Jessi sindic femine in mont

Al è simpri interessant confrontâsi cu la int zovine e plene di voie di fâ di cheste tiere. Cussì al è stât ancje pe cjacarade fate cun Anna Micelli che tal Mai dal 2019 e je stade elete sindiche di Resie. No simpri jessi une femine, massime in cierts contescj e in cierts moments al è sempliç, ma jê e conte: “O partìs di une comunitât dulà che la femine e à simpri vût une posizion paritarie a pet dal om, e timp indaûr e gjestive ad in plen la famee intant che i oms a jerin pal mont. O ven di une realtât dulà che mi pesin par chel che o soi e par chel che o fâs, di là di jessi femine o om. O rivi di plui di 20 agns di volontariât te mê comunitât: o ai maduride cheste decision dopo vê fat un percors, e dal sigûr e je une cjame divierse il fat di jessi aministradôr. Dopo pôcs mês, al è rivât il Covid: passât il taramot no vin mai vût situazions tant urgjentis se no par pôc timp. In chestis ocasions, o pensi che lis nestris comunitâts di mont a àn simpri scugnût frontâ robis pardabon dificilis e mi ven tal cjâf la vite di mê none, pont di riferiment de mê famee. Te prime vuere mondiâl e à scugnût scjampâ par vie de disfate di Cjaurêt, e e je restade profughe par plui di un an; dopo tornade, e à metût sù famee e e je deventade mari intant de seconde vuere mondiâl, cui todescs in cjase. A 70 agns e à passât il taramot e e à scugnût tornâ a fâ sù la cjase, e e à judât a tirâ sù i nevôts… Duncje, par me nol è nuie che no si puedi superâ cjapant un probleme par volte, vivint dut ce che al sucêt tant che une oportunitât! De storie si impare tant, e jo o ai la fortune di jessi part di une comunitât che e à savût mantignî vive une lenghe par agnorums, tignint di cont musiche e bai che a continuin in ore di vuê a jessi tramandâts ai zovins in forme orâl. I zovins a imparin a sunâ a orele, no son musiciscj ma la energjie che e ven fûr dal lôr sunâ e je incredibile.”
◆ “Ciert al è che vivi in mont vuê al coste fature – e continue Anna – e mi displâs dîlu, ma secont me dal taramot incà nol è stât fat un vêr progjet furlan su la mont. La mont no pues jessi viodude dome come un lûc di vacance ma come un lûc di vite che al va sostignût! Se jo o ai une scuele cun 52 fruts intun comun che al è larc 4 km e lunc 20 sul confin cu la Slovenie, fevelìn di ce che a son chescj 52 fruts! Nol è pussibil spostâju, a partegnin al lôr paîs; dut chest al compuarte coscj e valutazions plui inlà, ma al è impuartant resonâ su pe mont e sui servizis e no dome sui numars! Da sigûr al è evident il câl demografic, ma chei 5 fruts che chest an a nassaran a àn dirit a vê une vite intal lûc dulà che a nassin! Une comunitât e continue a jessi vive parcè che a son fameis e fruts.”
◆ E su da lenghe roseane e zonte: “Cuant che o levi aes mediis, no podevi fevelâ par rosean parcè che nus metevin la note. Vuê tes scuelis si fasin lezions di culture roseane. Vê une proprie lenghe, vê tradizions al è un alc in plui. Al è stât un pas impuartant ancje jessi inserîts inte leç di tutele des minorancis linguistichis. Il frut che al fevele par rosean si puarte daûr un mont, il mont di chei che a son stâts prime di nô e che al à dât un significât a dut chest e nus al àn tramandât. E chel toc di lidrîs lu puartarìn daûr te valîs de vite: ancje se o larìn ator pal mont, o savarìn simpri cuale che e je cjase nestre. Cheste e je la ricjece di vivi in mont. Cualchi volte di Invier – che tor lis 4 di dopomisdì al ven scûr –, cuant che tu jentris te val tu viodis la mont Cjanine plene di nêf e il soreli che al va a mont le vistìs di colôrs spetacolârs, che nancje Giotto al varès podût meti suntun cuadri. A nassin sensazions e emozions che, vivintlis ogni dì, nus dan une vore di energjie positive. Chescj biei ambients a àn di jessi ripopolâts. O vin di impegnâsi a clamâ e a intercetâ la int che e à voie di cambiâ il so mût di vivi.” ❚