La Union Europeane (UE) e à fat un pas indenant impuartanton dilunc de strade che e varès di puartâle a vê normis specifichis in cont de inteligjence artificiâl (IA). Miercus ai 13 di Març stâts il Parlament European (PE), cun 523 vôts a pro, 46 cuintri e 49 astignûts, al à fat bon il test di un regolament di pueste, lant daûr dal acuardi fat cui guviers dai Stâts e de domande di intervent in chest cjamp fate indenant inte suaze de Conference in cont dal avignî de Europe.
◆ Il gnûf at legjislatîf de UE al à ancjemò di vignî perfezionât, par vie che a mancjin ancjemò doi passaçs prime de sô publicazion su la Gazete Uficiâl de Union Europeane e de sô jentrade in vore: a son la retifiche tecniche par cure di juriscj e linguiscj, che a àn di verificâ la coretece formâl e sostanziâl dal test in dutis lis lenghis uficiâls, e il vôt a pro de bande dal Consei de Union. Lis proceduris legjislativis a varessin di jessi completadis prime des gnovis elezions europeanis.
◆ Il regolament al è stât metût adun cun chê di frontâ la cuistion de IA e cul intindiment di garantî la sigurece, di difindi i dirits di fonde, di promovi la inovazion e la sostignibilitât e di permeti ae Europe di vê un rûl di vuide in chest cjamp a nivel planetari.
◆ Tra lis normis fatis buinis dal PE al è un diviêt esplicit pes aplicazions de IA che ur fasin cuintri ai dirits dai citadins, tacant dai sistemis di categorizazion e catalogazion biometriche che si fondin su elements sensibii e che a metin adun bancjis di dâts di ricognossiment faciâl su la fonde di imagjins tiradis fûr di internet o di regjistrazions video. A saran fûr leç ancje i sistemis di ricognossiment des emozions tai puescj di vore e tes scuelis, lis pratichis di polizie preditive che a van daûr dome de profilazion e lis formis di manipolazion dai compuartaments e di disfrutament des vulnerabilitâts des personis.
I sistemis di identificazion biometriche no podaran jessi doprâts nancje de bande des fuarcis dal ordin, fale che in câs specifics e in cundizions ben definidis. Par esempli, se si cirin personis disparidis o ben pe prevenzion di atacs teroristics.
◆ Cun di plui, si podaran fâ identificazions “in timp reâl” dome lant daûr di autorizazions judiziariis o aministrativis e dentri di limits precîs di timp e di spazi, intant che lis identificazions “in timps seguitîfs” a saran ametudis dome daûr di une autorizazion judiziarie che e à di jessi peade a un reât.
Oblics precîs a tocjin ancje altris sistemis di IA che a vegnin classificâts tant che pericolôs pe salût, pe sigurece, pai dirits des personis, pe democrazie e pal ambient. Al è il câs di ûs diviers de IA tai cjamps de istruzion, de formazion professionâl, de justizie e dai servizis publics e privâts (de assistence sanitarie aes bancjis).
◆ Lis peraulis di ordin a son atenzion, trasparence e garanzie di control uman. Di une bande a son ricognossûts nivei diferents di impat e di pericul, che a domandin proceduris specifichis di verifiche e di ûs, e di chê altre e ven regolamentade la pussibilitât de bande dai citadins sei di domandâ sclariments in cont des decisions fondadis sui sistemis di IA che ju tocjin in maniere direte che di fâ indenant reclams plui specifics. Si previôt ancje la etichetadure des imagjins e dai contignûts audio e video che a son artificiâi o che a vegnin manipolâts.
◆ A nivel statâl a vignaran prontâts spazis di sperimentazion normative e di prove in cundizions reâls dai sistemis di IA par che a vegnin fats, disvilupâts e controlâts par ordin prime di metiju sul marcjât.
Dopo de jentrade in vore formâl, daûr di chê che e sarà la sô publicazion su la Gazete Uficiâl de UE, a coventaran doi agns pe metude in vore complete e sostanziâl dal regolament. ❚
Inteligjence artificiâl, il Parlament European al fâs bon il regolament che al vûl garantî sigurece, dirits e inovazion
Marco Stolfo![](https://www.lapatriedalfriul.org/wp-content/uploads/2024/06/Intelligenza-Artificiale.png)