Di Cormons ae Svuizare par inviâ une analisi dai modei di disvilup che a tegnin cont de transizion ecologjiche
«Ognidune e ognidun di nô al pues sielzi, vuê, une alternative sostignibile par garantî un mont plui ospitâl doman». Di chest e je convinte Alessandra Motz, economiste, cormonese di origjine, che e vîf a Lugano li che e lavore come ricercjadore te Universitât de Svuizare taliane. E par chest si impegne cun passion, determinazion e sens di responsabilitât che al ven des sôs lidrîs furlanis.
◆ Di passe 20 agns e studie temis leâts ai marcjâts de energjie, ae sostignibilitât ambientâl, al cambiament climatic. Si è ocupade di marcjâts dal gas e de eletricitât, di politichis energjetichis e ambientâls, e, plui di resint, dal pont di viste di citadinis, citadins e impresis svuizars sul consum di energjie bande un futûr a emissions bassis.
◆ «Capî ce che a pensin lis personis e lis comunitâts al è fondamentâl te direzion di une realizazion plene de transizion ecologjiche, par che e sedi acetade e no imponude – e spieghe Alessandra -. Bisugne educâ a chest passaç, informâ e coinvolzi lis comunitâts inviant percors di partecipazion civiche, permetiur di acuisî cognossincis e competencis par fâ sieltis cussientis».
◆ Te Universitât de Svuizare taliane, intun Paîs cuntune fuarte componente di democrazie direte, Alessandra e à indreçât la sô ricercje tal analizâ, midiant modei statistics di pueste, ce che lis personis a àn miôr di doprâ tra diviersis fonts di energjie, cuntune particolâr atenzion a chês rinovabilis. I dâts a vegnin cjapâts sù cun cuistionaris; a permetin di capî sedi cualis carateristichis di un prodot o progjet a son plui o mancul preseadis des personis, sedi lis componentis (psicologjichis, demografichis, di apartignince a un grup di opinion…) che a determinin lis preferencis. «Daûr des analisis fatis, o vin viodût che i mascjos a àn plui facilitât a provâ lis gnovis tecnologjiis, tant che lis machinis eletrichis; lis feminis, invezit, a àn une sensibilitât ambientâl plui fuarte, a son plui puartadis a compuartaments responsabii».
◆ Sul troi dal so filon di studi, la ricercjadore furlane e je une vore interessade a rivâ adore a capî l’impat de transizion ecologjiche sul paisaç e, di conseguence, sul benstâ des comunitâts e su cemût orientâ il svilup economic di une tiere. «La direzion plui savie e je chê di pensâ une vore prime di fâ alc e, duncje, imbastî modalitâts di azion conseguentis. Par esempli, cuant che si àn di instalâ implants fotovoltaics al è ben no consumâ tiere libare ni tocjâ il paisaç, ma doprâ cuvierts, parcaments, capanons, façadis. Personis e impresis – se informadis e coinvolzudis – no si metaran cuintri e, anzit, a judaran il procès di cambiament. I vûl timp, ma no si pues fâ diferent. La politiche e à di lavorâ ta chest sens».
◆ Par sostignî la transizion verde, Alessandra e partecipe aes iniziativis di divulgazion puartadis indevant dal so ateneu, ma no dome. Pôcs agns indaûr e à viert il blog “L’opzione verde” ben savint che par fâ sieltis sostignibilis bisugne disponi di une informazion di cualitât, imparâ a fâsi domandis e a cirî lis rispuestis. «Masse dispès, sul web e sui gjornâi, i fats a son sostituîts des opinions – e dîs -. O crôt che dutis e ducj nô o vin il dirit e la capacitât di comprindi lis conseguencis des nestris sieltis e la complessitât des sfidis che nus spietin. Cul gno blog o cîr di judâ a capî miôr i problemis ambientâls e energjetics».
◆ L’interès pes tematichis ambientâls al ven di lontan, di fantacine. «In chê volte la mê sensibilitât pai problemis ambientâi e jere considerade un fregul naïf. Passe 20 agns indaûr no si sintive la urgjence di cambiâ stîl di vite e la preocupazion pe crisi climatiche. Ma nissun mi à ostacolade – e ricuarde -. Mi plaseve une vore studiâ, e o ai vût la fortune di cressi, a scuele e fûr di scuele, in ambients che mi àn dât acet e mi àn favoride te mê formazion e tes mês passions. Jessi cressude a Cormons, tra culinis dolcis, intun teritori che al conte dal leam armoniôs tra om e nature, al à vût un pês impuartant. Jessi usade ae bielece de nature e de culture al à fat nassi in me une cussience ambientâl, mi à infondût il desideri e il plasê di impegnâmi par un futûr sostignibil. O ai agrât a Cormons e al Friûl par dut ce che mi à dât tai miei prins 19 agns di vite, pes tantis oportunitâts che o ai vût fin cuant che o soi restade in Patrie, e o speri di podê tornâ alc di bon ae mê tiere». Cun chest spirt, Alessandra e je deventade socie fondadore de Associazion “Energia Nostra”, che e promôf la nassite de prime Comunitât energjetiche rinovabile (Cer) di Cormons e dal dulintor. Citadinis, citadins e impresis dal teritori si metin dongje par produsi e condividi energjie nete di fonts rinovabilis su scjale locâl. «O soi jentrade in contat cun personis che a àn la mê stesse sensibilitât bande l’ambient. O stin lavorant par miorâ la cualitât de vite de comunitât. In gracie de disponibilitât di un incentîf, la Cer e jude cui che al aderìs a taiâ lis boletis de eletricitât. Doprant energjie rinovabile, e scombat il cambiament climatic ridusint la dipendence dai combustibii fossîi. Cun di plui, e jude a tornâ a puartâ sul teritori il valôr de energjie e a rindi la comunitât protagoniste ative de transizion energjetiche. Tal nestri câs, o volìn protezi Cormons e il so teritori di iniziativis e progjets che a puedin consumâ tiere e ruvinâ il paisaç. Cu la Cer o vin chê di judâ a realizâ implants rinovabii di proprietât dai residents su areis za urbanizadis, tant che cuvierts e capanons. O podìn vê vôs tal procès di transizion – e marche -. E si impegnarìn ta cheste direzion. Ma nus plasarès ancje rivâ a movi risorsis par progjets di rilevance sociâl pe comunitât tant che judâ personis che a vivin in puaretât». ❚
…………………………………………………………..
IL PROFÎL
Alessandra Motz, nassude a Gurize tal 1983, e je origjinarie di Cormons. E à frecuentât il Liceu sientific Copernico di Udin. Dopo la maturitât e à studiât economie te Scuele Superiôr Sant’Anna di Pise e dopo te Universitât Bocconi di Milan. Dopo vê lavorât sîs agns te citât lombarde, ocupantsi di ricercjis e consulencis sul marcjât dal gas naturâl in Italie e in Europe, si è trasferide a Lugano rispuindint a une ufierte di lavôr par partecipâ a un progjet de Universitât de Svuizare taliane finanziât dal Fonts nazionâl pe ricercje sientifiche. Tal 2021 e à otignût il dotorât in Economie. Cumò, te stesse universitât, e je ricercjadore in Economie de energjie tal Istitût di Ricercjis economichis e responsabile des analisis in materie di energjie pal Osservatori Financis publichis e energjie. E studie cemût fâ rivâ a personis e impresis energjie nete, a un cost resonevul e cuntune buine sigurece des furniduris.
◆ Il so interès pes tematichis ambientâls e il so leam ancjemò fuart cun Cormons le àn puartade a colaborâ, de Vierte dal 2022, a “Energia Nostra”, un progjet di creazion di une comunitât energjetiche dal bas te citadine di divignince. Cun chest progjet, puartât indevant a titul volontari, Alessandra e spere di dâ vôs ae comunitât cormonese e di contribuî a preservâ i ecosistemis, i paisaçs e la cualitât de vite a Cormons, che e reste il so lûc dal cûr.
◆ In Svuizare «la vite e je une vore comude, cuasi cence impreviscj, ma Cormons e je cjase – e conte la ricercjadore furlane -. E se o ves di tornâ in Italie, lu fasarès dome par tornâ a stâ in Friûl li che a son la mê famee di origjin, i amîs, e lis culinis cun lûs e formis che mi incjantin simpri». ❚
