Pôcs editôrs, ma bogns, pe produzion leterarie in marilenghe
I letôrs de Patrie lu san ben: par lei alc di scrit intun furlan di sest, al baste vierzi lis pagjinis dal gjornâl. E ce gjonde (pal cjâf ma ancje pai voi, stant che nol è simpri facil cjatâ libris cui acents tal puest just) di cuant che la linie editoriâl si è slargjade ancje inte golaine “La machine dal timp”, cun propuestis par tornâ a scuvierzi la nestre storie e i nestris personaçs, di un timp e di cumò.
◆ Se si à gole di slargjâ la voglade, dut câs, nol è facil indreçâsi inte propueste editoriâl (no masse numerose e inmò mancul valorizade) in lenghe furlane. Lassant pierdi il mont des autopublicazions o des stampis in numar limitât (dificilis di cjatâ, ma dispès scritis cui pîts), a van segnalâts i libris de Kappa Vu, une des cjasis editoris storichis e resistentis, che e à fat de lenghe furlane il so pont di fuarce (o forsit al è il jenfrisegn de sô vision utopiche, cuissà). De fin dai agns Otante (cuant che al furlan no i vignive nancje ricognossût il status di lenghe), e je lade indevant a produsi ogni an bombons di publicazions, ancje intal setôr de didatiche, de infanzie e de traduzion, cuntune cualitât une vore alte sedi pes propuestis, sedi par chel che al inten i autôrs e il stîl doprât. Inte sezion de narative, no si pues no nomenâ la golaine “La comugne”, di li che a son saltadis fûr lis creazions di scritôrs di gale, tant che Raffaele Serafini (“Contis di famee”, “Altris contis di famee”, ma ancje il romanç distopic “Zaraton”), Checo Tam (“Scûr di lune”, “Disvuedant il scansel”), Gianfranco Pellegrini (“Cun altris voi”, “Cuatri stagjons dal an”) o Stiefin Morat (“Kebar Krossè”), plui cognossût par “Donald dal Tiliment”, romanç sfolmenât e trastolon publicât di Cormôr Salvadi (dificil di comprâ, plui facil cjatâlu in cualchi biblioteche, ocjo che nol à nuie a ce fâ cu la grafie uficiâl).
◆ Se si à voie di lâ plui insot intal agâr dal Premi San Simon, il plui impuartant ricognossiment pe leterature par furlan, inmaneât dal Comun di Codroip, si pues lâ a cirî lis oparis de golaine “Fûrlanie” de Forum, che e veve publicât ancje i vincidôrs dai prins agns dal mileni (“Il cop” di Laurin Zuan Nardin, “Coventave vê pôra?” di Alberto Luchini, “Jo e Luzie” di Adriano Nascimbeni, un autôr che al à savût traficâ ben intal gjenar zâl, “Speriments di perfezion” di Tarcisio Mizzau, lis oparis di Franco Marchetta e “Soreli jevât a mont” di Raffaele Serafini). Intai ultins agns, invezit, la publicazion e je passade ae Societât Filologjiche Furlane, che e cure ancje la revision dai tescj inte grafie uficiâl. Par cumò, la golaine e cjape dentri dome i nons di Raffaele Serafini e Gianluca Franco, che si son dâts la volte dal 2015 al an passât, ancje se no mancjin lis novitâts inte sezion fumuts, simpri de stesse cjase editore (“Silvie e l’orcul” di Giò Di Qual, “Aventure spaziâl” di Mimo Fort, cun daûr “La stravagante maniere cjatade fûr a Udin par risolvi il probleme des epidemiis”, simpri di Giò Di Qual, e “Friûl in tâl mont”, di Lorenzo Marangone e Giulia Stirpe). Alì de Filologjiche si puedin cjatâ ancje copiis di cualchidun dai autôrs “classics” de leterature furlane dal Nûfcent (Maria Forte, Ovidio Colussi, Adelchi Tirelli), ancje se la plui part dai nons (Dino Virgili, Lelo Cjanton, Riedo Puppo, juste par dî uns doi nons), e je aromai fûr di cumierç e cun fature si le cjate intes bibliotechis (ancje se bisugne laudâ i progjets des vitrinis digjitâls par meti a disposizion i tescj in linie, che dut câs no son simpri cussì facii di doprâ pai letôrs plui tradizionâi). Nol sarès un mâl pensâ a une ristampe, cul justament inte grafie uficiâl, propit come che al è stât fat par “Lis predicjis dal muini” di pre Bepo Marchet.
◆ A proposit di predis, no si pues dismenteâ il grant lavôr di Glesie furlane par fâ cognossi lis oparis e il pinsîr dai siei fondadôrs, massime chel di pre Antoni Beline, ancje se nol è cussì facil rivâ a cjatâ ator lis publicazions.
◆ Al va dit che di cualchi an l’interès pe lenghe furlane si è slargjât ancje a altris cjasis editoris (dongje de storiche Campanotto, o nomenìn dome Orto della Cultura, Aviani, Corvino, Futura), ancje se, magari cussì no, no simpri e ven garantide la coretece de lenghe scrite, a conferme dal fat che al è dibant vê storiis e penâi di aur, se dopo par pretension o ancje dome par sflacje (ricuardant che al varès di jessi un dovê dal editôr chel di garantî la cualitât de opare) si va a gjavâur dignitât e si impantane sù dut intun furlan peât cul filistrin, che nol va ben nancje par tignî sù lis tiracjis. ❚
