Novembar, il mês de fumate

Novembar al scomence cui Sants e al va indevant cui Muarts, che a son dome sants che no àn rivât a jessi avonde famôs par vê une dì di fieste dute par lôr.
Di buinore e je fumate, di dì al è frêt, i arbui a àn bielzà molât jù lis fueis, duncje invezit des bielis sfumaduris di ros, zâl e maron sui ramaçs, si viodin dome cuatri stecs, e par tiere un tapêt di fueis miezis fraidis che a tegnin dome umiditât. Lis zornadis a son tant curtis che cuant che al jeve il soreli al torne jù disint “o stavi scherçant”.
Cualchi volte al nevee su pes monts, ma al covente dome par fâ vignî gole, parcè che i implants di schi a son ancjemò sierâts.
Cemût si fasial a cjatâ alc di biel intun mês dal gjenar?
Nuie pôre, il furlan à simpri la soluzion: in Novembar si purcite!
I sants dal mês
◆ Ai 3 di Novembar, Sant Just martar, protetôr di Triest, che si è fat copâ ai 2 di Novembar par slungjâ la fieste ai triestins. Ma chei, stant che si podeve fa puint e slungjâle ancjemò di une dì, lu àn metût tal calendari te dì dopo.
◆ Ai 30 di Novembar, si festeze Sant Andree ma soredut, Sant Purcit su la bree.
Tra i sants minôrs ricuardâts inte stesse dì, ancje San Ganel, parint stret dal purcit.
Personaçs nassûts in Novembar
◆ Ai 22 di Novembar dal 1789, al nasseve Jacopo Pirona, abât famôs par vê scrit il prin vocabolari di furlan de storie. La decision di meti man a une opare tant grande i jere vignude dopo che al veve provât a spiegâ a un talian la diference tra “po sì po” e “po no po”.
◆ Simpri ai 22 di Novembar, ma dal 1916, al nasseve David Maria Turoldo, religjôs, teolic, poete, scritôr e, cuant che coventave, ancje fari e marangon, che un mistîr in Friûl tocje vêlu.
Une des sôs oparis plui famosis e je dal sigûr il cine “I Ultins”, ispirât al puest in classifiche dal Udin.
Il campion sportîf dal mês
Gusto Sbrovedêts, che al è rivât a scussâ un scartòs intîr di cjastinis cence poiâ jù la tace dal vin brulè.
Il segn zodiacâl dal mês
La fumate
Il sport dal mês
La corse cui reumatics
Il nemâl dal mês
La mufe ❚