Il Parlament de Patrie dal Friûl. Storie de plui antighe assemblee legjislative di Europe 1228-1805. Bielzà te seconde part dal titul di chest libri si à la rispueste a une des domandis che dispès si fâs in cont di cheste istituzion: ma il Friûl aial vût pardabon il prin Parlament european?
La rispueste dade di chest titul e rive de vore che Guglielmo Cecone, di Feagne, al à fat tes 313 pagjinis dal libri che Corvino Edizioni (di Feagne) al à a pene mandât fûr, une vore che e stave tal scansel di cuarante agns, no cate che par fâle l’autôr si sedi documentât in prime persone su lis cjartis dal Parlament tignudis di cont te biblioteche Joppi di Udin. Une vore di apassionât, che je stade poiade ancje dai studis che a jerin stâts fats prime, in particolâr chel di Pier Silverio Leicht, che il Parlament però lu à studiât soredut dal pont di viste juridic e dome par une part de sô vite.
Duncje, Cecone, isal o no isal il Parlament plui vieri di Europe?
Dal sigûr al è il prin che al à pardabon guviernât il so teritori di riferiment. Mi spieghi: al è nassût tal 1228 e su chei agns al è dificil dî cun ciertece assolude cui che al è rivât par prin. Te Universitât di Pise, dulà che o ai studiât e scuviert il Parlament dal Friûl, o ai vude la idee che lu considerassin pardabon il prin, ancje par vie che in Ingletiere prime dal nestri Parlament e je nassude la Magna Charta, no l’orghin legjislatîf.
Ma ce intindial cuant che al dîs che, dut câs, al è stât il prin a guviernâ il teritori di riferiment?
Chei altris Parlaments di chês etis alì a vevin tai lôr stâts une dinastie di princips: muart un princip, al rivave subit chel altri e a jerin chei a vê il guvier. Te Patrie, invezit, il podê temporâl e spirituâl al jere dal Patriarcje. Cuant che al murive, chel gnûf al veve di vê il vie libare dal pape a Rome e dal imperadôr todesc. Stant che no jerin timps di e-mail, par che al rivàs a instalâsi cun ducj i siei podês a passavin mês. Ma la Patrie no jere a bandon. Il guvier lu tignive il Parlament e la sô Zonte.
Par fâ ce?
Su chest cantin, al à bielzà scrutinât une vore il Leicht: al veve competencis in cont militâr, finanziari, rapuarts cui Stâts forescj; al veve podê legjislatîf e judiziari e control aministratîf. Lu componevin rapresentants dai predis, dai cjastelans e des comunitâts, che a son stadis in numar variabil daûr des etis, ma dentri une ventine.
Cuale ise stade la ete plui sflandorose di chest imprest “democratic” in plene Ete di Mieç?
Dal sigûr chê patriarcjine, de nassite, ai 14 di Avost dal 1228, fintremai al 1420, cuant che la esperience de Patrie e finì passant sot Vignesie. Po dopo e je stade la ete veneziane e chê austriache. Il Parlament al fo scancelât di Napoleon, tal 1797: la ultime sentade e je stade fate tal 1798, ancje se jo o ai cjatât verbâi dal Parlament che a rivin fintremai ai 10 di Avost dal 1805.
Il so libri al ripuarte une par une dutis lis datis des sentadis e ancje i components dal Parlament tai diferents periodis storics. Cuant vevie di riunîsi cheste assemblee?
Cuant che al jere necessari. Ancje sîs o siet voltis ad an, par chel che a disin lis cjartis, ma ogni anade e fâs storie par se. Al è capitât ancje une o dôs voltis, soredut tai ultins agns. A son stâts agns che non si son fatis sentadis: par esempli dal 1667 al 1671, par vie di une gnove balfuerie tra la citât di Udin e la Assemblee.
Al jere ancje un Parlament torzeon… Cuant che vuê si dîs che il Friûl al è policentric si à un esempli autorevul che lu pant…
Cun di fat, fintremai che Udin nol à vude la prioritât su chês altris comunitâts dal 1420 indevant, lis sentadis dal Parlament si fasevin un pôc dapardut: Cjampfuarmit, Cividât, Aquilee, Maran (1301), Glemone, San Denêl, Sacîl, San Zuan di Manzan, Puart, Tresesin, Feagne. A partî dal 1423, il Parlament si cjatà simpri a Udin, fale dôs voltis che al le a Cividât, no si sa parcè. A Udin si è riunît in lûcs diferents – la ex glesie di Sant Francesc, la sagristie dal domo, la spassizade dal palaç comunâl, fintremai che no fo fate la sale dal Parlament.
Antonella Lanfrit
