Et l’aqua de la Fluvigna à menato zoso il belisimo ponte che era sopra la deta aqua del Tofo quale costava ducati 500… et poi è venuto zoso una montagna soto Inpezo sopra la Villa chiamata Borta et l’à coverta, è venuta zoso deta montagna a ore due inanzi dì et sono restati tutti morti soto li massi et terra persone 166 in circa quale la materia è sopra loro più di pasa 100. È restato vivo un homo che era andato in monte et una dona che era a mulino
Francesco Poiano
«Meniche, nus contistu ancjemò la storie di chê volte che il Diaul al è vignût intal paîs di Buarte?». A fevelâ al jere stât Josef, il fi di Marte la Portolane. Dîs agns di arint vîf e doi voi plens di maraveis. La ocasion e jere chê juste: di fûr, l’Invier a businâ cun vôs di Tramontane; dentri de stale, clip e cidinôr, profum di fen, i oms a fâ zeis e scudielis di len, lis feminis a gucjâ e a babâ: ce altri si podevial fâ in file? Ma cuant che Meniche e veve tucât su la puarte di len, ducj a vevin tasût. E faseve pôre, Meniche, la medisinarie, che e veve nomee di jessi ancje strie. Brute e carampane come la Trute, che e ven fûr dai boscs de mont a mangjâ i frutins a pene nassûts. Si le clamave par fâ nassi i fruts, e par meti su la scune coronis di pin e peçots cuintri ogni mâl. Se une vacje e pierdeve il lat, se al veve di nassi un vidielut, se cualchidun al tremave di fiere in tal jet, Meniche di sigûr e saveve cemût fâ. E cognosseve lis jerbis.
Vecje e peçotone: cussì ducj a pensavin che e fos simpri stade, cuntun cjâf di cjavei blancs tant che une cise di baraçs, cotule grande e sglonfe e plene di sachetis, e un sial neri cu lis frapis a involuçâle dentri, sedi cul cjalt di Avost che cu la zulugne di Novembar. E comedave i vues, la Meniche. E preparave filtris di amôr ancje, ma chei bisugnave domandâju cun prudence, che se barbe santul – il predi de Plêf di Castoie – lu ves savût, al varès di sigûr sacramentât alc par latin: «No stait a fidâsi dai striaments di chê vecje mate e bruntulone: ce che nol ven di Diu al ven di chê altre bande, e no son robis di scherçâ!» al diseve. Ma i plui vecjos dal borc di Denemonç le contavin diferente. A disevin che ancje Meniche e jere stade zovine, seculorum indaûr, e biele. Anzit no, plui che biele, e ancje sfaçade: cuant che si tirave su la sotane par passâ la Filuvigne, e mostrave lis cuessis, blancjis e ben fatis. E sot lis spalis, simpri discuviertis, si viodevin tetutis tarondis come la lune inte gnot avostane: «Plui di cualchidun, a viodile cussì salvadie, a balâ discolce intor di un fûc inte gnot di Sant Zuan, al à pierdût i sintiments» a disevin sotvôs lis vedranis dal paîs, plui par invidie e zelosie che par pietât cristiane. E veve vincj agns cuant che Buarte e je vignude jù, glotude par simpri dal montafin. «Alore, nus contistu alc?» al insistè Josef, ufrint la sô scudiele di pignot par fâsi contentâ. «Mai viodude tante di chê ploie come in chel mês, l’Avost dal 1592», e tacà Meniche, slungjantsi intal fen e miscliçant peraulis e supâ di sbrudiot. «La Filuvigne e jere plene come une mari pronte par parturî. Il cîl neri come la gose dal Infier. Parcè che la int di Buarte e jere deventade triste e mate. Egoiste e viziose.
Di cualchi mês al jere rivât tal paîs un sioron di Vignesie. Un che al veve monede inte scarsele. E ducj i oms si lassarin intorteâ des sôs peraulis, straçant la zornade inte ostarie. Ma jo, lu vevi ricognossût subit: al veve faliscjis dentri dai voi, al çuetave di un pît, e al puçave di solfar». Cuntune cjalade nere, Meniche e studà la ridade di Checo, menau di pocjis peraulis: «Dome il stupit al rît di ce che nol sa. Ma il piês al veve ancjemò di rivâ. E segnâi di disgracie a ‘ndi jere stâts, bastave dome savê lei tal grim de Nature: un vidiel nassût cun cinc gjambis; un frutut muart cence batisim, puartat sù in Trave pal rituâl des aganis; e i spirts dai muarts vignûts jù in procession dal cimitieri de Plêf a bevi la aghe de Filuvigne, rosse tant che il sanc dopo di une bataie». Lis maris a clamarin dongje i fruts, e une e tacà a preâ il rosari, segnant il cjâf dal plui picinin: «Ma la plui brute le faserin propit te vilie de fieste dal Sant: si viodeve che il besteam al veve frêt. Lis cjaris e lis pioris bombadis di aghe glaçade a tremavin tant che la fuee dal agaç, e chel diaulat di om di Vignesie al disè: puartait lis bestiis inte glesie, che tant al Signôr no i displasarà, stant che al è nassût intune stale!». In chel moment, une figure involuçade di lûs – un agnul dal Signôr di sigûr – su la ponte de mont de Auda al tacà a berlâ: ‘Vuardaitsi, Vuardaitsi!’ e la int, stiçade di chel forest, a ridi di lui: ‘Vuarditi tu po, di là sù’. La glesie e fo profanade. E invezit che lis lagrimis di fûc di Sant Laurinç, vie pe gnot un biel toc di mont e je slacade jù, puartantsi daûr dut il paîs, lis cjasis, i orts, lis stalis, i morârs, i nemâi. E ducj i abitants. La aghe scjafoiade dal slac e à fat vignî sù un lât dongje il paîs di Caprizi, che ancjemò al fâs pôre ai abitants di chês borgadis. Ducj muarts, fûr che un. E jo cun lui. Che o jerin insiemi inte valade dai mulins, a fâ l’amôr».
……………………………………………….
<In Friûl tal 1592> Un periodi di grande miserie pe Patrie e pe sô culture, scjafoiade aromai te bocje dal Leon di Vignesie. In particolâr, doi nons a rapresentin a plen la dominance veneziane e romane. Il prin al è chel di Giulio Savorgnan, esponent di une famee che di simpri e à lotât pai siei interès peâts a chei de Serenissime. Vecjo di 82 agns, al progjete propit intal 1592 une opare grandiose di canalizazion che e varès vût di cjapâ sù lis aghis de Ledre e dal Tiliment ae altece di Buie e di Osôf par puartâlis jù, intun sisteme di roiis, fin ae lagune di Maran. Dut par prontâ une rêt di canâi a pro de agriculture, dal arlevament dal besteam e ancje pal traspuart di lens des monts fin al mâr: insumis, une trasformazion dal Friûl a imagjin e someance de sô parone. Intal stes an, al firme il progjet pe costruzion de fuartece di Palme. Chel altri non teribil e odeôs al è chel di Francesco Barbaro, om fedêl a Vignesie, che intal zîr di chei stes agns – dal 1590 tant che assistent dal pape Clement VIII, al 1596 tant che Patriarcje, an dal concili di Udin – al metarà fin une volte par simpri al antîc rituâl patriarcjin.
…………………………………………………..
<Tal Mont tal 1592> Un an particolarmentri stramp e mat ancje pal mont; al jere ancje bisest, tant par dîle dute. Ai 20 di Lui, Giordano Bruno, il grant pensadôr e filosof dal infinît, al subìs a Vignesie l’ultin interogatori prime di jessi puartât in cjadenis a Rome, cul destin di jessi brusât pe libertât dal so pinsîr. In contemporanie, Galileo Galilei al tache a insegnâ a Padue, là che si formarà la sô gnove vision fisiche dal Univiers, firmant une des plui grandis rivoluzions sientifichis di simpri, e William Shakespeare si trasferìs a Londre, par componi i prins straordenaris esemplis de sô leterature maraveose ae cort de regjine vergjine Elisabeth I, la “Siore e Parone” di Ingletiere, che propite in tal stes an e fonde il Trinity College, inte citât di Dublin, là che a studiaran, intai secui a vignî, Jonathan Swift, Oscar Wilde, Bram Stoker e Samuel Beckett. Michelangelo da Merisi, plui cognossût tant che il Caravaggio, al rive a Rome, là che al manifestarà dut il so mût gjeniâl di interpretâ il mont e la sô sanganarie miserie, prin autôr di un realisim ingolosît plui de cragne dal popul che no dai vilûts dai siôrs.
✒ Agnul Floramo
