Sant Jaroni ae scuvierte di Aquilee, e de sô musiche che e incjante

Chest colp mi plâs fâ un biel salt indaûr, fin dentri de prime ete dal popul furlan, propit cuant che al tacave a pene a formâsi. Il pont dal “start” insome, il principi da la conte, cuant che cheste nestre tiere no jere plui abitade di Kurgan protostorics o di Celtis, ni di Paleovenits, Romans, di Gôts o di Bizantins, ma di un popul che al cjapave dentri de sô memorie storiche e culturâl ducj chei altris che a  vevin poiade chenti la lôr fonde. Un popul che dut câs al stave cjapant un so profîl, une fisionomie dal dut gnove, sedi tant che societât che tant che culture, e duncje bon di esprimisi ancje intune lenghe gnove, chel strument che al permet di comunicâ la memorie, di tramandâle aes gjenerazions cui suns che ti à insegnât tô mari. E par rivâ adore a stampâ la imagjin di cheste prime “ecografie embrionâl” de nestre int e viodi, ma ancje cirî di capî, cemût che e vignive intindude e judicade di chei altris che le cjalavin di difûr, o provi a sgarfâ dentri dai scrits e dai pinsîrs di un grant inteletuâl e om di fede di chel timp alì, che i storics a clamin “Tarde Antichitât” e che al coincît cu la decjadence e la muart dal Imperi roman di Ocident e lis primis sossedadis de Ete di Mieç. Lui al è Jaroni di Stridon, piçul borc de regjon iliriche, sparît par simpri di ogni mape di cuant che i Gôts lu àn sdrumât dal dut. Une comunitât che cualchidun al fâs corispuindi ae intersezion jenfri Cravuazie e Bosgne. O stin fevelant di Sant Jaroni, l’autôr – tra dutis chês altris oparis che al à firmadis – di chê grande storie dal mont che e scomence de Creazion e che e rive fin ai timps de sô vite, il Chronicon; e soredut de impuartantissime Vulgade, ven a stâi la Bibie voltade dal Grêc par Latin. Chest pari de Glesie – come che nus da testemoneance – al ricognòs in Aquilee la lidrîs plui profonde de sô formazion culturâl e spirituâl. Nus conte che il so cûr, cjapât di une sêt pe contemplazion che nol rivave a morestâ, al rive a cjatâ sodisfazion jenfri il circuit des muris di cheste tiere, descrite tant che une scune di sapience, di art e di bielece. I siei zovins nus vegnin presentâts come une clape buine di condividi il spirt pe maravee, il gust profont pe ricercje dal Vêr, tignint impiade cheste flame cul gjoldi di une compagnie fondade sul gust dal stâ insiemi, e dal condividi ancje il pôc che si à pal ben di ducj chei altris. A son lôr chei “Aquileienses clerici quasi chorus beatorum”, bogns di cjantâ une musiche che e incjante. Bielonone la descrizion che Jeroni nus regale di un vecjo, Pauli, cognossût intai dintors di Aquilee. Nus ven presentât come un om straordenari pal vigôr de sô fuarce fisiche, judade di une salût portentose, ma ancje bon di visâsi episodis de storie, moments de sô esperience vivarose intal mont, che al conte cun gust in chê forme semplice e sclete che i vecjos di chenti nus àn dimostrât di vê in plui di une ocasion: “E je colpe dal pecjât se tancj di lôr nus parin za muarts intant che a son ancjemò in vite; tu, vecjo come che tu sês, par merit de tô virtût tu nus paris un fantacin”.
◆ E je tant impuartante la sô esperience a Aquilee che propit culì al madrès la sô intenzion di deventâ un om di Diu. Nol maravee duncje che al invidi sô sûr, cjapade di une profonde crisi esistenziâl, a bandonâ il paîs, là che la int e je “ignorante e salvadie, e no cognòs nissun altri Diu che nol sedi il bultric, vivint a la zornade, pensant che il plui siôr al sedi ancje il plui sant”. Al somee che al descrivi la Italie dai nestris timps! Dut il contrari di Aquilee, là che ancje i plui grancj savis a san cjapâsi a cûr il destin di une puare fantate. E il riferiment al è al diacun Julian, un “che une volte che al à plantât un arbul no lu bandone, ma al continue a sborfâlu cu la aghe de sô sapience”. Intune letare al descrîf la mari di Cromazi e di Eusebi: une femine che e progredìs inte santitât, e pûr inte sô semplicitât e supere i doi dotôrs de Glesie, tignint la lampade simpri alimentade di vueli: “Che e sedi benedete la vuestre cjase, beade dimore!” No si maravee plui di tant duncje, contant che lis preieris intes glesiis di Aquilee a vegnin cjantadis intun “sermo rusticus” che al à il savôr di cjase. Il profum di chê santitât che e nulìs tant che un ort ben tignût. Fate di aghe frescje e di ligrie. Chê “letitia” buine di tignî piât il cûr ancje cuant che dut al somee pierdût. No sai voaltris, ma a mi mi pâr di lei come intun spieli chei valôrs che mi inscuelave gno nono. Antîcs di seculorum e pûr fondamentâi. Peraule di Sant Jaroni. ❚