Al è stât publicât il bant di concors pe composizion dal imni de Patrie dal Friûl inmaneât dal Istitût Ladin Furlan Pre Checo Placeran, in colaborazion cun Messaggero Veneto – Giornale del Friuli. L’imni, cun test in lenghe furlane, al varà di riclamâ i caratars principâi e particolârs dal Friûl, in riferiment ae storie, aes tradizions, ae identitât sociâl e linguistiche di dute la comunitât.
Il concors al è viert a compositôrs di cualsisedi citadinance, etât, ses e residence; ogni candidât al varà di presentâ in forme anonime une sole composizion origjinâl, mai publicade, eseguide o premiade. Al autôr de opare, individuade di une Jurie specializade, i vignarà assegnât un premi di 3 mil euros. La proclamazion dal vincidôr si fasarà ai 3 di Avrîl dal 2018.
Il materiâl al varà di rivâ, midiant racomandade A/R, dentri dai 20 di Zenâr dal 2018 a cheste direzion: Istitût Ladin Furlan Pre Checo Placerean, «Concors pal Imni de Patrie dal Friûl», CP 3, 33039 Sedean (Udin).
Il test dal bant di concors e il modul di iscrizion si puedin lei e scjariâ sul sît de Arlef (www.arlef.it).
(LPdF)