Intune conte dal poete serp la muart eroiche di un om fi fuarce salvadie che al sfide Vignesie tal non de libertât
“Kanjoš, il Furlan e il Dôs” e je une conte scrite in tal 1870 di Stefan Mitrov Ljubiša (1824-1878), autôr “cernogoran” (perdonaitmi il neologjisim: al ven di Črna Gora, che i talians a clamin Montenegro, par chest no mi plâs definîlu montenegrin), ricognossût dai serps tant che il poete che plui di ducj al à rivât adore a fâsi vôs di un popul, piturant cu lis peraulis il sintî identitari profont cuintri di ogni pericul di discomparî devant di un nemì fuart e potent, cuant che chel al slungje lis sgrifis su la sô tiere, sdrumant lenghe e culture par imponisi e par sostituîsi ai gnûfs sotans. In cheste opare, calcolade tant che une des plui impuartantis de leterature serbe romantiche, nus ven contade la storie di Kanjoš Macedonovic´, un marcjadant di Budva, un omenut picinin, un come tancj altris, cetant lontan de idee tradizionâl di eroi potent e vigorôs, che si met tal cjâf di deventâ il campion de sô tribù, che dai Paštrovic´, par svindicâ i dirits de sô int. E chest intun moment – o sin intal cûr dal secul XV – là che sedi i Turcs che Vignesie a vuelin svantâ dirits su chê sclese di mont di cret che si sprofonde tal mâr Adriatic e che Kanjoš si ustine a difindi, libare e cence parons, dal moment che e je cjase sô. Il stîl doprât dal Autôr al ricuarde i cjants dai antîcs guslârs, i sunadôrs di gusla, chel strument a cuarde de tradizion balcaniche che al compagnave la vôs dai cjantestoriis de tradizion. E in efiets, il test di cheste conte al pues ben fâ pensâ al stîl di chê grande tradizion orâl là che lis azions dai antenâts a vignivin cjantadis intes placis dai paîs o intai piçui vilaçs rimpinâts sù pes monts, e che a deventavin memorie coletive. La sene e tache intal principi dal mês di Marc dal 1423. I vecjos patriarcjis dal clan dai Paštrovic´ a decidin di cjatâsi cul rapresentant dal dôs di Vignesie, l’amirâl Francesco Bembo, che ju ospite su la sô nâf di vuere. Il pat al è che se i Turcs a vessin di tacâ la lôr tiere, alore la Republiche ju difindarès, ma in cambi lôr a àn di deventâ une part dal grant imperi comerciâl di Sant Marc, fedêi e devots aes esigjencis dai venezians. E cussì il clan, dismenteantsi de antighe braùre dai siei antenâts, al devente un servidôr di chê potence economiche che no à nuie a ce fâ cu la sô int e che e je dome golose des risorsis di une tiere che e vîf di bosc e di marine. E cuant che si presente la ocasion, un atac dal Turc, Vignesie si mangje la peraule e no môf nancje un dêt par onorâ il so pat. Cussì Kanjoš, un om ordenari, al decît di puartâ la sô vôs cuintri dal dôs in persone. Nol à nissune carateristiche dal combatent, nol à un fisic potent, ma al à un cûr sclet, al stime impuartante la peraule dade, al è calcolât un savi, e al ame cun dut il cûr la sô int e il so pais. Cussì al decît di partî par un viaç lunc che lu puarte fin intal cûr de grande citât: si piert denant dai grancj palaçs, dal labirint des straducis, de ricjece des buteghis e de bielece di che int siore e braurose, ma ancje cetant plui corote, crudêl, egoiste a pet di chei pastôrs contadins e oms di mâr dulà che tra lôr al è nassût e cressût. Dut ce che lui al fâs e che al dîs, al devente ridicul pai abitants di Vignesie, ma al è ben clâr che la posizion dal Autôr e je dute a pro di Kanjoš: la sô “inciviltât” e vâl tant di plui, parcè che e je gjenuine a pet de “civiltât” ocidentâl false e corote. Ma nol è dome lui rivât a svindicâ i dirits dal so popul devant dal dôs. Al ven a savê che un zigant, un furlan che al ven di une tiere salvadie e primitive, la Furlandie, al à cjapât possès di une isole de lagune e al spiete che il dôs al vegni a combati cuintri di lui, par viodi cui che le vinç. Parcè che si è stufât di vê di paiâ a Vignesie un tribût, e al reclame la sô libertât. Il furlan al à un cuarp grandonon, al è descrit alt tant che une mont. I siei vistîts a son fats di pelice di lôf. E al dispresee il dôs e ducj i abitants di Vignesie, dal moment che nissun, nancje la plui grande autoritât di chel paîs, al à il coraç di cjapâsi la responsabilitât di scombati cuintri di lui. Al è ben clâr che Stefan Mitrov Ljubiša al rapresente chest furlan tant che une fuarce de nature, libare e potente, che si met cuintri di une culture segnade de decjadence e de coruzion. Kanjoš, sperant di vuadagnâsi la stime dal dôs, al decît di scombati cuintri dal furlan. E lu cope. Ma prime di murî, il furlan i domande parcè che Kanjoš al à decidût di metisi cuintri di lui, dal moment che ducj i doi a rapresentin la vôs di popui che a vuelin jessi libars di chel stes paron. Il furlan al piert. Ma la sô muart, libare e salvadie, e reste un esempli di grandece e di libertât. Un insegnament no dome pai serps. ❚
