A Buie al jere une volte un mussut che al veve non Pierin. Fintremai di cuant che al jere ancjemò piçul, ducj si jerin inacuarzûts che Pierin al jere il plui sveât dai mus di chês bandis. Al veve propit i voi di inteligjent.
Une biele dì, Adrian, che al jere il so paroncin, al fasè une propueste al pari di Pierin:
“Meni, ce disaressistu tu se o provàs a domandâ ae mestre se e cjaparès a scuele to fi Pierin?”
“Vûstu menâmi pal boro? Cuant mai un mus isal lât a scuele?” al rispuindè secjât il pari.
Ma il frut al volè provâ a lâ a domandâ cheste robe ae mestre.
La mestre e jere une biele fantate a pene rivade in paîs, e la setemane di là e varès scomençât a fâ lis primis lezions aes frutinis e ai frutins dal lûc.
Cuant che e sintì la propueste di Adrian, e fo entusiaste:
“Ducj i fruts che lunis a jentraran pe prime volte in classe no savaran ni lei ni scrivi, compagn di Pierin. Inalore o scrupuli che ducj, a planc a planc, a impararan chel che jo ur insegnarai.”
◆ Cussì Pierin, cuntun biel flocut celest peât tal cuel, al fo compagnât a scuele di mame Palmire, e cuant che e sunà la campanele lui al le a sentâsi intal prin banc.
◆ Finide la prime zornade di lezion, Pierin al tornà su la culine indulà che al cjatà a spietâlu ducj chei altris mus.
“Pierin, dulà sêstu stât dute la matine? i domandà un di lôr.
“A scuele!” al rispuindè Pierin dut braurôs.
◆ “A scuele? Tu a scuele? Ma se tu sês un mus come nô e i mus no van a scuele!” a diserin ducj in côr.
Pierin al restà mortificât di chel acet e al sbassà il cjâf, ma subit al tornà a alçâlu e, cjalant in muse un par un i mus, ur disè:
“O viodarês che o impararai a lei!”
Ducj a derin une grande sbacanade e a lerin vie.
◆ La dì dopo e sucedè la stesse identiche robe.
A passarin i mês e al rivà l’Invier.
Pierin al jere stât ogni dì a scuele e al veve imparât a lei.
◆ La gnot di Nadâl, Pierin al fasè clamâ dongje ducj i mus dal borc e al tacà a lei un libri di bielis flabis furlanis.
◆ Di in chê volte, dutis lis seris i mus a van a sintî lis flabis letis dal brâf mussut Pierin. ❚
Il mussut inscuelât
Roberto Meroi