✽✽ O ai decidût di scrivi cheste note, cuant che ancjemò no si san i risultâts des elezions. Lu fâs no parcè che no sedi convint che la vitorie di une o di chê altre formazion, Fedriga o Moretuzzo, no compuarti diferencis politichis sostanziâls intes sieltis dal guvier regjonâl, ma parcè che o crôt che il destin di un popul, e di chel furlan tal specific, al vadi di là dal moment contingjent e ancje des istituzions che, plui o mancul, lu rapresentin.
Chest vuelial dî no calcolâ trop impuartant che al sedi cemût che une zonte di centridiestre e une di centriçampe a pensin di frontâ i problemis enormis che in chest specific moment storic a aflizin cheste tiere? Lafè no!
✽✽ Dineâ il pericul ambientâl o calcolâlu tant che une emergjence temporanie e no invezit come un teme strategjic, frontâ il teme de imigrazion cence peâlu a chel de denatalitât, ignorâ il stât che e je vuê la nestre sanitât, une volte ai vertiçs de ecelence taliane: tancj a podaressin jessi i esemplis di puartâ par indicâ cualchi cuistion di frontâ daurman, dant rispuestis concretis che a tornin fiducie a la int.
✽✽ E varès di jessi cheste la disposizion e la pratiche che a son daûr di une Regjon a statût speciâl par cemût che le vin intindude fin a plui o mancul vincj agns indaûr, cuant che la motivazion condividude e jere chê di “fâ daurman e miôr” a pet di Rome, dal stât centrâl.
✽✽ Cheste motivazion si è pierdude intai meandris di Triest, intant che a tornin sù lis fantasimis de macroregjon, e il Triveneto al è pront a tornâ a comparî, ricuardantnus lis cuviertinis dai cuaders di scuele di cincuante agns indaûr.
✽✽ Duncje al è sacrisant che si continui a stâ daûr cu la massime atenzion critiche a chel che si decît, a cualis leçs, a cualis struturis che la Regjon e vûl puartâ indenant in chest gnûf mandât.
✽✽ Ma cence la cussience di cui che o sin, di dulà che o vignìn, insume, e di dulà che o volìn lâ, no sarìn nancje in stât di oponisi a cui che al calcole cheste tiere a Nordest dome un plastic par zuiâ di soldaduts, un camarin dulà che si tratin afârs, une vacje di molzi. ❚