Sfuei Mensîl Furlan Indipendent
Archivi de Patrie

Il Retôr si smentee de cuistion furlane cun le ministre, e sì che al veve dome di fâ il postin…

............

Juste 40 agns indaûr, il prin di Dicembar dal 1975, e je stade depositade te Cancelarie de Cort di Cassazion a Rome la propueste di leç di iniziative popolâr che e domandave di fâ nassi ancje in Friûl la Universitât, e che e varès cjapât sù 125 mil firmis. Une mobilitazion di no crodi: ma 40 agns dopo, ce restial di chel sium di un sfrancjament culturâl de nestre int? Chei che le àn domandade e otignude a pensavin ae Universitât di Udin tant che a une palestre di cressite pai nestris zovins, une farie di ideis pe nestre tiere, un templi dal savê che al metès dongje la dimension internazionâl cu la custodie de nestre identitât storiche e culturâl. A volevin insome, “une Universitât che si bat pal Friûl”: invezit a àn otignût “un ateneu che si sbat dal Friûl”. Al pont che – lu à dit un dai pôcs professôrs furlaniscj restâts, Sandro Fabbro, intune cunvigne di resint – se si gjavàs l’articul costitutîf de Universitât che al fevele in maniere esplicite dal leam di cheste istituzion cul teritori, pe plui part i docents no bataressin voli, e tancj a saressin fintremai contents.
OCASION PIERDUDE
Une des situazions plui adatis a dineâ cheste acuse e sarès stade la cunvigne che a Otubar il Pd al à organizât a Udin e che e à riclamât chenti ancje la ministre Stefania Giannini. Tantis polemichis a son vignudis fûr par vie dal fat che la politiche no jentre dispès intune istituzion che e varès di mantignîsi libare e pluraliste, cence fâsi doprâ di chest o di chel schiriament politic. E cussì, un trop di “furlaniscj” (cussì il “Messaggero Veneto” al clame chei che a disin e a fasin alc a pro de nestre tiere) al à decidût di pandi il so marum cuntune manifestazion che e veve la ambizion di contestâ il retôr Alberto Felice De Toni pe sô sielte di “vendi” l’ateneu al Pd talian. Pûr rispietant la lôr opinion, forsit la polemiche di fâ in chest câs e sarès stade une altre. Ciert, resons di elegance e di oportunitât a varessin conseât di no vierzi in gran pompe la Universitât ae fieste di un singul partît. Ma ae fin, cun chê di miorâ la Universitât e dâ gnovis oportunitâts ai furlans, si podarès gloti chest e altri. Il probleme invezit al è une vore plui concret. E al rivuarde problemis che nissun, nancje chei che a manifestavin di fûr dal Toppo Wassermann, al à denunziât, ven a stâi la disparitât in tiermins di finanziaments dal sisteme de cognossince in Friûl rispiet a chel di Triest, e soredut il fat che za di trê agns il nestri ateneu nol pues plui previodi  ad implen une didatiche e la formazion dai insegnants in marilenghe.
UN POSTIN PÔC FURLAN
Chestis a saressin stadis robis che il retôr al varès vût di discuti cul ministri par vê dutis lis garanziis che pe nestre universitât a saran i imprescj finanziaris e normatîfs par lâ indevant a fâ simpri miôr un lavôr complès ma necessari. Ven a stâi, produsi une classe dirigjente che no sedi furlane dome par câs, ma par cussience e braùre. Nol risulte che il retôr al vedi frontât cu la Giannini nancje une des dôs tematichis, ancje se i ben informâts a disin che su la cuistion dal furlan nol varès vût di fâ nuie di plui che consegnâ ae ministre une letare za prontade di Arlef e Regjon, che e sclarive ben ce che al covente fâ par risolvi il probleme. Ma il retôr come postin nol à funzionât: e la letare in man ae Giannini no je mai rivade. Si viôt che in chê dì De Toni al jere Felice, ma no furlan. Se no, si sarès inacuart di vê un lavôr di puartâ indevant fin insom. E in che volte i “furlaniscj”, ma ancje ducj i furlans, no varessin vût nuie ce dî. ❚
Redazion

Contile juste / Plebissît pustiç

Diego Navarria
“MMandi, nono.” “Mandi frut!” “Dai mo, nono, no soi un frut. O ai disenûf agns e o ai pene finît il liceu!” “Par me tu sarâs simpri un frut, il prin nevôt. Però e je vere, tu sês deventât grant, une anime lungje. Se tu cressis ancjemò tu varâs di sbassâti par jentrâ in cjase, […] lei di plui +

Presentazion / Presentazion dal libri “Fûc su Gurize”. Intal ambit dal Cors Pratic di Lenghe e Culture Furlane inmaneâtde Societât Filologjiche Furlane

Redazion
Joibe ai 17 di Avrîl dal 2025 aes sîs e mieze sore sere (18.30)SALE CONFERENCIS DE BIBLIOTECHE COMUNÂLVie Rome 10, Vile di Ruvigne / Via Roma 10, S.Giacomo di Ragogna A intervegnin: DIEGO NAVARRIA colaboradôr dal mensîl ‘La Patrie dal Friûl’e DREE ANDREA VALCIC president de Clape di Culture ‘Patrie dal Friûl’Jentrade libare lei di plui +

L’EDITORIÂL / La lezion de bandiere par dismovisi dal letarc

Walter Tomada
Par sigûr o sin stâts ducj braurôs cuant e je rivade in television la storie, discognossude a tancj furlans, di Marc di Murùs (o Moruç?), ultin a rindisi ae concuiste venite dal 1420. Pûr di no dineâ la sô apartignince ae Patrie dal Friûl, lui – che al puartave la bandiere dal Stât patriarcjâl – […] lei di plui +

La piçade / Fevelìn di autonomie pluio mancul diferenziade

Mastiefumate
In Italie si torne a fevelâ di autonomie. Magari par dâi cuintri, ma si torne a discuti. La Lega cu la propueste di leç su la autonomie diferenziade e torne a metile in cuistion. Dopo la Secession de Padanie, la Devoluzion, la Gjestion des Regjons dal Nord, dutis cuistions ladis in malore, cumò Calderoli al […] lei di plui +