Donât al Côr Polifonic di Rude, il font archivistic dal mestri Giovanni Famea (1907 – 2006) al è stât dal ben e dal dut catalogât in gracie dal lavôr seri dal storic e archivist Vanni Feresin, classe 1980, paleograf e diplomatist, laureât cun laude ae Scuele di Archivistiche, Paleografie e Diplomatiche dal Archivi Apostolic Vatican, nuie di mancul. Duncje cumò, inte sede dal côr pluripremiât famôs a nivel internazionâl, logade in vie Mosettig di Rude, si pues consultâ, cun grant ordin e serenitât, il lassit dal mestri di Cjopris. La sô e je une figure une vore interessante tal mont de coralitât furlane: diretôr de corâl “Tita Birchebner” di Tapoian, dal côr “Giuseppe Schiff” di Cjopris e Viscon, dal côr di vôs blancjis de scuele “A. Gabelli”, indulà che al à insegnât, organist intes parochiis di Tapoian, Cravuì e Viarse e, tant par no fâsi mancjâ nuie inte sô grande passion pe musiche, colaboradôr atîf dal etnomusicolic Claudio Noliani tal cjamp de ricercje, catalogazion e protezion di cjants e musichis dal patrimoni furlan, in particolâr cjargnel.
◆ Titulât de onorificence pontificie “Pro ecclesia et pontefice” tal 1999, premi “Merit Furlan” tal 2002, “Premi Tormilaghis” tal 2003, di Giovanni Famea no si pues che dî ben, e il so archivi al sintetize ben il so grant amôr e la sô grande competence intal cjamp de art musicâl.
◆ Des sôs cjartis si puedin capî ben i rapuarts che al à vût cun diviers compositôrs e musiciscj furlans impuartants, tant che Luigi Garzoni, che i à dedicât “Il cjant dal contadin”, Paolo Gallo, Claudio Noliani, Guido Michelutti.
Il font archivistic si compon di un font antîc sacri, di un font antîc profan, dal font Giovanni Famea, di une racuelte di musiche furlane e di cuadernis furlans, di messis, motets e publicazions variis.
◆ Tra lis cjartis plui datadis, si cjatin lis litaniis a trê vôs di Candotti, lis litaniis di Giacomo De Vit, i jespui dal mestri Madotti. No mancje la musiche oparistiche dal repertori di Verdi, Rossini, Tosti e Donizetti, tra manuscrits copiâts e stampis, oltri che tocs di musiche lizere tra Vot e Nûfcent.
◆ Tra lis seriis dedicadis aes messis e ai motets sacris, a son stadis cjatadis disesiet composizions de tradizion taliane, furlane e todescje. La plui part a son manuscritis, e tra chestis la Messe corâl di Pari Amodeo e la Messe solene a cinc vôs dal mestri Rotta. I motets sacris a son invezit spartîts in grandis racueltis dedicadis ai variis timps liturgjics e celebrazions: cjant religjôs, cjants marians, in lenghe furlane, pal mês di Mai, pe Sante Eucarestie, pe Setemane Sante e vie indenant. La ultime serie infin e je dedicade a centenârs di publicazion cjapadis sù in passe sessante agns di ativitâts.
◆ Graciis cetant, mestri Giovanni Famea. Cumò, di gracie a ce che di to al è stât donât al Côr Polifonic di Rude, che al è disponibil a meti a disposizion lis tôs cjartis, che di vuê indenant a son une vore ben ordenadis, apassionâts e studiôs a varan la fortune di cognossi di plui e miôr la nestre siore e biele musiche. ❚
Il font archivistic dal Mestri Giovanni Famea, musicist passionât di Cjopris
Alessio Screm
