Un gnûf program par contâ il Nadâl di îr e di vuê
Al à titul “In scolte dal Nadâl” e al è un program che Radio Rai Friûl-Vignesie Julie e met in onde ogni sabide dal dopodimisdì dai 7 di Dicembar ai 4 di Zenâr dal 2025. A mi che o scrîf il plasê di condusilu, e alore o ai pensât di dâ une vore di spazi ae musiche de tradizion furlane, cence trascurâ ancje gnovis produzion musicâls, che magari no àn a ce fâ in maniere direte cu lis usancis di chenti, ma che a proponin la lenghe furlane come veicul par pensâ a chestis fiestis.
◆ Si varà la pussibilitât di cognossi, graciis a diviers ospits, sedi i cjants antîcs sedi chei plui modernis, par furlan, e di contâ cualchi usance che forsit di cualchi bande si conserve inmò.
◆ Musiciscj, cjantautôrs, cultôrs di storie locâl, tra contis, fatarei, ricuarts, fats di vuê, tra un “Lusive la lune” e un “Puer Natus”, un “Missus” e un “Adeste fidelis”, cence dismenteâ la famose, forsit no plui, “Gjesù cjamin” che la Onorade compagnie dai Cjantôrs di Çurçuvint inmò e cjante lant pes cjasis dal paîs. O inmò il “Cjant de stele” e altris pastorâls.
◆ Tra i ospits des primis pontadis si varà il plasê di sintî Vanni Floreani e Alessandro Tammelleo che a presentaran il grant zîr che a fasin cuntune clape di sunadôrs, tra pivis, armonichis, sampognis e cuars, dilunc dutis lis fiestis, ator par il Friûl, de mont ae marine. A contaran ancje dai lôr ricuarts dal Nadâl e ju confrontaran cu lis usancis di chescj timps. Diviersis a saran ancje lis scoltis musicâls dal lôr repertori.
◆ Inmò, inte trasmission al sarà ospit il cjantautôr cjargnel Lino Straulino che al presentarà cualchi toc inedits sul Nadâl componût di lui, e al sarà insiemi cuntun altri cjargnel, Gianni Oberto di Paulâr, grant cognossidôr des storiis di altris timps, in particolâr dal Cjanâl di Incjaroi.
◆ Un altri musicist impuartant, e promotôr culturâl di nivel, al sarà Andrea Del Favero, che al contarà di un progjet discografic, une raritât, che al veve sburtât cu la etichete “Folkest discs” tal 2002 insiemi cul grup “La Sedon Salvadie”. E à titul “Cjantade di Nadâl”, e e je une produzion rare stant che a ’nd è pardabon pôcs di discs monografics furlans dedicâts al Nadâl. Si scoltaran e comentaran tocs come “Pater Noster picinin”, “Din din din don Palonie”, “Siamo i tre re dell’Oriente”, “Staimi atenz”, insiemi a contis gjavadis dai scritôrs furlans, cun paralelisims cu lis usancis di vuê.
◆ E se il Nadâl al è cambiât, forsit la radio e pues judâ a cjapâ cussience o cognossince, par cui che nol sa, di cemût che i presintiments des fiestis pe nassite dal Crist a jerin une vore plui sintûts, forsit ancje di bande di cui che nol crodeve trop, ma che al jere simpri presint tal ufrî la sô vôs tai cjants e la sô disponibilitât a une comunitât che in chestis ocasions si strenzeve intun sintiment comun, condividint cun disposizion naturâl une cerimonie che e veve pôc di artificiôs e tant di autentic e gjenuin. ❚