Operadôrs turistics a sclarissin il sucès
e lis grandis potenzialitâts de ciclovie Alpe Adria
«Mieze Europe e cjale al Friûl tant che une mete impuartante di cicloturisim, tant che a une regjon “autentiche” di scuvierzi biel planc cu la biciclete»: Freddy Mair al è cofondadôr de agjenzie turistiche Alps2Adria, cun sede a Clanfurt, une des primis a butâsi a plen inte valorizazion de ciclovie Alpe Adria de A ae Z, ven a stâi des ricercjis di marketing ae promozion, ae elaborazion di pachets turistics fin ae organizazion di bus spuele furnîts pal traspuart des bicicletis che inte biele stagjon a partissin ogni dì di Grau par rivâ a Salisburc.
«Ogni dì o tornìn a puartâ a cjase dai 15 ai 50 cicloturiscj ae fin des lôr feriis in Friûl – al conte Mair -. No sin la uniche agjenzie che e fâs chest servizi e tancj a doprin il tren Micotra o si organizin cun mieçs propris, duncje il fenomen dal cicloturisim su la ciclovie Salisburc-Grau al è continui e avonde imponent. Il bacin di atrazion al è chel dal mont gjermanic e dal Benelux, massime Olande, ma ancje Belgjiche. La Europe dal Est e je daûr a regjistrâ la incressite plui fuarte, ma dute la Europe dal Nord e je in potence un client otim».
E cumò si spiete une gnove ondade di interès de bande dai todescs: ai 19 di Mai passât intai programs di prime serade de Westdeutsche Rundfunk (il plui grant cjanâl televisîf public todesc e il secont in Europe dopo la Bbc) al è lât in onde un documentari di 90 minûts dal titul “Maraveôs. Traviers lis Alps cu la biciclete eletriche”, dedicât dal dut ae ciclovie di Salisburc a Grau. Il lavôr dal gjornalist Marc Schreyl (che cun chel Alps2Adria al à colaborât) al è stât viodût di plui di 8 milions di personis.
Ce isal che al riclame i amants des dôs ruedis in Friûl? «A pet di altris metis turistichis plui tituladis, ma che a somein plui “costruidis su la cjarte” par un turisim di masse – al sclarìs Mair -, il Friûl al ven percepît tant che une regjon turistiche gjenuine, di scuvierzi biel planc in biciclete. Diviers a son i elements di atrazion: lis bielecis naturâls de mont, intal trat de ciclabile di Tarvis a Mueç, il mâr, la art, la culture e l’aspiet enogastronomic».
Divuardi a pensâ, di fat, che il cicloturist al sedi un sportîf interessât dome a fâ prestazions su la biciclete e pal rest al vedi pocjis esigjencis: «Dismontât des dôs ruedis, il turist al vûl mangjâ e bevi ben, al vûl durmî in lûcs comuts e di nivel, rilassâsi in pissine o intune spa, vê propuestis turistichis e culturâls par visitâ il teritori – al evidenzie Mair -. Di chest pont di viste, cheste tipologjie di turiscj e spint in medie plui di chês altris e e je tant esigjente su la cualitât».
E in efiets, cjalant il sît de Alps2Adria (cun propuestis che a van dal Trentin-Sud Tirôl a Vignesie, dal Friûl ae Slovenie fin ae Istrie), no si trate ciert di turisim low cost: si partìs dai 100 euros in dì a persone.
Cuâl isal il judizi dai cicloturiscj sul Friûl? «Positîf su la bielece dai lûcs, l’acet des personis e la alte cualitât des propuestis enogastronomichis – al rispuint Mair -. Tra i ponts negatîfs a son la incompletece de piste ciclabile Alp Adria e la assence, tra Tarvis e Udin, di propuestis alberghieris ae altece dai nestris clients. Su chescj aspiets bisugnarès lavorâ tant e di corse». ❚
Roberto Pensa