Interviste cun William Cisilino, diretôr de ARLeF, che di resint al à ricevût in Sardegne il premi “Ondras” pal so lavôr tal cjamp des lenghis minoritariis
O cognòs William Cisilino, diretôr de ARLeF (Agjenzie Regjonâl pe Lenghe Furlane) e ancje scritôr, di agnorums. Al è un amì. Lu dîs par meti lis mans indevant: impussibil par me fâi une interviste neutrâl, distacade. Ma, come che si dîs in Friûl, nol è mai un mâl che nol sedi un ben: magari a mi mi disarà alc di particolâr che no podarês lei di altris bandis. La “scuse” par sintîlu al è il premi che i àn dât a Cagliari, l’«Ondras»: un ricognossiment internazionâl par cui che si è impegnât in cjamp sociâl e politic pe promozion e pe valorizazion des lenghis minoritariis.
__
Ce studis âstu fat, e parcè ti sêstu interessât di furlan?
Prin di dut o ai di dî che o soi cressût intun ambient, fra i paîs di Talmassons e Pantianins, li che tancj di lôr mi àn trasmetût il valôr de lenghe furlane. Mê mari, prin di dut, ma po ancje cierts mestris, il diretôr dal côr, il predi… Tai agns 90 o soi vignût a savê dal Istitût ladin Furlan e o ai tacât a seguî chê realtât, metint in pratiche la passion pe lenghe che e jere nassude. Tal stes timp, o ai tacât i miei studis juridics te Universitât di Triest e duncje al è stât naturâl interessâmi de tutele legâl des lenghis minoritariis. Di professôr o ai vût Sergio Bertole, massim espert in chel cjamp, e o ai fat la tesi cun lui su la tutele de lenghe in Catalogne.
__
Cuâi sono stâts i tiei ispiradôrs, i tiei mestris?
A son tancj, sedi a nivel furlan che internazionâl: impussibil nomenâju ducj. Par chest, o citi un par ducj: Agnul di Spere (Angelo Pittana), un grant om di culture che o ai vude la fortune di incuintrâlu di zovin e che cun lui o ai vût une vere amicizie, a dispiet dai 40 agns di diference di etât. Lui al veve contats cun ducj i grancj de culture des minorancis, e mi à insegnât che la culture furlane no je seconde a di nissun. Lu à dimostrât ancje in pratiche, fasint tantis traduzions di poesie foreste bande il furlan. Mi à fat cognossi in profonditât lis tantis ricjecis de nestre leterature, une robe che une volte scuvierte ti incrès la tô cussience e no tu puedis plui tornâ indaûr.
__
Prime di vê un rûl istituzionâl tu âs lavorât simpri tal cjamp dal furlan su variis iniziativis; di cualis ti visistu cun plui nostalgjie e plasê?
Su dutis, mi visi cun plasê la creazion de riviste par fruts «Alc&Cè», che o pensi che tu ti visis ben ancje tu (al rît, ndr), stant che le vin fate insiemi. E je stade la prime iniziative editoriâl sistematiche fate pai plui piçui, editade da La Vite Catoliche. Li o ai vût mût di capî che o podevi organizâ un lavôr struturât, e o ai di dî che o vin vude la massime libertât di fâlu.
__
Cemût sêstu rivât ae direzion de ARLeF?
O soi rivât intal 2011, dopo che o jeri jentrât in Regjon. Ma prime o ai gust di ricuardâ un passaç impuartant. Tal 2001, par meti in vore la leç 482, Marzi Strassolt mi clamà in Provincie di Udin, che al jere President, a direzi l’ufici pes lenghis minoritariis. Lui al è une altre grande figure che par lui o ai un grant agrât, un om concret e che al crodeve une vore tai zovins. Li o ai tacât a imparâ a vê a ce fâ cu la burocrazie, fasintmi lis spalis plui largjis par chel che al è stât dopo.
__
In Otubar ti àn dât a Casteddu/Cagliari il premi “Ondras” pal lavôr e pai scrits fats tal cjamp des lenghis minoritariis. Tal spietavistu?
No, nol mal spietavi e adiriture o jeri imbaraçât di vê ricevût chest premi cun personaçs tant che Carles Duarte i Montserrat, che nol è dome un grant leterât e linguist catalan, ma che al è stât il principâl colaboradôr di Jordi Pujol, il leader protagonist de grande stagjon de cressite de Catalogne. E je stade premiade ancje Rut Bernardi, altre figure storiche in chest câs de culture ladine. O zonti ancje il grant plasê di vê ricevût chel premi de Sardegne, une tiere che par jê o ai un grant amôr, che e je pardabon une nazion che o speri che e rivi a esprimi dutis lis sôs potenzialitâts enormis.
__
Cemût isal il to lavôr te ARLeF, plui burocratic o plui creatîf?
Magari cussì no, cetant burocratic. E vie pai agns al è deventât simpri piês: si fâs fature a stâi daûr a normis e normutis che a vegnin fûr di continui. No dîs che la part burocratiche no à di jessi, ma al sarès ben une proporzion plui juste, un 25% dal lavôr. Cumò o stimi che o sin al contrari, cul 75% dal timp che si scuen impleâ a “fâ cjartis”. Un vêr pecjât parcè che al ralente la machine, sedi par nô che pes associazions e pai sogjets che a elaborin i progjets, che a àn di ocupâ masse timp su di chest aspiet.
__
Disimi un progjet de ARLeF che al è lât ben in mût particolâr, e un che tu ti spietavis che al les miôr.
Come sucès mi ven subit iniment «YoupalTubo». O vin coinvolzût un grup di zovins sui vincj agns par fâi fâ videos di meti su You Tube. O vin fat un apel e a son vignûts dongje in tancj di lôr, no mi spietavi une partecipazion cussì. Ju vin lassâts libars di esprimisi e i contignûts a son vignûts fûr cetant biei, doprant il lôr furlan, di chel ocidentâl al cjargnel, passant par chel centrâl. Un grant sucès: o vin a pene passât il milion di visualizazions e o sin partîts in Zenâr. Une robe che invezit no vin rivât ancjemò a fâ ben avonde al è coinvolzi i zovins de fasse 13-18 agns. Cui fruts e cui zovins plui grancj i risultâts ju vin vûts. L’obietîf al è cjatâ alc di valevul par chê fasse tal mieç.
__
Aromai di agns tu sês ancje scritôr, par cumò di “pinsîrs” ironics. Âstu tal cjâf ancje alc di plui lunc?
Mi plasarès sì fâ alc di plui lunc e plui seri, simpri cul mani lizêr che mi parten di plui. No stoi fevelant di libris tecnics su la lenghe, che o ’nd ai fats, ma alc sul Friûl di vuê e di doman. Ma par scrivi i vûl timp…
__
Il linguist Sandri Carrozzo al dîs che si sta fasint une politiche di “muart cuiete de lenghe”. Si dâi impuartance, bêçs, ma mai alc di decisîf. Isal cussì? E parcè la leç 482 su lis lenghis minoritariis no ise ancjemò in vore ad implen?
Dutis lis lenghis, ancje chês cun plui numars, a son destinadis a murî, o a trasformâsi intune altre robe. Al è il procès de vite. Dit chest, il procès si pues condizionâlu in positîf. La 482 no je operative ad implen parcè che i procès ju gjestìs la politiche e duncje a dipendin di cui che la int e decît che al meni il cjaruç. Ma nol è di butâsi jù parcè che no si pues mai savê lis evoluzions de storie. Se o pensìn al 1960, confrontant la situazion di Friûl, Catalogne e Paîs Bascs, cui mai podevial imagjinâ la evoluzion che a àn vût Catalan e Basc in dì di vuê? In chei agns, il Basc al jere in pratiche muart, lu fevelavin dome i vecjos; cumò lu fevele il 95% dai zovins, e i plui anzians, cressûts sot Franco, di mancul. Nô vuê o sin indaûr rispiet a lôr, ma impen di une muart cuiete jo o viôt tai agns che e je stade une progression dal pont di viste normatîf, finanziari e sociâl. Isal avonde? No, ma o sin miôr di prime. Vuê no podìn savê cemût che e larà a finîle: in cheste bataie nô o vin il compit di tignî la bandiere dal furlan alte, cussients di no vê nuie mancul di chei altris, ancje se ducj nus train cuintri.
__
Ponts di fuarce e ponts debii de lenghe furlane tal Friûl di vuê. E cemût viodistu il futûr di cheste lenghe?
Pont di fuarce, plui cussience de lenghe che si veve agns fa e vê rivât adore a otignî i imprescj legjislatîfs e tecnics par lavorâ. Pont debil, i gjenitôrs no trasmetin il furlan ai fîs. Lis nestris stimis a disin che tra lis fameis di gjenitôrs che a fevelin par furlan, dome il 25% lu trasmet ai fîs. Se dongje di chest tu metis che il Friûl al patìs une grande denatalitât, o vin di vê plui di cualchi preocupazion sul avignî de lenghe. E coventarès une formazion de int, rivâ a fâi capî il valôr de lenghe, ma chest al è un percors sociâl lunc. Intant o podìn dome tignî bot cun braùre e lavorâi parsore cun serietât.
__
Ce i coventaressial al furlan par dâi un svolt ae sô cundizion? Ancje un sium…
La robe che e podarès dâ un svolt e sarès che la Regjon e vedi la competence primarie su la scuele. Che no sai se si rivarà a vêle mai, duncje si pues propit fevelâ di sium, magari cussì no.
Chel ti permetarès di gjestî lis robis in maniere plui svelte. Il biel progjet di scuele in cuatri lenghis di Tarvis e Valcjanâl al à scugnût spietâ agns prime di vê un decret ministeriâl par fâlu bon. Cu la competence direte, cun di plui, si podaressin ancje istituî figuris professionâls gnovis tant che il docent di furlan, che cumò nol esist ❚
…………………………………………………………………..
FOCUS. Il Premi Ondras
Chest al è il prin an che al ven inmaneât il premi Ondras. “Ondra” al è un tiermin dal sart leterari che al vûl dî “onôr”, “ricognossiment”, “svant” intal sens de assegnazion di cualitât a une persone o a une robe. Al è organizât di ACLI Sardegna cu la poie di Fondazione Sardegna. ❚
