Ve ce che al dîs su la agheculture
e su lis emergjencis futuris in Friûl-VJ
Vie pal mês di Zenâr stât, il Ministeri dal Ambient e de Sigurece Energjetiche al à publicât il Plan nazionâl di adatament ai cambiaments climatics (Pnacc), spietât di plui di sîs agns. Ve ce che al dîs su lis problematichis de agheculture di vuê e dal avignî.
◆ La agheculture e à une relazion strente cui ambients e cui ecosistemis des aghis internis, di transizion e chês marinis e e je calcolade tra i setôrs socioeconomics che al pues patî di plui i cambiaments climatics. Valutâ i impats di chescj cambiaments al è complicât par vie de diversitât dai sistemis produtîfs, des tecnologjiis, des speciis e de localizazion gjeografiche, des carateristichis ambientâls dal teritori, e des pussibilis cumbinazions di plui fatôrs di impat. Altris fatôrs socioeconomics, demografics, tecnologjics e aministratîfs a puedin vê interazions cul clime e vê un pês tai impats sul ambient e duncje su la sostignibilitât de agheculture. Lis strategjiis di cumò e lis normativis ambientâls a nivel comunitari e statâl in cont dal adatament ai cambiaments climatics, de planificazion spaziâl maritime, de transizion verde e de blue economy, a promovin il disvilup de agheculture inte aree dal Mediterani e la valutazion atente dai efiets che i cambiaments climatics a puedin vê sul disvilup dal setôr. Intal 2020 la agheculture e à pesât pal 50% sul setôr itic intal Stât talian, cuntun volum di produzion di 122.760 t, e di chestis 74.990 t di moluscs (61%) e 47.770 t di pes (39%), par un valôr complessîf di 392 milions di euros.
◆ L’arlevament di pes e di moluscs in Italie al è une vore inlidrisât intai teritoris e inte tradizion, e in cualchi regjon a ocupin e a produsin redit in misure impuartante pes comunitâts costieris e rurâls. Cinc regjons (Venit, Emilie-Romagne, Friûl-VJ, Pulie e Sardegne) a àn il 71% dai implants di agheculture; Emilie-Romagne, Venit e Friûl-VJ a son i lûcs principâi pe produzion e adun cu lis Marcjis e la Toscane a rapresentin il 69% de produzion taliane. De analisi setoriâl, l’arlevament di moluscs al pâr il sotinsiemi plui vulnerabil, stant che al patìs un numar plui alt di pressions e impats. Cheste criticitât e je leade al fat che la plui part dai implants e dai volums di produzion a son concentrâts, par vocazion naturâl, su la cueste e intes lagunis dal Mâr Adriatic: areis che a sintin une vore i cambiaments climatics.
◆ Chestis modificazions dal clime a podaran tocjâ plui aspiets dal arlevament di moluscs, tant che: 1) riduzion de rese des speciis arlevadis; 2) cambiaments intal cicli riprodutîf des speciis, cun riduzion dal furniment naturâl e de disponibilitât di semence; 3) cundizions di tension, malatiis e mortalitât pes cundizions ambientâls mudadis e/o ladis in piês; 4) episodis di contaminazion peadis ae cualitât des aghis; 5) dams aes infrastruturis e pierdite di materiâl biologjic par colpe di events meteomarins estrems.
◆ Di là dal arlevament di moluscs, ancje la pissiculture estensive e je un compart vulnerabil ai cambiaments climatics. Cheste forme di arlevament tradizionâl e je fate in vals di pescje e lagunis, lûcs che a patissin in maniere particolâr la cressite dal nivel dal mâr, lis ondadis di calôr o di frêt e lis cundizions di tension idriche. Pe pissiculture marine, in particolâr se logade in areis al larc, l’impat plui fuart al sarà dât de frecuence simpri plui alte di events meteorologjics e marins estrems. La pissiculture di aghe dolce, in particolâr chê de trute, disvilupade soredut in Venit e in Friûl-VJ, e je un compart produtîf impuartant (33.774 t), che al patìs une vore i impats dai cambiaments climatics, tant che l’alçâsi de temperadure e la riduzion de cuantitât e de cualitât des aghis a disposizion pai implants di arlevament, cun consecuencis su lis prestazions produtivis e su la salût des speciis arlevadis. Cun di plui, se o confrontìn la agheculture cun altris sistemis di produzion alimentâr, e je caraterizade di une “olme ecologjiche” mancul fuarte, stant che e mande fûr mancul emissions di gas responsabii dal efiet sidrere, che par solit a son peâts ae produzion des pasturis e al consum di energjie eletriche. L’arlevament di moluscs, in particolâr, al furnìs tancj servizis ecosistemics di control e di regolazion, par esempli al gjave carboni dal ambient, morestant i impats des emissions. Cundut che lis cognossincis che o vin in cont dai impats dai cambiaments climatics su lis ativitâts di agheculture a permetin di fâ ciertis previsions e valutazions sui efiets pussibii su la fisiologjie des speciis arlevadis, su la disponibilitât di sîts bogns pal arlevament, sui pericui pe salût animâl e publiche e su la sostignibilitât economiche dal compart, al è une prioritât implementâ lis cognossincis che o vin in cont de vulnerabilitât de agheculture ai cambiaments climatics previodûts e za rivâts.
◆ Si scuen cognossi in maniere plui puntuâl e tal detai i efiets di chestis modificazions dal clime su lis diviersis speciis arlevadis (biologjie, ecologjie, gjenetiche e salût), midiant di provis sperimentâls, cul disvilup di modei di prevision e di indicadôrs specifics; su la pussibilitât di selezionâ speciis/varietâts gjenetichis che a tolerin miôr lis cundizions puartadis dai cambiaments climatics. Midiant de analisi dal pericul, si scuen ancje disvilupâ metodis pe analisi de vulnerabilitât dai diviers sistemis produtîfs presint intal Stât talian. Cun di plui, al covente implementâ i sistemis di monitorament ancje doprant i dâts satelitârs e i sistemis di racuelte dai dâts che a tocjin lis carateristichis fisicochimichis e biologjichis dai cuarps idrics. ❚
