Antoni Zuan Sticotti (Parîs – Prussie 1772), fi di Fabio, un cjargnel di Damâr, al è nassût di une famee di atôrs e di teatrants che a ziravin dute la Europe. Compositôr di tragjediis e di comediis, al tacà a fâsi cognossi a partî dal 1729, l’an dal so debut. Une vore preseât tant che tradutôr e critic leterari, al à firmât un lavôr une vore impuartant pe storie de dramaturgjie europeane, ven a stâi L’art du théâtre, publicât a Berlin intal 1760. La sô notorietât in France e fo grande massime par vê inventade, insiemi cun so pari, la mascare dal Pierrot come che si le cognòs in dì di vuê: malinconiche, palide, amante de gnot e de lune, tant che la sô figure e je la protagoniste di une colezion di pituris ore presint conservadis inte biele biblioteche da la Opéra di Parîs. ❚
✒ Agnul Floramo