La istituzion benefiche e à dât acet,
mantignût e dade la oportunitât
di studiâ a tancj zovins furlans
Al jere un toc che lu cjalave, a ogni voltade di pagjine dal Messaggero, sentât te sale di aspiet. Al jere sigûr di cognossilu, chel om, ma no si visave cui che al podeve jessi. Vigji al jere rivât tal Distret di vie Sant Valantin aes vot e mieze par fâ il duplicât de tessare sanitarie che le veve pierdude. “Pierdude no – al pense Vigji – jo no ai mai pierdût nuie. Le ai dade ae femine par lâ in farmacie… e vie jê!” L’ufici al vierzeve aes nûf ma, si sa po, i pensionâts no àn timp di pierdi in code e alore al jere rivât miezore adore par jessi il prin. Invezit al veve cjatât chel om, rivât prime di lui, sigûr un pensionât plui navigât. Vigji a ogni cjalade al cirive un particolâr: sù par jù la sô etât, vistût benut, coçon, une nape za viodude. I voi al cirive di sghindâju par no fâi capî che al jere daûr a stazâlu.
◆ Biadelore, cinc minûts prime, parcè che e cognosseve i siei poleçs, e rive la impleade. “Cui isal il prin?” e dîs chê. “Jo – al fas chel om – o soi tornât de Americhe e o ai di fâ la tessare sanitarie.” “Cemût si clamial, siôr?” “Driussi Antonio, nassût a Udin ai 3 di Lui dal 1939.” “Tonin Driùs!! – al salte sù de cjadree Vigji e i va dongje – ve ca cui che tu sês! O jerin ducj i doi tal Renati. Ti visistu di me?” “Tal Renati? – al fâs Tonin, scrusignantlu ben – Ma sì, tu sês Vigjut poleç!” e al slargje i braç e i da une strente fuarte. “Poleç al jere il sorenon che mi davin in chê volte – al precise Vigji un tic sustât – o soi Luigi Gallo di Sclaunic.” “Scuse, a son passâts plui di 40 agns.” “Di nuie. Ma dulà jeristu lât? Dopo dal Renati no ti ai mai plui viodût. Contimi!” “Fers alì! – e çoncje il discors la impleade – Al è propit biel che si sedis cjatâts, ma prime fasìn lis tessaris e dopo o podês fevelâ trop che o volês.” “Juste – al dîs Tonin –fasìn ce che o vin di fâ cence fâi pierdi timp ae signorine, e dopo si cjatìn te Ostarie dal Trombon, in Praclûs, che a àn un bon blanc. Vaial ben?” “Benon! Va indenant e spietimi, eh!”
◆ “Bon chel blanc, achì, Tonin, fresc e profumât.” “Tocai dal Cuei. L’ostîr al è babio e al sa il so fat, Vigjut. Ma contimi di te.” “Ce vûstu, o soi avocat, o soi simpri restât a Udin. Cumò in pension, ancje se o voi un pôc tal studi di gno fi, ancje lui avocat. Dut ben, no mi mancje nuie e, ringraciant il Signôr, o ai salût. E tu? Jeristu in Americhe? Contimi, dai.” “Dopo de lauree a Padue o ai vinçût un puest di chirurc a Boston. O ai studiât une vore e o soi deventât un neurochirurc innomenât. Di ducj i States a vignivin a fâsi operâ di me. O ai lavorât un grum e fat i bêçs. Fin che o lavoravi cence padin il timp mi è svolât. Lât in pension, o ai tacât a pensâ simpri di plui al Friûl, al mût di vivi furlan, tant diferent di chel dal Massachusetts. Mi mancjave e, dopo 42 agns, o ai decidût di tornâ. Par me il timp plui biel al è stât cuant che o jerin tal Renati. Nus clamavin “renatins”, ce biei agns…” “Chê po no! – lu ferme Vigji – Chê e jere une preson, vistûts cun chê monture di bechins, sierâts e obleât a fâ dut a timp di campanele. Par me il plui brut timp de mê vite. Renatin la pote!” “Ma Vigjut, ce dîstu? Mi displâs. O jerin fantats, zovins, plens di snait, o studiavin e o zuiavin.” “Tu disis just, Tonin. O jerin zovins e chel ti fâs viodi dut biel. Ma o varessin podût studiâ e zuiâ ancje fûr dal coleç, libars, cence dutis chês regulis fûr dal vade!” Un moment di cidin e … “Vigjut, tu tu jeris fi di un avocat di Mortean. No sai parcè che tu jeris in coleç. Ma jo – la vôs di Tonin si ingrope – o jeri vuarfin di mari e di pari. I miei barbis no podevin tignîmi e fâmi studiâ, e il Renati mi à dât acet, mantignût e mi à dade la oportunitât di studiâ. Se o soi rivât insom de cariere di miedi e o ai fate fortune al è dome parcè che Filippo Renati al à implantât chel istitût. Po dopo, lis regulis a scugnivin jessi. Ce saressial stât il Renati cence regulis? Un casin!” “Mi displâs, Tonin, ma no soi cun te. O ai vût plasê di cjatâti ma cumò o scuen lâ. Mandi.” “Un moment, Vigjut. No stin lassâsi mâl. No stin a butâ vie cheste ocasion che nus à capitade vuê. Prove a pensâi parsore ma imprometimi che doman aes dîs, dopo che tu âs ritirade la tessare sanitarie, o tornìn a cjatâsi achì dal Trombon. Vuê o pai jo il zîr, doman ti tocje a ti.” “Va ben, a doman.” Al siere Vigji, pôc convint.
◆ Tal doman Vigji, cun muse serene, al rive puntuâl te ostarie. “Bundì Tonin e scusimi pe cuistion di îr.” “Bundì Vigjut, sentiti.” “Intant o ai gust di tornâ a cjatâti parcè che o vin une vore di robis di contâsi – al tache Vigji – e dopo o ai di ringraciâti parcè che, cuant che tu âs dit che no tu savevis parcè che o jeri tal istitût, tu mi âs fat pensâ parsore ae mê vite di renatin.” “E ce âstu resonât?” “O vevi simpri pensât che gno pari al ves falât a metimi tal Renati, par vie de vite di coleç che o crodevi inutile. Par chel o vevi dute chê rabie pe vite sierade, regolade, lontan de famee” “E invezit?” “Invezit gno pari al veve fat ben. O vevi pussibilitâts, ma no jeri salt tal studi e lui si jere inacuart. Il Renati mi à insegnât l’ordin tal ritmi di vore e di studi, a doprâ ben il gno timp, a jessi puntuâl, come vuê ta chest apontament. Cence il Renati no sarès rivât a diplomâmi tal Stellini e no sarès avocat.” “A jerin regulis duris – al zonte Tonin – ma e jere une dissipline che ti faseve ancje cressi. Tu preseavis la libertât dal zûc, fâ cualchi piçule ribelion, criticâ lis punizions no justis, ma tu imparavis ancje a muarditi la lenghe. O sai che tancj come te, dopo, a àn refudât chê vite. Ma par tancj, il timp dal Renati al è stât come la naie pai Alpins: vê un spirt di cuarp, di apartignince, ancje in dì di vuê, chel che ti fâs renatin.” “O soi rivât dome cumò di vecjo – al marche Vigji cu la tace in man – a capî che o ai ringraciâ chel grant om di Filippo Renati. Recuie. E vive!” ❚
::::::::::::::::::::::::::::::::::::::::::::::::::::::::::::::::::::::::::::::::::
Une ereditât che e dure di passe 250 agns
David Pincherle al nas a Ontagnan di Gonârs ai 11 di Dicembar dal 1705 di gjenitôrs ebreus. Cundut che so pari al è il rabin de comunitât, si svicine ae religjon catoliche. A 26 agns al bandone la famee, al va a stâ a Udin, e tal 1732 al ven batiât tal domo di Udin cul non di Giuseppe Filippo Renati. Il non Filippo in omaç ai Filipins di S. Filippo Neri e il gnûf cognon par aludi ae sô rinassite spirituâl. Al fâs ativitât marcantîl e al aministre i bens di fameis sioris. Ingrumât un patrimoni, tal 1735 al jentre te Congregazion dai Filipins, tant che frari laic. Si dediche ae gjestion juridiche e economiche dal Oratori dai Filipins di Udin, formât di nobii o siôrs, impegnâts massime te educazion dai zovins. Ma Renati al cîr une forme di caritât plui fuarte e al tache a bacilâ par implantâ une “Cjase di Caritât” par dâ acet ai vuarfins e ai fruts puars. La Cjase e devente realtât tal 1761 cuant che, doprant ducj i siei bens, al tache a tirâ sù l’istitût che ancjemò al esist in vie Tomadini. I Filipins, cussì aristocratics, no aprovin cheste imprese di caritât pai masse puars e pai ultins, e lu butin fûr de Congregazion. Fra Filippo, ancje se displasût, al va indenant dret pe sô strade. Insiemi cu lis muiniis Rosariis, che a abadin ae sezion feminîl, la opare dal Renati e va indevant e e devente une des primis e plui impuartantis struturis di assistence pardabon publiche, parcè che il fondadôr al lee la gjestion future no ae glesie ma ae citât di Udin. Di chê volte, miârs di fruts, fantats e fantatis, zovins e zovinis a son jentrâts pe puarte dal Renati e jessûts par frontâ la vite.
◆ Figure straordenarie di filantrop, Filippo Renati al dediche la sô robe e la sô vite a cheste istituzion laiche che, di plui di 250 agns, e je indreçade a dâ acet, judâ e educâ. Al è une vore moderni pe sô grande atenzion ae inclusion sociâl di chei che a saressin stâts emargjinâts, e pe sô vocazion a proferî educazion tant che riscat sociâl.
◆ Al mûr ai 25 di Novembar dal 1767 e al è soterât te glesie de Madone de Misericordie, tal mieç dal Istitût “Filippo Renati”. ❚
