Dal passât industriâl dal Friûl a rivin esemplis positîfs di coraç, determinazion, voie di metisi in zûc e di sperimentâ. A son chescj par Angela Zolli, antropolighe economiche furlane cuntune impuartante esperience e cognossince dai distrets industriâi locâi, i plui grancj insegnaments che furlanis e furlans di vuê a puedin fâ bogns. «Dongje di nons innomenâts – cui no aial mai sintût fevelâ di Arturo Malignani? –, a son cetantis personis che, pûr cuntun bagai di cognossincis limitât, a àn savût inovâ e fâ cognossi la lôr aziende ancje a nivel internazionâl, in timps li che lis pussibilitâts no jerin chês di cumò. Daûr di chestis personis dispès e jere dute une famee. Daûr dai distrets industriâi a jerin oms, feminis, mularie che, intune economie basade su la agriculture, a àn fat de lôr famee une imprese». Fâ cognossi la storie di chestis personis, fameis e impresis ai zovins al è fondamentâl. «A son storiis di vite che ur insegnin a jessi plui fuarts, determinâts, coragjôs», e marche Zolli, che e à vût lavorât ancje cu lis scuelis par progjets didatics finalizâts a trasmeti la cognossince dai patrimonis culturâl, storic e economic locâi. Chescj progjets, clamâts “Pats tra gjenerazions pal svilup dal teritori”, a consistevin, juste apont, intun scambi di savês tra lis gjenerazions, par solit students des scuelis miezanis e personis cun plui di 50 agns. Ideâts de ricercjadore furlane, a son stâts svilupâts dal Lab REA, il Laboratori di Ricercje Economiche e Antropologjiche, cun sede a Cividât, fondât di Zolli tal 2006 cuant che, daspò vê lavorât in diviers aziendis, e à indreçât il so percors professionâl bande lis siencis sociâls e la antropologjie in particolâr, fin a specializâsi tal setôr de antropologjie economiche studiant il compuartament economic des comunitâts produtivis che si trasformin in distrets industriâi.
◆ Lab REA al è un laboratori di ricercje, progjetazion e formazion che al opere, cuntune impostazion interdissiplinâr basade su lis competencis, intal cjamp des siencis sociâls, inmaneant ancje progjets di comunitât, mostris, incuintris e conferencis. Lu puarte indevant une scuadre di esperts intes dissiplinis economichis, antropologjichis, storichis e fotografichis. «Sul imprin o vin sperimentât une vore di tecnichis e di metodologjiis di ricercje. Si sin metûts subit in dialic cul teritori, cun scuelis e aministrazions comunâls. Di cualchi an si sin specializâts su la ricercje sul patrimoni industriâl e sui procès di industrializazion, e sul pandile a nivel sientific, cun seminaris e cunvignis, cu la publicazion di libris, articui su rivistis specializadis e cu la golaine di Cuaders di Ricercje Lab REA, e aes comunitâts interessadis, cun “Museus, mostris e moments” – rassegne di visitis vuidadis intai museus locâls e laboratoris par fruts e adults – cunvignis e documentaris, e, fin a cualchi an indaûr, lant intes scuelis cui Pats tra gjenerazions». Une esperience – cheste – biele, apassionante e impuartante: un progjet origjinâl dal pont di viste didatic, ma ancje un imprest di riflession comunitari. «Se i adults a contavin esperiencis, mistîrs e tradizions dal puest, zovinis e zovins che ju scoltavin a tradusevin chestis contis in tescj, dissens o fotografiis che a vignivin po presentâts ae comunitât. Dispès o vin puartât i students cui Pats e lis fameis cun “Museus, mostris e moments” intai lûcs che a sintivin fevelâ, tant che lis sgjavis des Vals dal Nadison, a cjapâ sù e a modelâ la arzile doprade in passât tes fornâs di Prossenic, a viodi la dighe di Crosis. Prime de pandemie, cuant che ancjemò lis gjitis scolastichis si podevin fâ cence masse fastidis, tropis voltis no si proponevino aes fantatis e ai fantats viaçs tal forest? Magari no jerin mai stâts al Museu archeologjic di Aquilee… Prime di lâ fûr de Patrie – al è l’invît di Zolli –, fasìnjur cognossi, cun percors de programazion scolastiche, il lôr teritori, cu la sô culture, la sô storie, la sô economie, e cun chescj, a podaran scuvierzi storiis e esperiencis umanis straordenariis, che a àn tant ce dî ancje in dì di vuê». Tant che il rûl – «essenziâl, ma sotstimât» – des feminis, intal svilup de economie locâl, che si sa pôc e nuie. «Une part fondamentâl tal passaç dal Friûl de agriculture ae manifature le à vude, fin ai agns Cincuante dal Nûfcent, il setôr de sede. Tal 1885 lis filandis a vapôr furlanis a jerin 39, cun 3 mil 375 bacinelis e un faturât che al superave chel dal Venit. Tal prin deceni dal Nûfcent, la cincuantine di filandis esistentis a impleavin 6 mil personis, pe plui part feminis. Al jere un lavôr faturôs, malsan, cun oraris luncs, che lis feminis (ancje frutis e fantacinis) a fasevin, cun dedizion e cure, par sens di responsabilitât, ben savint trop impuartants che a jerin chei cuatri francs che a puartavin a cjase, pe sorevivence di dute la famee, pleade de puaretât daspò de vuere. E di plui de vore intes filandis, a vevin di viodi dai fruts, dai vecjos, des stalis, dai cjamps, dal ort. E po, impuartant al è stât il cussì clamât lavôr a cjase, chel puartât indevant par esempli des feminis che a lavoravin il scus intal Roiâl e di chês dal distret de cjadree, che a impaiavin lis cjadreis e a fasevin lis finiduris, no mancul impuartantis des voris davueltis dai oms, ma chês a jerin però cetant plui consideradis. Ricuardìnsi ce che a àn fat chestis feminis e, in gjenerâl, il coraç e la capacitât di olsâ di chei che a àn sburtât il svilup dal Friûl, dispès in moments dificii. Nus insegnin a no vê pôre dal doman», e dîs Zolli.
◆ La ricercjadore e je in vore suntun gnûf documentari su lis filandis di Dignan e Cjarpât, che al met adun lis tantis testemoneancis racueltis intal libri “Il patrimoni industriâl sul Tiliment”, publicât da L’Orto della Cultura. «Un patrimoni – chel de archeologjie industriâl – che al à tantis potenzialitâts e pussibilitâts di svilup, ma al domande intervents di conservazion, valorizazion e rivitalizazion cun modalitâts e timps che a àn bisugne de colaborazion tra atôrs publics e privâts. Ma ancje di ideis e energjiis gnovis, e duncje progjetualitâts, che a puedin rivâ dai zovins. Par chest al è impuartant sensibilizâju fin de scuele sul valôr di une ereditât culturâl che, se doprade cun judizi, e rapresente ancje une risorse pal svilup sostignibil e pe cualitât de vite intune societât in evoluzion continue come che e je la nestre». ❚
:::::::::::::::::::::::::::::::::::::::::::::::::::::::::::::::::::::::::::::::::::::
Cjadree, une storie in divignî a Manzan
Al nassarà intal Borc dal Poç, tal centri di Manzan, e al contarà une storie in divignî, il procès di trasformazion dal distret e i siei protagoniscj, di îr e di vuê: dai imprenditôrs aes impaiadoris, ai designers. Il Centri di documentazion de cjadree al sta movint i prins pas daûr di une idee dal Comun di Manzan, che al à inviât un progjet di recupar, catalogazion, conservazion e valorizazion dal patrimoni culturâl leât al mont de cjadree: ogjets, documents, ricuarts che a son testemoneance di un passât personâl e coletîf. Bens materiâi e imateriâi che a permetin di passâ i moments principâi di une storie straordenarie, ma ancje di meti lis fondis par intervents che, in graciis di un leam strent tra culture e disvilup, a son in stât di incidi sul progrès sociâl e economic dal teritori.
◆ In cualitât di coordenadore sientifiche, Zolli si è ocupade dal progjet di riordin e di catalogazion des dôs colezions di cjadreis esistentis (une storiche, li che i modei plui vecjos a son de fin dal Votcent, e une moderne, costituide cu lis donazions al Comun), e de ricercje relative, lavorant a strent contat ancje cu lis impresis dal distret. In cantîr e à un progjet di ricercje su la curvadure dal len.
◆ Il nucli industriâl origjinari – chel clamât Triangul de cjadree, costituît dai Comuns di Cuar di Rosacis, Manzan e S. Zuan dal Nadison – si è slargjât man a man fin a cjapâ dentri 11 Comuns dal dulintor. La produzion de cjadree ta cheste aree e tache ae fin dal Votcent cu la rivade dai cjadreârs marianês. Il gnûf confin tra la Italie e la Austrie tal 1866 ju separe dai marcjâts di sboc. La introduzion dai dazis doganâls tal 1878 e mande in crisi dal dut il setôr, sburtant i cjadreârs marianês a migrâ. Il svilup de popolazion des impresis distretuâls al tache invezit cul secont dopovuere. ❚
::::::::::::::::::::::::::::::::::::::::::::::::::::::::::::::::::::::::::::::::::::
Il Profîl di Angela Zolli
Nassude intal 1967 in France, fie di lavoradôrs furlans emigrâts intal secont dopovuere e rientrâts intal 1975, Angela Zolli e je laureade in Economie e Cumierç te Universitât di Triest. E à lavorât in aziendis impuartantis intai setôrs de revision, dal furniment, des telecomunicazions e de cooperazion internazionâl prime di tacâ un lavôr autonom intal cjamp des siencis sociâls.
◆ Laureade in Antropologjie culturâl te Universitât Ca’ Foscari di Vignesie cuntune tesi sui procès di trasformazion dal distret furlan de cjadree, intal 2006 e à fondât Lab REA – Laboratori di Ricercje Economiche e Antropologjiche. Po e à otignût il dotorât di ricercje in Sociologjie e Antropologjie te Universitât Lumière Lyon 2 di Lion cuntune tesi su la analisi comparative tra la comunitât produtive dai cjadreârs e dai curtissârs.
◆ Autore di saçs, di une publicazion inte golaine “Etnografie” direte di Glauco Sanga, e je curadore di mostris, di documentaris e de golaine di Cuaders di Ricercje Lab REA.
◆ I siei setôrs di specializazion a son la antropologjie economiche, i procès di trasformazion socioeconomiche, industrializazion e deindustrializazion, il patrimoni industriâl. ❚
