«Dulà si cjatie po une cjanive cussì ben furnide?» al pense Macôr, glotint di gole e sierant un pêl i voi, come par gjoldi miôr di chei profums: inte panze dai caratei al polse un vin che al nulìs di Vierte, che ti incjoche dome se tu lu nasis. Rosacense vinum, lu clamin, e al ven de badie di Rosacis, pôc fûr de citât, in direzion di Udin: fresc e garbut, al sa di jerbe taiade su la prime ore de sere, bielzà batiade de rosade. Intes flascjutis di veri invezit si plate, clâr e net, il “dulce Rebolium”, un blanc di glace che ti console la pivide di Istât, cuant che il scjafoiaç e il polvar de strade ti suin la bocje, propit come vuê.
Il Princip Conrât Boian, ven a stâi il paron di Macôr, lu ten di cont par fâ regâi speciâi, massime ae cjantorie dal domo, o al bonsignôr intes fiestis comandadis, o a cualchi ospit di rivuart. Come chel che aromai di un mês come doman al è jentrât in citât cun tante fieste che nancje Crist in Jerusalem! Pastor angelicus, i disin. Ancje se al ven fûr di une gjernazie veneziane: chei di Correr. Ma nol impuarte: al scombat de bande juste, cussì al pense il Boian, e alore par lui al sarà sigûr dome che vin di messe, vin di Paradîs! Tai armarons di len invezit a son lis piecis di formadi di Tulmin, chel madurît intes grotis di piere rude, involuçât tal stran, di mangjâlu a tocs e a sclesis, cuant che al devente cussì vecjo che ti beche i lavris e ti fâs vignî fûr lis bufulis sot dai dincj. Baste alçâ un pôc i voi, e ti si presente une vision che e consolarès ancje i danâts dal Infier: picjâts cu la cuarde tant che bandîts condanâts a muart, a pendolin persuts e salams che a mandin fûr un invît golôs ae cerce. E murei di luianie, bafis di ardiel, une sopresse tant grande che il purcit intîr al pararès masanât dentri intal budiel. Tal sut di un camarin, sacs di forment e di siale, boçs di mîl, un vâs di sâl e un di pevar: robe che e coste, di prime sielte. Ma nissune maravee, che le famee dai Boians e je antighe, potente, di simpri dongje dal Imperadôr, e difensore spasimade de libertât de Patrie cuintri de arogance di Vignesie, dal Pape e dai siei vescui curiâi, che Diu ju sfulmini come poleçs impirâts! Ma cumò, al pense Macôr, la solfe e à di cambiâ, stant che un pape fedêl al Friûl imperiâl lu vin in cjase.
«Sù po Macôr, ce spietistu, che il vin al deventi asêt?» La vôs che lu reclame e je chê dal paron in persone. Il brâf famei al jemple la boce e al jes fûr de cantine. La zornade e je sflandorose. Un mês di Jugn cussì lusint e cjalt no sal visavisal di agnorums e la procession previodude par doman, sîs di Jugn dal 1409, e sarà bielonone. Tal broili sflorît e protet di une muraie alte, sentâts un devant di chel altri, Conrât Boian e Agnul Correr, ven a stâi Pape Grivôr XII, a discorin come che a fossin amîs di simpri. Pape: antipape. O miôr anti antipape, che ben trê a son i pastôrs che a puartin l’anel di Sant Pieri: un fedêl ae France, un a Rome e il tierç, chest Grivôr culì, ae nestre int furlane. E duncje ae acuile imperiâl, che e je zimule di chê di Acuilee.
Un Pape pe Furlanie! Ma si puedial? Bisugne tratâlu ben, al pense Macôr, cuissà mai cuant che nus torne une ocasion cussì golose. Mai, salacor. «Siôr Princip, velu chi il vin. Al è chel bon, chel di messe, la Ribuele zale, come che mi veve comandât. Par lui e pal siôr Pape, ospit riverît di cheste nestre cjase», al dîs il famei, cu lis mans che i tremin devant di tante autoritât. «Viodistu, Macôr – i dîs Conrât dut orgoiôs – devant di te al è un pastôr che i ten aes pioris plui che no al lôf»: un cjavat plen di cjavei, une barbe lungje e une musate ingrispade, doi voi clârs come il cîl. In efiets, nol à nuie dal Pape, al pense Macôr. E al fevele facil, si lu capìs, al riduce dispès. E cun di plui mi à dite di jessi braurôs dal non che o puarti, Macôr, che al ven fûr di Ermacore, il prin Patriarcje, arlêf di Sant Marc Evangjelist. Sperìn che chei altris doi rufianats no si metin dacuardi par sbilfâlu. Che no sarès mighe la prime volte. E magari cun tant di benedizion apostoliche romane. Intant, de cusine e ven fûr Marcolfe, la femine di Macôr. E à intes mans une torte, un dolç speciâl, a forme di grop di Salomon: «Lu ai preparât cu lis mês mans. La forme e je chê che si cjate sul paviment de Glesie Mari. A disin che al vûl dî la unitât inte diference, e il timp, che al cor intal lamp dal infinît. Al è plen di golosets di puare int: nolis, fîcs, pignûi. Ce che si cjate in ogni cjase di cristian, culì intor. Nô le vin clamade Gubane». Il vecjo Pastôr si alce, le benedìs e al ringracie il Signôr dai Puars, che dal timp di Adam, il prin om, al sa simpri sielzi i plui piçui par sclarî il misteri dal Mont. ❚
_____________________________________________________________
1409 in Friûl: une cuarte division
Ai 6 di Jugn dal 1409, Grivôr XII, al secul Agnul Correr, al inaugurave a Cividât un dai plui grancj Concilis inte storie di Glesie, che al varès vût di risolvi il probleme dal Schisme di Ocident. Il pape dai Furlans, cussì al vignive considerât, al jere rivât inte citât ducâl te zornade de Pasche Rosade, juste un mês prime. Cent e cincuante cavalîrs de miôr nobiltât furlane i lerin incuintri, vuidâts di Conrât Boian, il plui impuartant feudatari fedêl al partît dal Imperadôr e puartevôs de nobilitât locâl. Ancje la Patrie in chel moment e pative une division profonde e fuarte. Il patriarcje Antoni Panciere al fo considerât destituît de bande dai Cividins che i preferirin Antoni da Ponte. Inte dì dal Corpus Domini, il Correr, cul Sacri Cuarp dal Signôr, al jessive fûr dal Domo par direzi la procession conciliâr di scree. Ma la pression politiche dai siei aversaris e fo grandonone, tant che ai 6 di Setembar il Correr al scugnì scjampâ fûr di Cividât par no jessi copât. Ancjemò une volte, un progjet furlan brusât pe contrarietât dai forescj. ❚
1409 pal mont: il Grant Schisme
Il 1409 al fo un an une vore complicât: il Grant Schisme di Ocident al divideve in profonditât la Glesie fin dal 1378, ma cumò al deventave ancjemò plui grivi, pal fat che in chest an adiriture trê papis a regnavin un cuintri chel altri, in rapresentance dai doi partîts che inte Glesie si stevin confrontant: chel a pro di Rome, cun Grivôr XII, e chel a pro di Avignon, cun Benedet XIII. E il Concili tignût a Pise, invezit di risolvi il probleme, al veve promovût un tierç pastôr, Alessandri V. I turcs a tacavin a sburtâ sui Balcans, e in novante agns a saressin rivâts a cori sui cjamps de Patrie. Cussì che ancje la Glesie di Orient e domandave di vierzi un dialic cun chê ocidentâl. Dut chest cori di vescui, cardinâi e lôr segretaris al metè in vore une grande circolazion di ideis. Lis delegazions, polsant intes badiis e in tai munistîrs, studiant intes lôr bibliotechis, a cjatavin fûr i manuscrits dai antîcs, restâts platâts par un miâr di agns. A saran chei i butui di une gnove ete, chê Umanistiche. Come a dî che nol è mai un mâl che nol sedi ancje un ben. ❚
✒ Agnul Floramo
