E in Venit, Zaia si impon:
di cumò indenant, lis grandis liniis eletrichis
a saran dutis intieradis
Dopo il dam, la gabe! La planure furlane no dome e à vût di patî la feride ambientâl e paisagjistiche oribile dal eletrodot aeri Udin Ovest-Redipulie, ma cumò i furlans a àn ancje di digjerî la notizie che Terna (il gjestôr nazionâl dal traspuart de energjie eletriche) e à concludût cu la Regjon Venit un acuardi cuadri che al previôt di fâ passâ sot tiere i gnûfs eletrodots e di bandonâ la soluzion aerie. Ai 21 di Zenâr passâts, il president dal Venit Luca Zaia, e l’aministradôr delegât di Terna Luigi Ferraris, a àn fissât di intierâ l’eletrodot Dolo-Camin e altris interconessions impuartantis, par un invistiment totâl di 400 milions. Pecjât che la stesse Terna, in Friûl, e à sostignût simpri che a jerin problemis tecnics insuperabii tal intierâ eletrodots a tension tant alte. Un mantra ripetût in maniere acritiche di politics, industriâi e mass media regjonâi. E cumò, cui jal sclarissial ai furlans che in Venit e je une tecnologjie cetant superiôr?
In Friûl, di fat, la politiche e tâs imbaraçade, stant che e je complice a fuart dal misfat (a part pocjissimis ecezions). Sul teritori l’inzignîr Aldevis Tibaldi, “motôr” dal Comitât pe vite dal Friûl rurâl, al vise che la bataie no je finide ancje se e passe moments di grande dificoltât: «La sentence dal Consei di Stât dal Lui dal 2015 che e veve cualificât l’eletrodot tant che une opare abusive par carencis ambientâls gravis, e je stade scjavalgjade des decisions scandalosis dai guviers Renzi e Gentiloni che, distrigant cence nissune istrutorie il conflit tra ministeris dal Ambient e dal Disvilup economic, a àn tornât a dâ vie libare al eletrodot aeri. Cuintri chestis sieltis o vin proponût ricors al Tar dal Lazi, che in maniere scandalose al spiete di doi agns di jessi discutût. O vin presentât denunziis aes Procuris de Republiche di Rome e di Gurize par disastri ambientâl in relazion al ûs di bentonitis sul jet dal flum Lusinç, ma ancje chi nol è sucedût ancjemò nuie. O sin sigûrs che, prime o dopo, ancje il dirit nus darà reson. Il Friûl nol à di rindisi». ❚
Roberto Pensa