Cjantant, ghitarist, violoncelist e autôr, Massimo Silverio – nassût a Çurçuvint in Cjargne – al compon musiche di cuant che al veve 16 agns. La sô vite e je la musiche. Specializât tai suns e cjants tradizionâi furlans cun Giulio Venier, chest zovin cjantautôr al à za vût grande fame insiemi a grups e associazions culturâls, zirant dute la Italie e la Europe, in particolâr te vicine Austrie.
Dopo il sucès che al à vût te passade edizion di Suns Europe, il cjantautôr al à tacât il 2020 publicant il so prin album solist. Di fat, al è za cognossût in dute Europe parcè che, tacant di Lubiane, passant par Berlin e rivant fin in Olande, Massimo cui siei amîs – preseâts artiscj come lui – Leo Virgili e Nicholas Remondino, al è partît in Fevrâr in tour par presentâ il so disc dal titul Ø. L’album, jessût ai 31 di Zenâr e presentât in Friûl pe prime volte ai 14 di Fevrâr, tal Teatri San Zorç di Udin, al à dentri cuatri cjançons: il toc che i da il non Ø (Explicit) insiemi cun Tiere, Som e Jevâ. Par sunâ in conciert i tocs dal album, il grup di Massimo, Leo e Nicholas al dopre ghitaris, violoncel, bas, tastiere, batarie, percussions e un strument stramp e sofisticât: il theremin.
Cu la musiche, l’artist al cîr di cognossi e di spiegâ la anime umane plui profonde. Midiant de sperimentazion, doprant struments diferents e miscliçant gjenars musicâi diferents tant che rock, “indie” e eletroniche, al cree armoniis che si incrosin, e leams di notis. Notis che a son sclendaris, ma ancje dolcis e profondis, metudis insiemi cu la vôs melodiose di Massimo a penetrin te piel di cui che al scolte. Si môf fûr un turbin continui, di dulà che no si rive a saltâ fûr, come a jessi intun sium. La musiche e je un folk malinconic che nus fâs ricuardâ i nestris afiets, lis nestris penis e la nestre felicitât. A regjistrâ l’album cun lui al è stât Manuel Volpe, e par rangjâlu e masterizâlu al jere Giordano Sala. La cuviertine dal album e je za di so une opare di art, realizade di Anna Marta De Marchi, duncje no si pues fâ altri che ordenâlu e lâ a scoltâlu su https://massimosilverio.bandcamp.com/.
Scuvierzêt di plui lant a cirî Massimo su lis plateformis social, e lassaitsi traspuartâ, come l’aiar, vie de realtât cu la sô musiche. ❚