Il Friûl in cercje di fiducie intal sisteme bancjari locâl

La crisi e muart fuart ancje in Friûl e e met in pericul in maniere progressive dut il sisteme economic e sociâl, che al tire a disfiliâsi cu lis continuis e gnovis situazions di dificoltâts aziendâls. Di pôc, il president de Cjamare di cumierç, Giovanni Da Pozzo, al à descrit – plui “a numars” che a peraulis – la puartade de crisi. Intal prin trimestri 2013 a son nassudis 2.053 impresis (1,2% a pet dal periodi analic dal an passât) a front di 2.931 cancelazions (-3,7%), intant che 464 realtâts (che a operin soredut intai setôrs dal cumierç e dai servizis aes impresis) a son jentradis in disfasiment e licuidazion. Ma dai dâts Unioncamere si dedûs che il sisteme al è ancjemò in dificoltât grave ancje pal fat che i faturâts e la produzion a son sdrumâts un pôc in ducj i setôrs (costruzions su ducj, cul -17%; ma ancje il manifaturîr, cul -6,5% nol scherce), cu la ecezion dome dal vitivinicul. O sperìn – passaitnus la batude – che il risultât positîf dal compart nol sedi peât a un aument dai consums de bande di cui che al bêf par dismenteâ lis propriis disgraciis o par consolâsi…
Tra lis causis principâls de situazion di dificoltât des impresis, si denunzie di timp in particolâr il “credit crunch”, o sedi la dificoltât cressinte di acès al credit de bande des impresis. Chest, par altri – insiemi cui tant sbandierâts e spietâts, ma fin cumò ancjemò no disblocâts, paiaments de aministrazion publiche aes impresis creditoris – nol fâs altri che alimentâ un cicli pervers: la mancjance di licuiditât e impedìs aes impresis di paiâ i propris furnidôrs che, a lôr volte, a viodin indebilîsi in maniere progressive la lôr situazion fin a jentrâ in crisi. E cussì vie, cuntun efiet domino distrutîf, che al glot – ae fin dal percors – ancje lis realtâts plui sanis.
Sot acuse al finìs cussì cence fal il sisteme bancjari, di plui parts acusât di vê rinunziât di timp a fâ il propri mistîr – o sedi assumisi la ativitât di risi dal credit sostignint il sisteme produtîf – a dut favôr di invistiments plui trancuîi. La acuse, insume, e je chê di vê cjapât i bêçs che ur à cuasi “regalâts” la Bce e vêju invistîts in titui di Stât o cun rindiments a un tas profitevul e sigûr, pluitost che lâ a poie des impresis, cun risultâts incierts.
Dal rest – si pare il sisteme bancjari in câs di dinei di credit aes impresis – il mont creditizi al à di rispuindi ai criteris imponûts dai varis “nivei” dai acuardis di Basilee. E cussì, ducj cu la cussience a puest, si pues procedi viers il precipizi.
Al è vêr però che la lungje crisi internazionâl e à mandât sensibilmentri in piês la cualitât dal credit, ancje a nivel locâl. Osservatori favorît, in chest câs, al è il sisteme des Bancjis di credit cooperatîf, propit parcè che al è inlidrisât sul teritori li che al opare. A front di un aument dal 1,2% de racuelte globâl (8 miliarts di euros) e di un +0,9% de masse operative (13 miliarts), il sisteme cooperatîf al à regjistrât un +0,5% intai impleis (5,2 miliarts), intant che la cuote dai credits a soference (218 milions) e des partidis deterioradis (419 milions) a son cressûts l’an passât in maniere rispetive dal 19,4 e dal 24,4 par cent. I dâts si comentin bessôi.
Al è ancje vêr – e lu certifichin i dâts a nivel talian – che si à assistût dilunc dai ultins agns a une colade verticâl des domandis di prestits de bande di impresis e fameis (in primis i mutuis par compra la prime cjase, cun riflès pesants ancje sul compart edilizi e imobiliâr), che in tancj câs no je peade dome al credit crunch ma ancje a une tindince a rinviâ – de bande di impresis e fameis – i invistiments, in spiete di timps miôr. A nivel locâl, un piçul colp in plui ae fiducie dal sisteme bancjari a àn contribuît a dâlu i câs di chei che a son stâts za tornats a batiâ in maniere scherçose “leasing subprime” (i contrats di leasing indicizâts) de Hypo Alpe Adria Bank (che par jê cumò si zonte ancje la inciertece sul futûr, stant che la proprietât austriache e sarès intenzionade a abandonâ l’afâr talian) e de borascjade su la Bancje Popolâr di Cividât, pal câs di cualchi afidament, che su chei e indaghe la magjistrature.
E alore? E alore nol reste che sperâ intal sbloc dai paiaments de aministrazion publiche, intun rûl plui incisîf de “politiche” (massime dopo sierade la procedure di infrazion de bande de Ue), ancje a nivel regjonâl, intun rûl rinfuarçât dai struments di cuintrigaranzie (Confidi, e v.i.) a poie des impresis e des fameis, consintintjur une bocjade di ossigjen e judantlis a recuperâ fiducie. No son esercizis di stîl, si trate di fâ sorevivi il teritori. ❚
Linux