Sfuei Mensîl Furlan Indipendent
Archivi de Patrie

Il mont contadin dentri di nô

Dree Valcic
Une volte si arave cui bûs

✽✽ Si scomence a sintî odôr di Vierte, ancje se i cambiaments climatics nus fasin capî pôc di ce che al è daûr a sucedi aes stagjons. E chest al varès di fânus rifleti che ancje il futûr dal nestri Friûl nol podarà no tignînt cont, tal moment che al sarà di impuestâ un plan strategjic di curt e medi periodi. Pensait dome ae culture de blave, ancjemò prevalente intes nestris campagnis, che e sigure aromai une economie di sorevivence dome aes grandis superficiis, consumant tal stes timp une cuantitât di aghe disproporzionade a pet dai profits. Se dopo o fasìn riferiment ae viticulture, il discors al devente ancjemò plui complès: chi si scuintrin lis ipotesis di terens aromai destinâts dome al Prosec, lant daûr de mode dal moment e cun vuadagn imediât, cul colâ de imagjin de cualitât di dute la filiere, intant che la ecelence di “Un vigneto chiamato Friuli”, e no F-VJ, e scugnarà in curt fâ i conts cu lis variazions dal timp atmosferic, bon di ribaltâ cualitât e cuantitât de produzion. Un element critic che si zonte ae dificoltât indurante dal mont vitivinicul furlan di fâ scuadre, cence cedi ai riclams di Doc, Docg e Igt che a falsin la realtât e la storie dal nestri teritori.
✽✽ L’Istât passât, intant che o cjaminavi dongje For Disot, mi soi intopât intun piçul vignâl, dulà che su lis plantis a jerin picjâts cartoncins scrits par todesc. Curiôs, mi soi svicinât e o ai viodût che al jere un esperiment di une facoltât di agrarie austriache par cognossi il grât di adatabilitât dai rasiçs aes cuotis plui altis. No vuei gjavâ nuie ae nestre Facoltât di Agrarie, ai risultâts des sôs ricercjis. Anzit, al è un dai pôcs esemplis dal rapuart dal Ateneu cu lis esigjencis che par chês al è nassût. O vuei dome sotlineâ che dome cjalant bande il futûr, o sin vuê in stât di preparâlu.
✽✽ Cheste concezion e vâl par ogni setôr de vite coletive, no dome sul plan economic. Al tocje i aspiets de societât furlane e de sô volontât di continuâ a esisti tant che espression di valôrs fondants e ricognossibii.
✽✽ Tantis voltis si sin sintûts a dî che cu la muart de civiltât contadine ancje la stesse nestre concezion de vite e varès cedût il pas ae modernizazion, detade de industrie prime e de globalizazion dopo. In part al è vêr, e ce che al è restât di chê che e vignive clamade ativitât primarie al è sometût a un assalt continui de bande di une cjadene distributive che e scjafoie sedi il produtôr che il consumadôr.
✽✽ Ma podìno assisti impotents a chest maçalizi? No podìno pensâ che cierts sintiments di avualance e justizie, di disvilup e rispiet pal lavôr, a sedin dai popui par dirit e che no sedin, invezit, detâts dome di une epoche storiche?
✽✽ E se no sin plui un popul di contadins, nissun nus impedìs di agjî cu la savietât e la previdence di chês feminis e di chei oms che nus àn lassât chest Friûl maraveôs. ❚

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +