistionave di filosofie e di teologjie e no di dutrinis o di nainis clericâls, l’unic che al fevelave simpri e dome par furlan, l’unic che al diseve la porche cuintri de curie e dal vescul Zaffonato in plene ativitât edilizie.
Par nô, che o saltavin fûr come cunins cence pêl in plen burlaç, si tratave di une tentazion e di un pericul, ma il gust dal proibît, la aventure, il velen che nus jentrave dolç e mortâl fintremai tes aìnis, al jere un alc di masse biel par pierdilu. E cussì, o partivin prin da la ore par no pierdi cheste ocasion uniche. Il retôr al è vignût a savêlu e nus à improibît di viodilu e di fevelâi, parcè che, usance lui, pre Checo al veve un alc di diabolic e no si varès vût di lassâlu circolâ libar. “È una lingua satanica”, nus à dit. ❚