………………………………………………………..
I TRÊ PROVERBIS DI MAI
Il clip di Mai al svee il cai
❋❋❋
Ploie di Mai, vin assai
❋❋❋
Cul foragjo di Mai si fâs un bon formai
………………………………………………………..
LA CUSINE DAL MÊS
Risot cui sparcs
Paste, pastiç e amblets di sparcs
Involtins di persut di Sant Denêl cun sparcs e selino
Mignestrons cu lis verduris gnovis dal ort
Patatis e cevole in fersorie
Fasûi in padiele
Salatis di stagjon
Cunin riplen
Cjastrât in padiele
Ûfs in fonghet
Vuaìnis in padiele
Tocj in braide
Spinaze in umit
Ostiis di frico crustulin
e verduris cuetis al vapôr
Plats cun cjars di bestiis dal curtîl
Jeur o cunin con verduris dal ort
Gjaline faraone cul riplen
Plats cun colomps e altris salvadis
Rost cul pestât
Polpetis ancje in umit
Linguâl
Polpeton
Pitine
Sopis di crots o di cais
Risot cu la granceule
Boret di romp
Friture di pes
Filets di brancin marinâts
Sope di fasûi
cun gjambars di mâr e mussui
Pes di mâr su la gridele
Sgombri in umit
Crostade di freulis o di cjariesis
Zavaion ancje cul vin
Marmeladis di baracocui
e sirop di flôrs di saût
Cjariesis
………………………………………………………..
IL SANT DAL MÊS. Sant Florian
![](https://www.lapatriedalfriul.org/wp-content/uploads/2024/07/san-floriano.jpg)
Stant a une Passio, il militâr roman Florean ai 4 di Mai dal 304 al fo condanât a jessi inneât intal flum Enns cuntune piere leade a une cuarde ator dal cuel par vie che al jere cristian. Cetant popolâr in Baviere, Sant Florean, patron de Alte Austrie e de Polonie, al ven invocât cuintri des inondazions e dai fûcs, pai miracui fats cuintri la aghe e lis flamis. In cierts paîs dal Friûl chest sant no dome al è protetôr des bestiis, tant che intal dì de sô fieste i nemâi des stalis a vignivin puartâts a benedî inte place dai paîs, ma al è ancje tiermin agrari. Un proverbi precîs al dîs Sant Florean cu la spie in man, cjapant cussì une funzion precise di segnaladôr de stagjon intal calendari rurâl. Sant Florean, però, al è ancje peât ae tradizion contadine di tantis comunitâts di mont dal donâ il formadi prodot intune zornade ae glesie dal paîs (il formadi di Sant Florean). ❚
………………………………………………………..
LA FIESTE DAL MÊS- La Sense
![](https://www.lapatriedalfriul.org/wp-content/uploads/2024/07/cammino-delle-pievi_Bacio-delle-croci-anni-50.jpg)
Cuarante dîs dopo Pasche (che e pues colâ jenfri il 22 di Març e il 25 di Avrîl, par vie de sô date mobile), la Glesie e ricuarde cun solenitât la Sense di Jesù al cîl. Duncje, pal calendari eclesiastic, la Sense e cole jenfri il 1n di Mai e il 4 di Jugn, e cul gnûf calendari liturgjic e je logade inte seste domenie dopo de Pasche. Ancjemò une volte la simbologjie liturgjiche e coincît in maniere straordenarie cui ritmis de nature, tant che la jevade di dutis lis fuarcis gjerminativis, che in cheste fase de Vierte e je te sô colme, e corispuint ae assension simboliche di Crist in cîl. Intal dì sacri de Sense la int si astignive dal cjapâ sù rosis, frascjis e ortaiis par no corompi la energjie gjerminative de nature inte piche dal so disvilup. Cun di plui, daûr de superstizion dal popul, la aghe esponude fûr tal viert te gnot de Sense e cjapave virtûts miracolosis no diviersis di chês supadis te gnot magjiche di Sant Zuan. Il dì de Sense al jere ancje un marcadôr di pronostic atmosferic, cussì se al ploveve in chel dì al varès plot par 40 dîs. La crodince popolâr de societât agrarie e slargjave ae fieste de Sense cuasi la stesse sacralitât straordenarie tignude pal Nadâl e pe Pasche, propit parcè che ancje jê e marcave un leam diret jenfri cîl e tiere: un rapuart verticâl, spirituâl e cosmic. Fintremai tai agns Setante dal Nûfcent, ancje in Friûl tal lunis, martars e miercus prime de Sense (che e colave di joibe) si faseve la seconde rogazion. Di là de consacrazion de nature e des coltivazions peade al mont agrari e ai siei simbui, cheste cerimonie e veve la funzion sociâl di conferme de jurisdizion dal teritori eclesiastic. Lu dimostre ancjemò vuê la cerimonie sugjestive de “Bussade des Crôs” de Plêf di Zui, dulà che si dan cunvigne liturgjiche dutis lis 32 crôs des glesiis cjargnelis ator di chê de plêf mari di Sant Pieri. ❚
………………………………………………………..
FRIÛL CONTADIN. Lis voris dal mês di Mai
![](https://www.lapatriedalfriul.org/wp-content/uploads/2024/07/primo-sfalcio.jpg)
Il contadin al fâs la prime falcetade des jerbis di prât e al comence lis irorazions des vîts cul sulfât di ram, intant che une volte al dave la mangjative di fueis di morâr ai cavalîrs che si alimentavin su lis gridelis. In zovin di lune, lis feminis di famee a semenin lis ortaiis di produzion estive; salatis, indiviis, carotis, bledis, e in vecjo di lune a rimplantin ai, basili, savôrs, pomodoros, melanzanis, capûs, pevarons, selino, puar, cudumars, coçuts. In zardin si cambiin di vâs flôrs e plantis, si curin i tapêts di jerbe cu lis concimazions justis. In cantine si controle l’andament dai vins. La tradizion e calcole i formadis prodots intal mês di Mai (ma ancje di Jugn) i plui bogns e saurîts dal an, par vie che lis bestiis cumò a mangjin jerbis frescjis e sioris di flôrs profumâts che a trasmetin aromis delicâts e bonodôrs deliziôs al lat, ae spongje, ae scuete e ai formadis. ❚
………………………………………………………..
LA TRADIZION DAL MÊS. Calendis di Mai
![](https://www.lapatriedalfriul.org/wp-content/uploads/2024/07/germogli.jpg)
Il prin di Mai tant che divisori o liminâr stagjonâl, moment de liberazion plui evidente di energjie gjerminative de nature, metût jenfri l’ecuinozi de Vierte e il solstizi dal Istât. Za in antîc, chest moment dal cicli stagjonâl al vignive celebrât cun fiestis o rituâi “arboris”, che a esaltavin il sens sacri dal rapuart cu la nature. Cussì i romans a fasevin fieste pai Floralia e i Celtis a celebravin Beltane, invezit ancje di resint inte Europe centrâl e jere usance di fâ fieste ae nature in plen disvilup cul “Re o la Regjine di Mai” o cul “Zorç Vert”. Ancje in Friûl une volte si faseve grande fieste pal colm vigorôs de nature plantant il Mai te place dal paîs, fasint lis sgjarnetis e metint frascjis sverdeantis sui portâi des glesiis e des cjasis. La tradizion declinade tai ultins timps, che e rivà fintremai ai agns Sessante dal Nûfcent, e viodeve impegnats i zovins a fâ dispiets ai contadins e ai vielis, lant a cjoli intai curtîi e intes ariis argagns di vore e ingrumantju te plaçute dal paîs. Cussì a buinore su la place si cjatave une tasse di scjalârs, cjarugjei, vuarzinis, forcjonis e desenis di palis, ristiei, sapis, forcjis, falcets e ancje jubâi, laips, cuinçs, puartis e sierais. Ogni paron al veve di individuâ il so e par chest plui di cualchi volte e nasseve cualchi barufe. ❚