IL FERÂL. UNIVERSITÂT: un sium deludent e masse salât

La Universitât di Udin, nassude par riscatâ il Friûl, e à finît cul pesâ inmò di plui cence nissun zovament parcè che no si è inseride tal teritori come fuarce trainant e cualificant de nestre specificitât cultural. O intint fevelâ di chel sium de vierte autonomistiche furlane, cuant che il nestri popul, compat e cunvint, si è batût par vê ce che i spietave par dirit e che i vignive dineât de insensibilitât de classe politiche, simpri pronte a tradî la sô int par no tradî o deludi la prepotente mafiose e massoniche triestine. Parcè che il dogme di fonde al jere chel di dâi a Triest dut ce che al pratindeve e di dineâi al Friûl dut ce che al puartave prejudizi ai triestins. Che e sarès la par conditio dai brigants.
E i furlans a àn dit: “No vino dirit di dâur ai nestris fîs, dongje de valîs, ancje un sfuei di cjarte che ur ricognossi la dignitât di dotôrs e la pussibilitât di jentrâ ancje lôr tai puescj di comant?”. Un sium plui che legjitim, sintût come strade irinunciabil par un riscat economic che al veve di partî dal cjâf.
Dome che i fats a àn tradidis lis aspetativis. La universitât e je rivade dome pe tragjedie dal taramot, e duncje par santescugne e sot pression des 130.000 firmis di furlans. E par vêle, o vin scugnût rinunciâ al titul di Universitât dal Friûl par chel mancul significatîf di Universitât di Udin. In plui si à scugnût rimpolpâ la za grasse grepie triestine. E cussì e je rivade in ritart, stentade e malade. Denant dal ricat, tocje fâ come simpri: cjapâ il pôc par no pierdi il dut.
Ma la delusion vere e à scomençât dopo e e va cressint cul timp. Tal sens che la Universitât no à judât i furlans a disberdeâ la cuistion de disocupazion. Un disocupât laureât nol è plui nobil di un disocupât cence lauree. In chest no je colpe dome sô, dal moment che dutis a son daûr a fabricâ disocupazion. Si vares vût, se mai, di integrâ cun proviodiments aministratîfs e legjislatîfs regjonâi che a davin la precedence ae nestre int, come che a fasin di altris bandis cence che nissun no si sbreghi i vistîts. MIôr triscj che no stupits. “Persi per persi, meglio perversi” al è scrit suntun mûr dal marcjât vieri di Vie Volturno.
La vere tragjedie e je che la Universitât, nassude par riscatâ il Friûl, e à finît cul pesâ inmò di plui cence nissun zovament. Parcè che no si è inseride tal teritori come fuarce trainant e cualificant de nestre specificitât culturâl. Che al jere il prin compii di une universitât gnove, alternative, furlane. Invezit no si à nissun segnâl par dî che lis robis a son gambiadis in miôr.
Piês ancjemò ce che al è daûr a sucedi tal ospedâl, là che la universitât e e je daûr a ocupâ toc par toc in ducj i sens. Vint pussibilitâts di finanziaments plui svelts e di corsiis preferenziâls mancul burocratichis, si slargje simpri di plui, e chest nol sarès un mâl, ma a dam dal ospedâl, e chest nol è tolerabil. Parcè che ta la universitât e lavore int foreste, rivade chi parcè che no cjatave sistemazions plui prestigjosis e simpri pronte a tovâle a pene che si vierç une puarte. Duncje si trate dome di un parchegjo provisori, il plui pussibil provisori. In plui ogni baron al mene daûr i siei vassâi e valvassôrs e valvassins, creantsi une sô extra teritorialitât e blocant ogni prospietive pe int nostrane, soredut la plui libare inteletualmentri e politicamentri. E dut chest a spesis de struture ospedaliere, dal moment che i bêçs a son contâts.
Cussì o lin a riscjo, e no sin lontans, che la nestre int no varà vonde assistence par privilegjâ une struture che no dà la pussibilitât di cjatâ une ocupazion e intant e servìs int foreste come parchegjo par lâ in lûcs plui gratificants. Dams a cjadene. Il dut cui nestris bêçs.
A chest pont al sarès di cjocs continuâ cuntun sium che, se al jere legjitim fâlu, si à di vê il coragjo di rinunciâi se al coste masse e nol bute nuie. Dal moment che no podìn rinunciâ a une struture ospedaliere come che Diu comande, che o vin di passâ par li cu la cuâl che no ducj o passìn pe universitât, si scuen pratindi che la regjon e fasi sieltis justis e onestis, ancje se mancul gratificantis sul plan de imagjin culturâl.
Par chel che al rivuarde la universitât in gjenerâl, no podìn sustignî une struture nestre che no je nestre.
O la universitât e fâs l’at di inteligjence di judâ il teritori dal pont di viste de culture, de lenghe, de ricercje e vie, o al è miôr che e ledi a fasi mantignî di un altre bande. Nol è seri paiâ tancj miliarts dome par vê su la puarte une etichete e di là de puarte il vueit. Nol è il moment di fâ i grancj riscjant di fâ i grancj macacos.
pre Antoni Beline
La Patrie dal Friûl n. 3 Avrîl 1995 (918 de Patrie)