In Regjon no passe la mozion par slargjâ la protezion dal flum ae aree tra Ciman e Pinçan, parcè che la Zonte regjonâl le vûl tignî buine par altris progjets
Eje une espression te lenghe inglese, doprade za di Chaucer tal 1300, “familiarity breeds contempt”, ce che si cognòs si à in dispresi. Cussì pal Tiliment, che a un ciert pont i forescj a àn batiât “il re dai flums alpins”, “der König der Alpenflüsse”, ma che pe int dai paîs dilunc dal cors al jere tiere sterpe e malfidade, buine par gjavâ claps o cjapâ sù vencs par fâ zeis, o bandonâ machinis di lavâ o rudinaçs.
Ancje par me, che o passavi lis domeniis di Istât intun borc ad ôr dal flum, il Tiliment al jere dome un altri puest dulà zuiâ, lûc di piçulis umiliazions dolorosis cuant che nô canais si coreve discolçs tai claps par butâsi te prime poce, cjalde e fodrade di insets, e jo, frute di citât, no rivavi a stâ daûr dal trop dai miei cusins forgjarins. Ma di fantate, cuant che zaromai o jeri a stâ tal forest e, magari cussì no, a Forgjarie o tornavi da râr, il Tiliment o ai tacât a viodilu cun altris voi. Vignint jù dal cuel di Susans, il bosc si vierzeve di colp prin dal puint dal Ciman, e il Tiliment al jere une vision bibliche, un mâr blanc di grave che si crevave in doi dilunc dal puint, viers de tiere promesse de mê infanzie.
Chê grandiositât, chel salvadi, dute chê aghe e chei claps in moviment, framieç dal salvadi de mont di Ruvigne di une bande e de mont di Prât di chê altre, al è un paisaç che al ferme il respîr. Preservade di un passât di isolament e puaretât di risorsis, tiere di storiche emigrazion, la porzion centrâl dal Tiliment e fevele, o crôt, ae anime di nô furlans, simbul de essence stesse dal Friûl. Il scritôr pordenonês Tullio Avoledo al conte di jessi lât su la mont di Ruvigne par spiegâ a so fi parcè che al veve sintût il dovê di impegnâsi in politiche cul Pat pe Autonomie. «Lu ai puartât là sù, a cjalâ dal alt il Tiliment. O sin restâts cidins a contemplâ la sô potence fragjile; fragjile par vie che e je tes mans de stupiditât, de trascurance e de avaritât dai nestris governants. Al è stât un moment maestôs. Lungje vite al Tiliment e ae nestre tiere, e a nô se o savarìn rispietâ e protezi ce che o vin ereditât e ce che o varìn di passâ aes gjenerazions futuris, cence sintîsi parons, ma custodis umii e grâts».
Al covente, al somee, jessi stâts lontans e nostalgjics come me, o vê la viertidure e la ispirazion di Avoledo, par inacuarzisi che il Tiliment al è un ben grant, lassât in ereditât dai nestris vons e che o varìn di passâ in ereditât ai nestris fîs, tant che vuardians e no parons. No àn mostrât, di fat, di vê cheste vision i conseîrs regjonâi de maiorance che a Triest, ai 26 di Jugn, no àn volût fâ buine la mozion dal Pat pe Autonomie che e domandave di unificâ lis dôs Zonis Speciâls di Conservazion dal cors mezan dal Tiliment, la ZSC “Valle del Medio Tagliamento” a mont dal puint dal Ciman e la ZSC “Greto del Tagliamento” a val dal puint di Pinçan, slargjant la protezion ancje al jet dal flum tra Ciman e Pinçan, sot de mont di Ruvigne: propit chel panorame tant cjâr a Avoledo.
Lis Zonis Speciâls di Conservazion a son areis naturâls ricognossudis impuartantis daûr dai criteris de diretive europeane Habitats (Diretive 92/43/CEE su la conservazion dai habitats naturâi e de faune e flore salvadiis). La individuazion di chestis areis, che tal imprin dal procès di tutele a cjapin il non di Sîts di Interès Comunitari (SIC), e je fate dai guviers locâi, tal câs de Italie dai guviers regjonâi e provinciâi autonoms, che le comunichin ai Stâts membris che a lôr volte le passin, pe aprovazion finâl, ae Comission Europeane. Cemût mai, duncje, la Regjon Friûl-Vignesie Julie aie decidût di escludi de protezion il toc di flum tra Ciman e Pinçan, che al à carateristichis di naturalitât ambientâl e idrogjeologjiche adiriture plui grande dai tocs a pene prin e dopo? A jessi bogns, si podarès dî che la diretive Habitats e domande la protezion di un esempli di habitat, ma no di dut l’habitat intîr, ancje se al somee strani di escludi de protezion propit il toc miôr preservât. A jessi triscj, ma ancje rea-liscj, che il status di ZSC al varès rindût plui dificile la costruzion di infrastruturis tant che une strade tra Pordenon e Glemone, e cheste e podarès jessi ancje la reson daûr de no aprovazion de mozion cumò.
I varis progjets di completament de superstrade Cimpel-Secuals fin a Glemone, come sostignût dal assessôr sacilês Sonego ai timps de zonte Illy, o di costruzion di une gnove autostrade in project financing tra Cimpel e Glemone, come favorît dal assessôr Riccardi sot Tondo, a previodin di fat la costruzion di struturis di grant impat propit te aree golenâl dal Tiliment tra Pinçan e Ciman. In particolâr, la autostrade e sarès passade cuntun tunel sot dal cuel di Pinçan, saltant fûr – extra ZSC – a pene a mont dal puint, scjavalgjant cuntun viadot la confluence tra Arzin e Tiliment, continuant in rilevât fin tal Ciman e traviersant il Tiliment di flanc dal puint atuâl.
Il progjet autostradâl al jere stât metût in bande de Serracchiani, preocupade che il trasferiment di trafic de A4 ae Cimpel-Glemone al varès metût in pericul il plan economic de tierce corsie, ma al è domandât cun urgjence dal president dai industriâi di Pordenon Agrusti, e l’assessôr regjonâl aes infrastruturis Pizzimenti nol dîs di no. Tant plui, al à declarât Agrusti, che il Venit al completarà la costruzion de superstrade Pedemontane venite tra Vicenze e Trevîs dentri dal 2020, e cence autostrade Pedemontane furlane la congjestion di trafic no sarà sostignibile. Agrusti nol dîs però che la Pedemontane Venite, ancje chê costruide in project financing e cumò il cantîr plui grant de Italie, e je stade colpide di une schirie di proviodiments judiziaris, l’ultin ai 4 di Lui cuant che 6 chilometris di galarie a Malo a son stâts metûts sot secuestri – il tierç pe galarie – cheste volte par une ipotesi di fraude: i materiâi doprâts a saressin fûr leç e plui puars di chei di progjet. Ma di là des cuistions di sigurece, se la galarie no vierzarà in timp, i pedaçs no rivaran a cuvierzi i coscj, e lis pierditis – come simpri tal project financing – a saran a caric dai contribuents. Par cumò, Pizzimenti al à anunziât il finanziament di un studi di fatibilitât, par un cost di cuasi 300 mil euros, suntun gnûf colegament tra la SR464 a Secuals e la SS13 e la A23 a Glemone, viert – al à declarât – a dutis lis pussibilitâts viariis (viôt l’articul a man drete).
In ogni câs, i camions direts tal centri-est Europe a puedin no jessi i unics elements di fastidi ae naturalitât dal Tiliment, se a vegnin scoltadis – come che al somee – lis protestis dai Comuns furlans e venits de Basse, Tisane in primis, che a domandin sistemazions idrologjichis tal cors mezan dongje o tal puest di chês programadis a val. Chest al vûl dî in particolâr la costruzion di un sbarament mobil a Pinçan, une struture di ciment largje 150 metris e alte 11, a pene a mont dal puint fûr ZSC. Tal câs di plene, la struture si siere parzialmentri creant un bacin di 18 milions di metris cubis di aghe, tai stes terens dulà che al varès di passâ il viadot de autostrade.
Intant tai paîs de Pedemontane si sta svilupant un moviment simpri plui grant di visitadôrs e turiscj leât al Tiliment. I studiôs di dut il mont a rivin a Pinçan e a Forgjarie zaromai di cuasi 30 agns, di cuant che il cors mezan dal Tiliment al è deventât il model di riferiment pe rinaturalizazion dai flums di gjenar alpin. Chest toc dal flum, di fat – in particolâr la sezion tra Ciman e Pinçan che e reste fûr de ZSC – nol à viodût oparis di regjimentazion dal flus, che al cor libar intun berdei di canâi e isulis di grave (plui di 600 isulis in dut il cors dal flum): un compuartament che al frene la velocitât de aghe, aumentant la sigurece ancje pai insediaments umans. Il merit de popolaritât sientifiche dal Tiliment al va almancul in part al ecolic todesc Norbert Müller, espert di rinaturalizazion di ambients fluviâi e inventôr dal apelatîf “re dai flums alpins”, che tal 1991 al à puartât i siei arlêfs sot de Mont di Ruvigne par un prin laboratori di studi; cumò lis robis si fasin in grant e la Universitât di Erfurt, dulà che al insegne Müller, e organize zaromai dal 2004 un workshop internazionâl anuâl sul Tiliment e i flums alpins che in gran part si ten in zone e che al viôt la partecipazion di 15 universitâts europeanis.
Ma il Tiliment nol è dome un esempli di manuâl di “flum a canâi instreçâts”, ma al è deventât un lûc dal spirt pe int di di là des Alps prin che par chei di chenti. Cuant che la Regjon e progjetave la costruzion des cassis di espansion a val di Pinçan, l’alarme al è partît dal WWF internazionâl, svuizar e austriac in primis (“il panda dai flums”, lu vevin batiât). In chê ocasion, il prin canâl de television todescje al jere saltât fûr cuntun documentari preocupât in prime time, e a ‘nt vevin scrit i gjornâi todescs e austriacs. Cumò, se si metin su Google lis peraulis clâf “Tagliamento” e “fluss”, si scuvierç un mont di articui, programs radio, documentaris, agjenziis di viaç che a ufrissin pacuts turistics di ogni sorte, simpri verts e sostignibii: vacancis in canoe sul Tiliment, in bici sul Tiliment, a pît sul Tiliment, a pît sul Tiliment dome par feminis, Tiliment e bon mangjâ furlan. Vôs di coridôr, infin, a disin che la Unesco internazionâl al tignarès a fâ dal Tiliment une risierve de biosfere plui di ce che i ten la Regjon Friûl-Vignesie Julie.
Ma l’esempli plui interessant al è chel dal carinzian Werner Freudenberger, scritôr, regjist e condutôr televisîf, che al à publicât tal 2017 il bestseller Am Tagliamento: Entdeckungen zwischen Alpen und Adria, une racuelte di 15 itineraris dilunc dal Tiliment, insiorade di un grum di mapis e fotografiis. Werner al à adatât il so libri intun program televisîf, lât in onde sul prin canâl televisîf austriac une domenie di sere. In chel al conte de sô storie di amôr cul Tiliment, di cuant che al vignive jù pe Pontebane par lâ al mâr. Al dîs che il so pont di osservazion preferît al è insom de Mont di Ruvigne: «O pensi che ognidun che si meti li a cjalâ la vastitât dal Tiliment, il re dai flums alpins, al capirà il gno entusiasim. Al è une enorme risierve naturâl, une aree protete europeane, e al è clamât cualchi volte “Il Serengeti de Europe centrâl” par vie dal grant numar di speciis animâls e vegjetâls».
Cualchidun al varà di dî a Werner che al è stât informât mâl. Sot di lui, sot de Mont di Ruvigne, no je une aree protete europeane, parcè che la nestre Zonte regjonâl le vûl tignî buine par altris progjets. ❚
Stefania Garlatti-Costa
