La etichetadure
di origjin e fâs discuti
Une gnove classificazion de divignince dai vins austriac e sta stiçant un dibatiment grivi jenfri i viticultôrs: fin dulà si puedie sburtâ la etichetadure di origjin?
◆ Al va ben che su la cualitât e sui presits dal vin si ledi indenant a discuti, ma cul lâ dal timp chest al deventarà plui ingredeât, par vie che al cjaparà dentri il valôr dai singui vignâi de Austrie e duncje la fuarce di marketing: in struc, daûr di dut a son simpri i bêçs… e in chest câs a son tancj pardabon.
◆ La reson e je inte espression intrigose “classificazion dai sîts”. Sù par jù di dîs agns incà, lis aziendis tradizionâls dai vins a sburtin par definî, sul plan juridic e in dut il teritori federâl, i sîts di produzion dai vins che, secont lôr, a produsin vin di prime cualitât. Fin in dì di vuê – a nivel mondiâl – nome la France si è inviade in cheste direzion.
◆ Il guvier, che nol è tant, al à fat bon un regolament coletîf che, no cate lis oposizions cetant fuartis, al lassarà che a sedin i comitâts regjonâi e nazionâi dai produtôrs a decidi cuâi vignâi che a podaran jessi clamâts “erste Lage” (di prime classe) o “große Lage” (di piche).
◆ Lis gnovis regulis a daran ai consumadôrs un indreçament miôr intal berdei dai tancj miscliçs di vins, uis, nons di lûc e di fantasie, ma la classificazion di origjin e judarà ancje a garantî aes miôr aziendis i vantaçs che si mertin, stant che – e cheste e je la novitât – a son stâts dâts dongje criteris avuâi a nivel federâl su la fonde di un document di classificazion. In chest mût, la Austrie si espon a une osservazion critiche severe a nivel internazionâl: se la cuistion e va strucje, lis aziendis di vins a riscjin di pierdi credibilitât. Intal stes ambient dai produtôrs di vins, la brame incressude pe divignince regjonâl e sabore une crevadure intal setôr. Al nas il dubi, dut câs, che lis aziendis mancul cognossudis a nivel internazionâl a vedin cetancj svantaçs e che a corin il pericul di lâ fûr dal marcjât.
◆ Chel che al podarà definî il so vignâl tant che “große Lage” al podarà vê ancje plui solvence tes bancjis. Il valôr de ue e dal vin a incressin parie cul valôr dal teren, e cussì al garantìs plui competitivitât e miôr cundizions di finanziament; dut chest al deventarès cuasi ereditari e nol varès plui di confrontâsi cu la cualitât de concorence. Cun di plui, i comitâts regjonâi a saressin – stant ai produtôrs – dal dut cence trasparence e duncje il pericul di coruzion e di contaminazions par dâ fûr lis certificazions di “große Lage” al sarès cetant alt.
◆ Stant a cualchi critic, un marketing di pueste e il patriotisim regjonâl a saressin impuartants, ma chel che al sta sucedint al larès a une violazion de proprietât privade, a une riconversion dai terens, a dispiet dal fat che la posizion di un vignâl no je une garanzie di cualitât alte. Cun di plui, lis areis classificadis a son nome di 35 etars.
◆ Di bande dai legjislatôrs si ribat che la classificazion no je il risultât di une incursion di buride, ma il prodot di un procès lunc e ben stazât. La comercializazion fate in base ae zone di produzion e sarès sociâl e democratiche: la denominazion no partignarès a un singul roncâr, ma a un grup di aziendis, che de lôr notorietât si zovaressin ancje aziendis pôc cognossudis dal stes teritori.
◆ Ma cualis sono lis cundizions par che un vin al sedi classificât tant che “große Lage”? I criteris di valutazion a son il precedent storic dai vignâi, la gjeologjie, il clime e la esposizion. Ma a contin cetant ancje i fatôrs comerciâi, come il valôr e la cuantitât dal vin. Cun di plui, e je obligatorie la vendeme a man. La leç e previôt ancje une rese massime par etar. Il limit di 35 etars al ven justificât cul fat di vê volût fâ miôr de France, par vie che in fin dai conts si à di rivâ a un denominadôr comun. Dal sigûr il dibatiment al varà di continuâ, ma i legjislatôrs a son convints di vê poiât i prins tassei par un ricognossiment de produzion di vins de Austrie a nivel internazionâl. ❚
