IL FERÂL. Un Spirt fantasiôs e rispietôs

Ae fin di Mai o ai prins di Jugn, la glesie e celebre une des fiestis plui grandis e impuartantis ancje se tal mont catolic e je stade pluitost trascurade: lis Pentecostis o Pasche floride o di rosis. Il significât al è di grant valôr ancje pal dì di vuê e no dome pai cristians ma par dute la umanitât. Si celebre il don des diversitâts, des varietâts, de fantasie infinide di Diu. Il Spirt nus fâs sintî dut chest tant che ricjecis, tesaurs e valôrs che o vin di conservâ cun tante zelosie, e mai considerâ une cualsisei diversitât tant che element di scuintri e di prevaricazion. Il Friûl, piçul struc di mont, di secui al è siôr di diversitâts, ancje ore presint pôc valorizadis. Une lezion dal Spirt ancje pe nestre glesie. (pre Roman Michelot)
Pentecostis, o Pasche des rosis, grant apontament liturgjic par fâ memorie de rivoluzion operade dal Spiritussant sui apuestui, trasformâts di rineadôrs in testemonis, e di cunins in leons.
Il Spiritussant al è il regâl dal Pari al mont pal Fi tornât in glorie. Si podarès clamâlu ancje fuarce dal Pari. Però bisugne dî che al ven fûr dal Pari e dal Fi, par justificâ la barufe sul Filioque, che e à fat lâ in rotis la glesie di Ocident e chê di Orient inmò dal 1054. Cuissà se il Spiritussant, che al è Spirt di unitât, al è stât content che il pape di Rome e il patriarcje di Costantinopoli si sedin gjavâts il bundì par difindilu? Ma aial dibisugne di jessi difindût, lui che al fâs di profession l’avocat, il Paraclit?
Il Spiritussant al è il grant Scognossût, une sorte di “milite ignoto”. Pardut e duncje ancje in Friûl. Si lu studiave a dutrine par cjapâ la cresime, o l’orloi in ocasion de cresime. O crôt però che nancje la glesie in realtât no sepi ce che pardabon al significhe il Spirt. Se no, e varès cjapât dut un altri aspiet e un troi diferent.
Leint il cjapitul 2 dai Ats dai Apuestui, si reste pai efiets “devastants” che il Spirt al à produsût: sunsûr tant che aiaron, sdrondenament a uso taramot, flamis sparniçadis, i apuestui che a tachin a çavariâ in leghis diferentis… Insome, no vevin ducj i tuarts i curiôs che a disevin: «Ce robonis!». E nancje chei altris, plui materialons e cinics, che a sgagnivin: «Chei li a son cjocs in bale!». Parcè che a jerin propit spirtâts. Dut l’incontrari di cemût che si salte fûr des nestris cresimis: sossedant e cuntune grande lamiece di stomi.
O crôt che la glesie e sedi masse serie, precise, puntiliose, ripetitive e un pêl stufadice par revocânus il Spirt che le à inviade. Se il spirt al è spirt, no si pues sierâlu intune butilie o intune stanzie e intun libri o intune struture. La idee di Spirt che e ven fûr dal toc di Luche e je chê di un Spirt fantasiôs, che si divertìs a saltâ ducj i schemis e i confins dal dabenisim par che ognidun al puedi in libertât sbrocâsi cui dons che Diu i à dât.
Un dai slogans plui biei dal Sessantevot al jere: «La fantasie al podê». No sai trope che a ’nd àn vude chei che lu àn proponût. O sai però che al jere induvinât e e sarès stade la grande novitât di chê stagjon.
Un Spirit fantasiôs duncje. Ma ancje rispietôs. Di fat, ducj i popui che a jerin in chei dîs a Jerusalem, e la liste che ju ripuarte e je lungje, a sintivin e a capivin ognidun inte sô marilenghe. Al è chest il miracul carateristic des Pentecostis: la legjitimazion che il Spirt al da a ogni popul di laudâ Diu intal rispiet de sô clime naturâl e culturâl. E nancje chi no sin. Parcè che in dutis lis glesiis de cristianitât par secui e secui si à let chest toc contradisintlu biel che si lu cjantave o leieve. In comunitâts come lis nestris, là che la int e fevele di secui par furlan, par sloven e par todesc, no si pues fevelâ di marilenghe par latin (e cumò par talian) cence pierdi almancul la muse. Par rispiet e onôr di chel Spirt che nus rispiete e nus onore.
Nol baste lei il toc des Pentecostis o meti sù la planete rosse par meretâ il Spirt des Pentecostis. Che se dopo o cirìn ancje di metilu inte scjaipule, alore la fertaie e je complete.
pre Antoni Beline
Cirint lis olmis di Diu, publicade su La Vite Catoliche ai 28.05.1994 ❚