Otubar. Il cîl parsore Glemone al somee di veri. La mont e tache a colorâsi di zâl e di ros, l’aiar al nulìs di tiere bagnade, di vin e di cantine. E la gnot, cui siei spirts e lis sôs vôs, che a businin fûr de puarte, si fâs plui frede e paurose. L’Autun nol è une stagjon par tirâ sù bêçs, e pense Ursule, involuçantsi intal sial neri di lane che le tapone de buere. Miôr l’Istât, cuant che i marcjadants di ogni paîs si fermin cualchi dì dentri dai mûrs de citât, par paiâ la tasse dal Niderlech e par podê continuâ il lôr viaç al di là di Vençon, in tiere imperiâl. A aprofitin par cjapâsi cualchi zornade di polse, paiant monede pes feminis, pes ostariis e par mil altris bacanadis.
O in zornadis come chê di vuê, che ogni locande e ogni betule di Glemone e je plene di no rivâ a cjatâ puest, che si spiete la caravane dal Imperadôr Carli, il fradi dal Patriarcje Nicolau, in visite ae citât. Alore sì che la cjase di barbe Buro e di gnagne Nene si jemple di vite e di gjonde. Une corentie sù pes cjamaris, al prin plan de vecje cjasate, che e console. A ogni ore dal dì e de gnot chel che al bat su la puarte al gjolt di un bon acet, baste che al veti avonde becins te scarsele. Ursule e je zovine e biele. Barbe Buro le à cjatade che e jere ancjemò picinine, lant a bruscjâ sul Orvenc intune zornade di Autun come cheste, di vincj agns indaûr: infresonade e cragnose, e tremave, discolce e mieze crote, dute voglats e cjavei spirtâts che tu le varessis dite une agane, e no une frutine abandonade tal bosc. E lui le à cjapade sù cence dî nuie, poiantle su lis spalis, come che al varès fat cuntune cjavre salvadie o une piore scjampade de stale. E le à puartade intal borc di fûr puarte, che ducj i disin des putanis.
che la frute e varès gjoldût dal afiet di une ventine di maris almancul – ancje trente, cualchi volte, in stagjon di buine – e di un pari, Barbe Buro. Che al mastiave a fadie cualchi peraule, miscliçantle di strambolots e di murmuis. Un ors cu lis çatis masse grandis par fâ fente di jessi zentîl. Gnagne Nene no. Une striate grasse, penze tant che une purcite, simpri pronte a berlâ, a molâ lasagnis ancje cuntun len, se e veve bisugne di fâsi valê. E cu lis mans prontis a cjapà sù i becins di ogni client: ju gafave ruspiose e ju meteve inte borse, peade ae cinture, sot control di ogni tentazion. E tu le viodevis a riduçâ dome in chel moment, che subite dopo i tornave la ghigne di simpri, une bissebove di femenate che ancje barbe Buro i stave lontan, cuant che l’aiar nol jere di chei bogns.
Si sa, cualchi volte il lôf al mostre di vê cûr plui grant dai cristians. E Ursule in chê tane di “pecjadôrs”, come che al tonave il predi sul altâr, e jere cressude nudride e nete, tirade sù tant che la miôr rose dal ort. Ma, come che si dîs, cul lôf tu vâs e cul lôf tu berlis. La prime volte e je stade dure di gloti. Ma il curiâl dal Patriarcje al varès paiât, e cetant, par jessi il prin a gjoldi de sô rose. Lu veve sintût, Ursule, inte predicje cuaresimâl, su la place dal Domo, chel predessat tirât a lustri, che al pontificave sul pecjât, che al ven simpri stiçât des feminis, strument dal Diaul, tant che cu lis lôr mignagnulis e nainis ti incjochin l’om, ancje il plui virtuôs e sant, e i vierzin lis puartis dal Boboròs. Cussì al contave, cjalant in muse ognidun, pontant il dêt su la int, sburtant i voi infûr, tant che al someave lui il Diaul, o almancul al faseve pensâ che lu cognossès miôr di chei altris.
E al à ben dimostrât di cognossilu cuant che si è presentât inte stanziute di Ursule, sot sere, e le à batiade a dovê, vierzint il so tabernacul e funzionant dute la messe “usque ad custodiam noctis”.
Doprade, batude, pestade, violade, come une Madalene che no fos stade sparagnade de clapadorie dai fariseus. E dut, cence mai gjavâsi la biele crôs di aur tampiestade di rubins, ros come il sanc di chel Crist, tant compagn a chel mancul sant ma istès uman di Ursule, pronte par deventâ la gnove putane di Glemone. Sigûr la plui biele. E il Gastalt al à fat savê che i siei servizis a son stâts za ben che prenotâts pai ospits de delegazion. Cuissà mai po che no finissi intun jet impuartant, usgnot che e ven. La ultime lampade di lûs e monte sù dal cjanalon dal Tiliment, piturant di rose la muse dal grant Cristoful che al fâs di vuardie ae puarte dal Domo. E la sirene ai siei pîts e par che e ridi: “Ancje nô nus clamin sirenis, ma no vin mighe la code!” e pense Ursule. E, svelte come un gjat, e sparìs jenfri la prime sossedade dal scûr.
……………………………………………………………….
IN FRIÛL TAL 1354: UN GRANT PATRIARCJE
Il 1354 al è un an di grande impuartance pe Patrie, guviernade di un Patriarcje, Nicolau di Lussemburc, che al è fradilastri dal imperadôr Carli IV, salacor une des figuris plui impuartantis in Europe te metât dal secul XIV. Nicolau al jere montat su la catidre di Acuilee ai 31 di Otubar dal 1350, dopo che ai 6 di Jugn di chel stes an Bertrant al jere stât copât su la Richinvelde. La situazion cetant favorevule par vie di chel leam familiâr e à fat in mût che il Friûl al diventàs in chei agns un pont nevralgjic e strategjic pe politiche internazionâl, e duncje ancje un lûc là che no dome il mont politic, ma ancje chel culturâl a podevin cjatâ un spazi ideâl, che al varès garantît une visibilitât grandonone. Nol è un câs che ai 14 di Otubar di chel an e vegni organizade propit a Udin une celebrazion grandiose là che Patriarcje e Imperadôr insiemi a celebrin une gnove vision de Europe, che salacor e anticipe di cuasi sietcent agns la prospetive che o stin vivint dome cumò.
…………………………………………………………………..
TAL MONT TAL 1354: PESTE E VUERE
La Europe e sta jessint di une des crisis plui tremendis che le àn mai savoltade: chê de peste nere, un mâl che al glot in doi agns, a partî dal 1347-48, la plui part de popolazion continentâl. Cun di plui, e je sclopade une vuere tra France e Ingletiere che e durarà plui di cent agns. In chest davoi spaventôs, la struture politiche plui potente e stabile, sedi di un pont di viste economic che politic, e reste la regjon imperiâl, vuidade di Carli IV di Lussemburc a partî dal 5 di Avrîl dal 1355, date de sô incoronazion a Rome. Om di grande intuizion, al jere amât dai inteletuâi plui progredîts di chê ete. Amì dal studi e de culture, Carli al veve contribuît a vierzi universitâts impuartantis: chê di Praghe, tal 1348, che in so non e ven clamade Caroline; e chê di Cividât, tal 1354 – daûr di un progjet che al jere bielzà dal Patriarcje Bertrant -, stiçât salacor dal fradilastri Nicolau di Lussemburc, Patriarcje di Acuilee. Progjetist di une Europe plurâl, todescje, slave e latine, al crôt inte pâs vivint intune ete di vuere.
✒ Agnul Floramo
