Cuissà parcè che ogni volte che si passe denant, al ven di domandâsi ce che a fasin li dentri. “Che al vegni, che i fâs fâ un zîr te nestre sede scloteade. Cussì si rint cont di ce che al è un archivi”. “Scloteade?”, i domandi ae diretore, un pôc stranît. “E sarà ancje – i dîs -. Ma mi pâr un grum ben tignude, nete, scuasi lusint”. Dentri dal Archivi di Stât di Udin dut al è ordenât e perfet. Ancje se la impression e je chê di cjatâsi in efiets dentri di une vecje scuele. E sarà la sugjestion di vê di une bande il Marinelli e di chê altre il Malignani.
Puarte blindade tal ingrès. Il voli de telecjamare al smicje e nol lasse jentrâ ducj. Marmui clârs mi compagnin dentri. Su la drete libris de colezion Ciceri, sot veri. Po une segretarie mi puarte li di Roberta Corbellini, udinese, dal 1999 a cjâf di chest braç particolâr dal Ministeri talian dai Bens Artistics. Un braç che al custodìs undis chilometris di cjartis e di documents des provinciis di Udin e, fin al 1963, di Pordenon. Ma che cumò al à finît ducj i puescj par conservâju. La diretore e à dât l’alarme: o a cjatin un lûc plui larc o di chi a pôc a saran obleâts a trasferî part des cjartis tai uficis centrâi di Rome o in chei dal Venit. A Pordenon lu stan za fasint.
Il limes temporâl al è Avrîl. Prime di restâ scjafoiâts de nestre stesse storie. “O riscjìn di pierdi chest patrimoni dal Friûl – e conte sclete la diretore -, che al interesse e che al rivuarde ducj i furlans. Il gno apel al è a dutis lis istituzions dal teritori, no dome ae provincie. No si pues pensâ che a invistî al sedi dome il nestri dicasteri di riferiment. Dome midiant di un acuardi jenfri chest, regjon e ents locâi, o inviarìn une buine politiche pe tutele, conservazion e valorizazion di chescj documents”.
✽✽ Cence spazis
La vicende e scomence tal 2004. Te prevision di une gnove sede, al ven firmât un acuardi fra Ministeri pai Bens e lis Ativitâts culturâls e la provincie di Udin, chê volte sot la presidence di Marzi di Strassolt. Si previôt di cjapâ sù la ex caserme Duodo e di trasferî li dutis lis cjartis. La idee e je chê di costruî une piçule citât dai archivis e de memorie dai furlans. Tal zîr di dîs agns, Palaç Belgrât al cambie linie, za sot Strassolt, e ancje – dal 2008 – sorestant. Al dîs, sù par jù: i spazis de caserme ju doprìn pai nestris uficis, pal Archivi di Stât o cjatarìn une altre sede, in zonte a chê di vie Urbanis. In pratiche, un ampliament. “Risultât? Al è il Març dal 2013 e o sin in cheste stasi, cence spazis. No savìn plui dulà meti la robe. Sparniçâts pal Friûl o vin vot chilometris di documents”, e spieghe Corbellini. E e tone: “Dibant fevelâ di identitât: il rapuart fra chescj bens e il teritori al è tes mans di une volontât politiche. Il rest a son dome cjacaris. A àn di cjatâ dutis lis soluzions par che chest materiâl al resti chi. O il dam al sarès par ducj ”. E ce i aial rispuindût Fontanini? “Al dîs che bêçs no ‘nd è. E jo o rispuint: no si rispuint cuntune declarazion di mancjance di fonts. Si rispuint cun progjets”. E se si cjatàs une soluzion, l’Archivi par continuâ a lavorâ al varès dibisugne di almancul altris vincj chilometris pai prossimis cincuante agns.
✽✽ Ce isal li dentri?
Dentri dal edifici dal Archivi di Stât a son lis cjartis, i documents de storie dal Friûl. Un lûc de memorie. Bocons di lavôr di comparts des aministrazions che a tratavin i fats de int. E duncje a son la storie de int, dai paîs, des fameis, de emigrazion. 3500, i visitadôrs ogni an.
Il zîr di visite dentri de struture al scomence propit li dai catastics. Di là di une penze puarte taie fûc, l’ambient al è climatizât. Tancj casselins blancs e larcs a man çampe. La diretore a ‘nd vierç un a câs. Ve l’Archivi cartografic. Mapis vielis che no interessin dome i storics ma ancje i privâts, par esempli se a àn di definî i passaçs di proprietât o une ereditât. O pai plans regoladôrs. La diretore mi fâs viodi chel di Cjaresà (frazion in comun di Sant Zorç dal Noiâr, ndr): un sfueon cussì delicât di chine e di blanc, cui lots di teren dividûts in maniere precise e numerâts. Intune stanziute di veri, simpri su la çampe, rodolâts a polsin i documents napoleonics, che a gjoldin di un ripâr special. “E achì?”, e zonte Corbellini, dute braurose, pontant su la drete. “Achì o vin il Stât civîl di dut il Friûl dal 1871 al 1900, tirât dongje midiant des “copiis di sigurece” (in pratiche, une altre copie di un at) che dispès si zontin a di chês altris cjartis di chestis personis, duncje o savìn dut… Mi capissial? – mi dîs la diretore – Culì o vin un spacât ancje dai fenomens sociâi!” Suntun plan rialçât, une schirie di cartelis di no podêlis conta. “Là sù a son ducj i ats de procure di Udin tant che Cort di Assise straordenarie pai crimins fassiscj. La storie de Resistence furlane”. O sierìn il puarton daûr di nô e o passìn in altris doi archivis, che a semein bunkers. Plui strets e plui scûrs. Dome scansiis tor ator. Un al è l’archivi notarîl dal Friûl. Al scomence dal 1200. Chel altri al racuei i ats de Aministrazion di Udin, scomençant dal 1600. Su la schene dai blocs di cjartis, i titui.
✽✽ Lis urgjencis
“O vin vot chilometris di documents ator pal Friûl, in spiete di rivâ achì. Ur scugnìn dâ acet achì”, e spieghe Corbellini. I esemplis plui urgjents? Sant Denêl, dal 1700 al fo sede di aministrazion de justizie. “Dusinte metris di cjartis produsudis, che il comun nus à dite di cjoli, par vie che il tribunâl nol è plui e lôr no àn puest. No son dome lis storiis dai procès, ma ancje chês des sucessions”. L’archivi “Zamberletti” sul taramot dal 1976 al è tai uficis de Prefeture, ma lu spietin in vie Urbanis. “Cun dute la storie de protezion civîl, nassude daspò di chê esperience”. I documents su la ricostruzion dopo la seconde vuere mondiâl? Cuatricent metris ju àn ae Agjenzie des Jentradis, viodût che i privâts li a domandavin i contribûts par tornâ a fâ sù lis cjasis. “E je la storie dai bombardaments, des azions dai aleâts e dai partigjans”. La vere urgjence e je a Tumieç. “Dulà che si cjatin in stât di conservazion pessim lis cjartis de sezion civîl dal Tribunâl dal 1971 al 2000 e che o sin in pericul di piedi se no si interven subite”, e spieghe la diretore.
✽✽ La digjitalizazion e va indevant
Da pît des scjalis, tal soterani, e je la centrâl di digjitalizazion. Tal cidinôr, dome un “clic-clic-clic” continui. Doi zovins, ognidun cu la sô taule a nivel rispiet al teren (e je propit une nivelete di muredôr a controlâ che dut al sedi in scuare), a poin i sfueis e a frachin il boton. Une machine fotografiche di 50 Mega pixel sore il lôr cjâf e scate e e salve la imagjin in Hd. Tal mieç de sale, i fassicui peâts cun curdelis: i stâts civîi des provinciis di Udin e di Pordenon dal 1806 al 1814. Al è il progjet “Antenati”, finanziât di un sponsor american, cun ducj chei altris Archivis di stât: 140 milions di imagjins che si podaran cjalâ dal pc di cjase. Su antenati.san.beniculturali.it, il contribût furlan al sarà disponibil di Avrîl.
Za a disposizion invezit su archiviodistatoudine.beniculturali.it lis mapis catasticâls dai comuns censuaris dal 1843, in plui des schedis sientifichis in pdf dal materiâl culì catalogât. “Ve – e siere Corbellini – , se o scugnarìn trasferî alc a Rome o in Venit, o darìn precedence a chescj materiâi che o vin za digjitalizât”.
✒ Oscar Puntel
Apontaments / Tarcint, Vinars 6 di Setembar aes 18, Presentazion dal libri “Feminis furlanis fuartis” di Erika Adami te terace de Biblioteche Comunâl
Redazion
L’apontament si tignarà doman, Vinars ai 8 di Mai, aes 18, te terace de Biblioteche Comunâl, vie Divisione Julia a Tarcint. La Aministrazion Comunâl di Tarcint cun la Comision de Pari Oportunitât nus invide ae presentazion dal libri di Erika Adami “Feminis furlanis fuartis” che viodarà la partecipazion di une protagoniste dal libri e de […] lei di plui +
L'EDITORIÂL / LETARE AL GNÛF VESCUL. LA LEZION DI AQUILEE NO VA DISMENTEADE
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
L’EDITORIÂL / Letare al gnûf Vescul la lezion di Aquilee no va dismenteade
Walter Tomada
Preseât bonsignôr Riccardo Lamba, gnûf Arcivescul di Udin, “La Patrie dal Friûl” i da il benvignût e i fâs i auguris pe so gnove mission. La miôr robe che o podìn sperâ, par lui e par nô, e je che al rivi a colp a jentrâ in sintonie cu la storie di cheste tiere, che […] lei di plui +
Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin
Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +