Il cuadri statâl si è di gnûf discomponût e al è dificil interpretâ ce che al podarà sucedi in Italie e cualis che a podaressin jessi lis consecuencis pussibilis pal Friûl e pe Regjon.
Si palese simpri plui a clâr – cemût che al previodeve, anzit a chest pont “al profetizave” Sergio Cecotti in timps no suspiets – che lis dôs visions vuê in cjamp in merit ae Europe (chê “junkeriste” de Merkel e dai banchîrs, cussì cjare ancje al renzisim, e chê “lepeniste” dai sovraniscj di cjase nestre, Salvini e Di Maggio) a rapresentin lis musis di une stesse medaie.
Une monede false tant che chê di Buie, dôs posizions, doi progjets che a provin a meti tal cjanton, a fâ fûr, la uniche prospetive di futûr: la autodeterminazion dai popui intune Europe che e passi il concet di stât nazion, intal rispiet di une democrazie di base, cussiente di dirits e di dovês.
Dificil, o disevin, previodi cemût che in concret chest scuintri si intersecarà cui destins locâi, se no proponintnus une campagne eletorâl continue, dulà che i problemis reâi a saran metûts in bande, par altri cun grant suspîr di liberazion de bande dai gnûfs governants.
A paiâ o sarìn in dut câs simpri nô, il Friûl, che no viodarìn nissun plan strategjic, nissun resonament di disvilup, e tant mancul nancje di rimiedi al stât di depression sociâl, economiche e istituzionâl là che si cjate.
No stin fâsi freolâ duncje di un scuintri aparent là che i interès rapresentâts a son di une classe politiche e di un stât che nol è bon di dâ rispuestis, un stât simpri plui fat sù intor di se, intun declin che nô no volìn jessi partecips.
Se il Friûl al è altri a pet di chest cuadri dramatic, e je rivade la ore di dimostrâlu.
di Dree Valcic