A Pulfar, l’aur ros al è “bio”. Chel des Vals al è un ambient dal dut incontaminât e pûr
Al è clamât ancje aur ros e no dome parcè che il so non al ven de peraule arabe che e indiche il colôr zâl, ma soredut parcè che sul marcjât si lu cjate al stes presit dal metal indorât. O fevelìn dal zafaran, la droghe plui preziose dal mont che si rigjavile dai stigmis dal Crocus sativus, o ben cidivoc vêr che, come che al sclarìs l’adietîf, no je la stesse plante che e sflorìs cuant che a rivin i prins dîs di clip (e duncje metêtsi vie la idee di fâ bêçs lant a cjapâ sù crocus vernus pai prâts).
Coltivât za plui di 3500 agns indaûr tai paîs dal Mediterani di soreli jevât, dopo di vê cjatât bonstâ in diviersis regjons talianis (massime in Abruç e Sardegne, ma ancje tes Marcjis, in Toscane e in Umbrie), cumò il zafaran al scomence a meti lidrîs ancje tal nestri Friûl, in gracie dal sburt e de sgrimie di diviers imprenditôrs che a àn decidût di pontâ su cheste culture che, a dîle dute, no je di cjase chenti e nancje cussì tant doprade tes nestris cusinis, fale forsit che par dâi une ponte di colôr al risot ae milanese (se no si compre la buste za pronte di butâ dentri te aghe).
Alc però al è daûr a cambiâ tal aiar, cemût che a testemonein lis zovinis aziendis che a stan saltant fûr ator pal Friûl come tancj butui, nassudis no tant daûr de inceade dal fâ bêçs ae svelte e in maniere facile, ma cul desideri di puartâ inovazion e disvilup, restant tal stes timp peâts al teritori.
Un di chescj esemplis al ven de realtât “Fiore del Natisone” di Andrea Tanda, agronom sart maridât cun Laura De Luca, furlane di bande de mari, che tal 2016 al à inviade cu la femine une prime produzion di zafaran biologjic a Pulfar, tes Vals dal Nadison, li che è a sede la aziende, che cumò si è slargjade cun cjamps ancje a San Pieri dai Sclavons.
«La nestre e je stade pardabon une disfide, parcè che o vin invistît lis nestris risorsis intun progjet di recupar di une zone dificile e disvantazade (il comun al è in zone rurâl C), introdusint, cun di plui, une coltivazion che no je tipiche e che e varès un habitat diferent. Chel des Vals, però, al è un ambient dal dut incontaminât e pûr (par altri, propite culì e je nassude la prime stazion di terapie forestâl di Italie) che ben si prestave ae culture dal biologjic, che al jere il nestri obietîf primari». Une aventure che e je daûr a frutâ (il prin an al è stât produsût un chilo di zafaran), stant che il lôr prodot, vendût cul non di “Oro del Natisone”, al è cetant preseât e ricognossût pe cualitât superiôr, no dome di bande dai ristoradôrs nostrans, ma ancje di privâts e di negozis specializâts, sedi talians che forescj. Une biele sodisfazion che e ripaie di dutis lis vitis e lis faturis che si scuindin daûr de denominazion “bio”, come il control mecanic des jerbis spontaniis, la coltade midiant di plantis di arâ sot (siale o manaruele), o lis trê setemanis passadis a cjapâ sù i stigmis dai flôrs, di un scûr a di chel altri. Par altri, chest câs al dimostre cemût che al sedi pussibil cumbinâ cun sucès dôs culturis diferentis, chê sarde e chê furlane, rispietant e valorizant la tradizion de prime e l’ambient de seconde.
Il progjet “Habitat”
Il câs de coltivazion dal zafaran in Friûl al à stiçade ancje la atenzion dai ricercjadôrs de Universitât dal Friûl: a tacâ dal an passât, cun di fat, il Dipartiment di Siencis agroalimentârs, ambientâls e animâls dal Ateneu furlan al à inviât il progjet sperimentâl “Habitat”, cun chê di studiâ e di capî miôr lis pussibilitâts e lis potenzialitât di cheste culture. In gracie de colaborazion cun Aurum Julii, une realtât in fuarte cressite che e prodûs zafaran biologjic, i studiôs a son daûr a scandaiâ la rispueste e la rese cuantitative e cualitative di trê diviers bulbis di zafaran in siet tipologjiis di tiere e di microclime diferents. I bulbis, di fat, a son stâts plantâts tai cjamps di prove di Polcenic (altece medie), Tramonç (tiere arzilose), Sauris (mont), Basilian (nivel medi di ploie), Cjars triestin (tiere secje), Fossalon e Grau (tiere limose) e Dartigne e Magnan (zone moreniche).
di Serena Fogolini
