IL GRANT LUNARI DAL FRIÛL. Novembar

Novembar al è il diesim prin mês dal calendari e al cjape il so non di November mensis, in altris peraulis il novesim mês dal antîc calendari roman metût in vore forsit di Numa. Secont mês e cûr de Sierade, Novembar al è chel che al regjistre il cambiament fuart dal clime, parcè che aromai al à dome cualchi zornade clipe a voltis fin ae fieste di Sant Martin (Istât di Sant Martin, trê dîs e un freghenin), date (11-XI) che invezit pal solit e presente il prin frêt, tant che cheste e lis fiestis di Sante Catarine (25-XI) e Sant Andree (30-XI) in Friûl a vegnin tignudis tant che “puartis dal Invier”.
A rivin ploiis condurantis, umiditât e fumatis tal plan, brumis tes valadis e cualchi an ancje la nêf su la Mont Cjanine, intant che il mâr al è dispès in burascje. A chest pont la nature e pant ducj i segns dal cediment: i ramaçs si dispuein e lis fueis par tiere a tachin a fraidî, i ultins uciei a partissin, i animâi a van tes lôr tanis.
Dut si sta secjant e scagnint, lis linfis si ritirin intune atmosfere suturne, cuasi di aviliment, e ducj i paisaçs a son grîs, cidins e desolâts. La nature si sta indurmidint, prontantsi pe sô fase plui scaturinte: il lunc sium de muart sot dal mantiel dal frêt Invier che le pronte pe gnove vite.
Il soreli al va indevant a sbassâsi puartant cun se zornadis une vore scurtadis e gnots lungjis, fredis e fondis. Il disc di fûc, lassade daûr di se la linie dal ecuinozi di Setembar, si slontane simpri di plui dal emisferi di setentrion e simpri plui vîf al slusìs in chel di meridion. In chest periodi lis Pleiadis a tramontin ae albe, al è il piçul grup di stelis de costelazion dal Taur che te civiltât agrarie al veve la funzion di confin ultin pe semine dal forment e a segnavin l’inizi de brute stagjon.
Novembar al è un dai mês plui confinâts e cognossûts dal calendari par vie che al tache cu la grande fieste universâl dai Sants, l’antîc Samhain celtic, che i je metude dongje la zornade dai defonts e che adun a fasevin une sorte di isule liturgjiche e folcloriche di impuartance straordenarie tal lunari popolâr dai nestris vons.
Ancje la fieste di Sant Martin, dal dut profane e scjampade al control de Glesie, e jere une vore impuartante tes usancis juridichis, agrariis, tradizionâls, climaterichis e culinariis dal Friûl come di ogni regjon rurâl de Europe, intant che te nestre tiere ancje lis dôs fiestis de fin dal mês, chês di Sante Catarine (date de grande fiere de Sierade di Udin) e di Sant Dree (date de fieste dal patron di Gurize) a rapresentavin doi moments fuarts pai riferiments climaterics e agraris dal calendari popolâr.
Cemût che al sucêt pe nature e pai animâi ancje l’om, sieradis dutis lis voris de campagne, al comede e al met sotet i imprescj di vore, al finìs di consegnâ la sô part al paron dal teren che al lavore e il cuartês al plevan, al controle che dutis lis scortis a sedin in ordin par fâ front e passâ l’Invier e al fâs cualchi piçule vore in cjase e te stale.
In Novembar al tache il timp des veglis e des filaduris fatis des feminis vie pes lungjis seris dal Invier, che al è ancje la stagjon plui juste par copâ il purcit e conservâ lis sôs cjars cetant preseadis. ❚
Mario Martinis