IL FERÂL. Sessante agns di profezie

Fevrâr 1946: al jes il prin numar di Patrie dal Friûl par man di pre Bepo Marchet, il scritôr, inteletuâl, pensadôr e Felix Marchi il finanziadôr, il sustignidôr di cheste vôs libare. A son passâts 70 agns, ma no si pues dî che la batae, che chei doi profetis a vevin scomençade, si sedi concludude, che lis visions e idealitâts che lôr a àn insumiât si sedin realizadis. Anzit, si torne a une vision centralistiche. Lis grandis mangjadoriis che a àn splumât il stât a fasin paiâ il cont ai piçui gjavant ogni forme di autonomie, di gjestion locâl dal teritori, di rispiet des diviersitâts.  Par chel ancje vuê cheste vôs no je mancul impuartante di chei timps. O riproponìn a meditazion dai furlans ce che pre Antoni al scriveve 10 agns indaur. (pre Roman Michelot)
O vierç cul cûr che mi trote il prin dai cuatri volums rileâts che a contegnin un grant tesaur. Grant e râr come ducj i tesaurs. Si trate dai numars de Patrie dal Friûl che la passion, la sgrimie, l’ostinazion, la matetât, l’anarchie, la fede di Felix Marchi e dai siei colaboradôrs, in primis la pene splendide e spiçade dal prof. pre Bepo Marchet, a àn dât dongje tun timp particolâr de nestre storie, che al viodeve un Friûl ferît tal cuarp e ta l’anime par vie di une vuere maladete che a veve semenât di muarts e di maseriis la nestre tiere e  invelegnât i cûrs di tante int cun cuintriposizions strategjichis e ideologjichis.
in chest clime di miserie materiâl e morâl, di aviliment e di lassimi stâ, là che il prin probleme al jere chel dal pan e gaban e dal sotet, al varès podût jessi cjapât par insensibilitât ciniche vignî fûr cun pantianis poltichis, cun rivendicazions autonomistichis, cun progjets lontans mil miis de prosaicitât de situazion. Epûr i promotôrs de iniziative dal “Moviment Autpnomistic Furlan” e dal “sfuei setemanâl indipendent” “Patrie dal Friûl” no jerin lafè no insensibili e ideologjics, ma a vevin capît che no si pues riscatâ un cuarp cence riscatâ l’anime e che, tun moment di incuniment e di disperazion, la midisine juste no jere chê di stâ li a vaî e a russâsi lis feridis dolorantis, ma di pensâ in grant, in alt, in profont, progjetâ il gnûf Friûl che al veve di jessi diferent di chel di prime. E la prime diference, fondamentâl, essenziâl, discriminant, e veve di jessi l’autonomie.
Nol veve sens progjetâ un Friûl che nol ves la possibilitât concrete di autogovernâsi, di sintîsi sogjet politic e ministratîf, di inmaneâ chês sieltis che a jerin convenientis e confasintis cu la sô tradizion storiche, cu la sô posizion gjeograticge, cu la sô esperience produtive,  cu la sô peculiaritât.
O si faseve sù il Friûl dai furlans o nol jere un Friûl patrie di int libare e responsabil, ma une enesime braide par fameis di interès e di sieltis esternis e straneadis, la solite riserve indiane di massàriis e di manoâi. Se si pense che, a distance di sessante agns di chel 24 di Fevrâr dal 1946 che al è jessût il prin numar, cuatri sfueis pençs di caratars tipografics e di sostance, o sin ancjemò daûr a domandâ cheste benedete o maladete autonomie, une autonomie autentiche e no une sotanance culturâl, economiche e politiche mascarade di une biele tabele regjonâl o statâl, si capìs trop che i nestris paris fondatôrs a àn savût lâ al cûr de cuistion furlane, l’autentiche e uniche cuistion, che e segne la diference fra il sucès e il faliment di ogni nestre iniziative.
no ai nissun fastidi a fevelâ di profezie, parcè che a àn savût viodi cun grande anticipazion sui timps, l’impuartance de autodeterminazion, l’inicuitât croniche di un sisteme statâl centralistic che nus penalizave, e, tal stes timp, lis potentialitâts de int furlane di jessi tratade a pâr dai venits, dai triestins e di chês altris realtâts. Pe prime volte, cualchidun nus à fevelât di dirits, nus à progjetade o prospietade une cjase dute nestre, no sierade in stupide autarchie, ma vierte a la colaborazion paritarie cun chês realtâts storichis e politichis peadis cun nô a fîl dopli. Nol è un câs che il storic de Patrie, Marchet, te sô Cuintristorie, al vedi metût in lûs i rapuarts virtuôs che il Friûl al à vût di simpri cul mont austriac e gjermanic a nord e cun chel a soreli jevât, e dai rapuarts virtuâi, retorics, falsâts e falimentârs che al à scugnût supâsi cu la ministrazion taliane.
cjapant in man chei sfueis, ju cjali come relicuiis di un grant sium, come semence butade cun fadie e lagrimis tun agâr che no si è rivelât masse fecont, come testament spirtuâl e politic di int che no si rassegnave al sotanisim, a la banalitât, a une vite cence dignitât e cence sens. Come une grande sfide e scomesse ma ancje vocazion dal nestri popul a fâ la sô biele part te grande famee dai oms. Par cualchidun, pai solits ben pensants, la fadie di Marchi e di Marchet e à semeât provocazion o, al plui, utopie. Ma si puedial vivi cence un sium, cence une utopie? E, cjalant i dams provocâts dal realisim politic, al ven di domandâsi se l’utopie no sedi la strade plui juste e induvinade. Se l’om nol fâs siums, e siums in grant, nol è nancje om, ma dome une machine che e vignarà butade in bande cuant che no servissarà plui ai parons dal vapôr.
Il fat che la propueste dal moviment autonomistic furlan no vedi vude furtune, o la furtune che si mertave, al dipent di tantis robis. Dal moment che e ven fate, dal contest locâl e internazionâl, dai condizionaments esternis e internis, dai nemîs che a cirin di scjafoiâ ogni semence gnove par mantignî il statu quo. Al pues dipendi ancje de insensibilitât o impreparazion  dai distinataris de propueste. In chest câs dal popul furlan.
che nol à mai vude une grande pice pe politiche, nol à mai vude une memorie positive e gratificant in fat di autonomie o indipendence, che nol è stât judât in nuie a vê stime di sé, a fâsi sintî e valê.  Grandis predicjis, ancje de glesie, su l’ubidience e la rassegnazion; nissun stimul a cognossi la proprie storie, a tirâ fûr la proprie grinte, a vê stime di sé. Se no vin stime nô di nô stes, no podìn  pretindi che le vedin chei altris. I risultâs deludents de semence butade sessante agns indaûr a àn di fânus pensâ, fâ un esam di cussience,  ma no àn di fânus rinunciâ a chê propueste e a chel progjet. Une propueste e un progjet agjornât ai timps e a lis condizions di vuê. Parcè che l’autonomie no je un optional, un alc di plui, ma la condizion stesse dal vivi, il spartidôr fra il vivi e il no vivi.
par chel che nus rivuarde nô, o continuìn a semenâ, a tignî impiade la flame de autonomie. Lis dificoltâts a son lis stessis, ancje se no je compagne l’autoritât e l’autorevolece di chei pionîrs. O sin convints che, tal cûr dai furlans, e reste simpri cheste gole di autonomie, cheste cussience di une identitât e alteritât. Si trate di continuâ, sperant tes sorpresis de storie e soredut te inteligjence de nestre int. E je la maniere plui juste par rimertâ i nestris profetis. ❚
La Patrie dal Friûl n. 2 Fevrâr 2006