Une cubiade tra politiche e afârs
e à permetût a Terna l’ultin extra profit
Rabie, indignazion, recriminazions suntune bataie che e jere vinçude e che e je stade puartade vie ai furlans, ma ancje la conferme di une convinzion fuarte: chel eletrodot nol leve fat e cumò al larès butât jù. A son i sintiments che a pervadin il cûr dai opositôrs storics dal grant mostri che di Basilian a Redipulie al involuce la plane furlane, dopo vê savût dal mudament di posizion di Terna a pro des condotis eletrichis intieradis.
No si rint Tommaso Cosolo, proprietari di terens di S. Pieri dal Lusinç, promotôr di un comitât spontani italosloven pe difese dal Lusinç. Inte sô vite, sui siei fonts logâts in posizion strategjiche, al à viodût a passâ servitûts di ogni gjenar: gasdots, oleodots, eletrodots, autostradis, feroviis reâls e imagjinariis (tant che la linie direte Udin-Triest che e varès vût di taiâ Gurize sparagnant ben 6 minûts di percorince!). «E cui sino nô furlans, fîs di un diu minôr?», al evidenzie Cosolo: «Brâfs i venits a otignî cheste soluzion – al va indevant -. Nô, tant che Regjon autonome, o varessin vût di jessi plui indenant a pet di une Regjon ordenarie, e invezit o sin ridusûts cussì!». E Cosolo lu pues dî a fuart: «Il Comun di S. Pieri dal Lusinç al à previodût in maniere juste intal plan regoladôr un coridôr pes infrastruturis energjetichis, ma i siôrs de Terna sul nestri teritori a àn pretindût di fâ chel che a vuelin, e ogni 2-3 agns si inventin une gnove linie. S. Pieri dal Lusinç al veve di restâ un borc rurâl, dongje de Aree di reperiment di interès ambientâl dal Lusinç, e al è stât fiscât invezit de Terna e de Snam. La aministrazion di prime e à acetât lis compensazions economichis di Terna, sacrificant paisaç e ambient fluviâl».
A so timp si è oponût in maniere braurose ae usurpazion de planure furlane de bande di Terna Franco Passoni, agricultôr di Merlane di Sante Marie la Lungje, cui siei terens a Passarian di Pavie. «Ai ats di ocupazion dai terens de bande di Terna – al conte Passoni – in segn di resistence civîl o ai ritignût di rispuindi in lenghe furlane. Lis mês istancis a son stadis ignoradis, cundut de leç 482. O ai fat denunzie in procure, o soi stât ancje sintût, ma nol è sucedût nuie, fale il moviment di un pilon masse dongje de roie. O stoi ancjemò spietant la indenizazion pes servitûts. Nancje intes coloniis, nancje dilunc de ocupazion taliane de Libie si dopravin ciertis proceduris». Passarian di Pavie al è un biel borc rurâl, aromai ruvinât no dome dal eletrodot, ma ancje de grande centrâl eletriche metude a cjaval tra i teritoris di Muçane e di S. Marie la Lungje. Il prin al à ricorût, il secont al à acetât l’eletrodot. «Magari cussì no, i podês fuarts a àn pilotât dut l’afâr – al conclût Passoni – midiant dal ricat dal trasferiment de Abs in Serbie. In Venit a son stâts plui unîts, si son aleâts cu lis Sorintendencis e cui sindicâts. Ca la resistence e je stade delegade a pocjis personis».
«La colpe e je des tantis personis e istituzions che ca in Friûl a vevin prometût la lôr poie e dopo nus àn lassâts bessôi – al evidenzie Daniele Marangone, agricultôr biologjic di S. Marie di Sclaunic, frazion di Listize -. O soi restât cetant scotât dal tradiment di Coldiretti, che a peraulis e dîs di volê difindi il paisaç e l’ambient, ma sul eletrodot si è zirade di chê altre bande e e à abandonât i agricultôrs». E reste la sodisfazion amare di vê vût reson: «I presumûts problemis tecnics pal intierament a jerin bausiis – al rimarche Marangone -. Come pûr il presumût trasferiment de Abs par colpe dai opositôrs dal eletrodot. No sin mai stâts cuintri dal disvilup dal Friûl, ma a pro di un disvilup miôr. O ai spindude la vite par meti dongje terens e par fâ partî une aziende biologjiche. Cumò ce puedio sigurâi al consumadôr? Intes plantis anuâls no ai mai viodût diferencis, ma in chês polienâls, tant che i pomârs, o viôt che chês sot dal eletrodot a patissin. E dut câs, dal pont di viste paisagjistic, nol è ciert un biel biliet di visite. La colpe e je de politiche che no à imponude la soluzion intierade, cemût che al à fat il Venit».
«La realizazion dal eletrodot Udin Ovest-Redipulie e je stade un svindic di Terna cuintri de lote dal Comitât pal Friûl rurâl – al marche Paolo Govetto, agricultôr di Merlane, che al à terens a Tissan -. L’intierament al jere pussibil e sal augurave ancje la Union Europeane. Ma la politiche regjonâl no à fat nuie pal teritori. Mi sint ofindût, ingusît e o ai rimetût ancje cu la salût. Jo o vîf sot dal eletrodot, mi alci di matine e o viôt i pilons e la centrâl eletriche, la corone dal arc alpin ruvinade in maniere ireparabile di chest riviel. O cîr di fâme passâ, ma no rivi a digjerî cheste injustizie bande il nestri popul che si è dimostrât sometût e disunît». In Venit, par Govetto, «il popul al è stât unît, insiemi ai sindics e ai esponents regjonâi. Ca, tancj no àn volût jessi tutelâts nancje par vê un just compens pe opare e no lis cuatri palanchis ufiertis di Terna. Jo o ai 7 etars di teren, e par 9 mil metris cuadris di servitût mi àn ufiert 7 mil euros suntun teren valutât 100 mil. Lôr a fasin afârs, a speculin, e no lassin nancje i fruçons al teritori. No son ancjemò stadis paiadis nancje lis esiguis indenizazions prometudis ai agricultôrs. I Comuns a àn vût tancj bêçs, ma a son stâts spindûts pal furniment urban». ❚
Roberto Pensa
