Une farie di iniziativis par valorizâ il teritori e influençâ in maniere positive la comunitât
Ce isal un Ecomuseu, e cuale ise la storie dal Ecomuseu des Aghis dal Glemonàs?
Cu la peraule “ecomuseu” si intint un museu, finanziât de Regjon, che al à la carateristiche di jessi teritoriâl (intal sens che al lavore suntun teritori che al cjape dentri un o plui Comuns), e di jessi partecipatîf (parcè che lis ativitâts fatis a àn di cjapâ dentri in maniere ative lis comunitâts).
Al va ancje evidenziât che un ecomuseu al è un museu “iregolâr”, parcè che a diference di un cualsisedi museu nol à une colezion normâl, ma la sô colezion e je fate di bens minôrs che a caraterizin il teritori là ce che al è atîf.
◆ Fondât intal 2000, l’Ecomuseu des Aghis dal Glemonàs al è il prin e chel plui vieri dai siet ecomuseus presints cumò in Friûl (che a son “Lis Aganis” di Manià, “Val Resie” a Resie, “Val dal lât”a Cjavaç, Bordan e Trasaghis, “Territori” a Monfalcon, “Il Cavalîr” di Feagne e “I Mistîrs” di Paulâr), e al cjape dentri il teritori dai Comuns di Glemone, Dartigne, Buie, Maian, Montenârs e Osôf.
_
Cuâi obietîfs sono la fonde de vuestre ativitât?
“L’ecomuseu al promôf une schirie di progjets che a son indreçâts no dome al volê valorizâ il teritori, ma ancje a cjapâ dentri e in cualchi maniere “influençâ” in maniere positive la comunitât par che il patrimoni teritoriâl al vegni cualificât e sostignût. Un esempli concret di chest al è il cors “Cantîrs dal paisaç” che o organizìn an par an e che al permet ai iscrits al cors di imparâ la art de costruzion dai mûrs a sec, e ancje, cjalant l’avignî, a dâ valôr a chest gjenar di ben de tradizion furlane.
_
Cuâi sono i vuestris progjets plui significatîfs?
“A son cierts progjets che za di cualchi an o puartìn indenant cun sucès e cun cadence anuâl.
Un di chescj a son i concierts intai rocui di Montenârs, che chest a rivin ae lôr otave edizion.
Cemût che tancj a san, i rocui a son i boscuts artificiâi che in passât si dopravin par oselâ. Il nestri progjet al cîr di convertî i rocui in lûcs di culture e di ricreazion, doprantju par fâ concierts simpri caraterizâts di musichis popolârs, tradizionâls e in lenghe furlane. Elements fondamentâi dal nestri patrimoni culturâl a son la toponomastiche, i cjants, lis liendis, lis lenghis e la architeture carateristiche dal teritori. Chescj a son ducj ogjet di analisi de bande dal Ecomuseu.
◆ Un altri tra i nestris progjets plui significatîfs al è il za citât cors di mûrs a sec: a son cors vierts a ducj e sore nuie, e a durin dôs setemanis. I partecipants a restaurin un vecjo mûr di claps che e à bisugne di manutenzion, imparant cussì la abilitât di tornâ a fâ sù chescj mûrs che une volte si dopravin a larc intes ativitâts leadis ae culture contadine.
Cun di plui, di une desene di agns incà, o realizìn un lunari a teme, che ogni an al tocje un teme diviers, ma che dut câs al è simpri peât al patrimoni popolâr minôr difondût e presint sul nestri teritori. Chest an, par esempli, il nestri calendari al è dedicât aes anconis, duncje a une tematiche religjose.
◆ Un altri progjet, che i tignìn une vore, al è la poie ae ativitât des latariis turnariis, che fin a cualchi timp indaûr a jerin une vore sparniçadis sul teritori furlan. Il funzionament di chês latariis al jere diferent di chel des latariis di vuê: in chei timps, di fat, ogni famee di arlevadôrs e puartave ae latarie il so lat prodot in cjase par lavorâlu e trasformâlu rivant ae produzion dal formadi. Ogni arlevadôr al puartave duncje a cjase la cuantitât di formadi che i tocjave, calcolade daûr de cuantitât di lat che al veve puartât par produsilu.
A vuê, in dut il Friûl, a son restadis dome vot latariis turnariis, e une di chestis e je a Lessi (frazion di Glemone).
◆ Simpri cul obietîf di valorizâ e difondi la cognossince di chestis pocjis realtâts “sorevivudis”, o vin lavorât par realizâ la mostre “Latte Mleko Milk. Il sistema turnario nell’arco alpino”, là che si mostrin lis ativitâts des latariis turnariis di Lessi, dal Trentin e dal Venit, che a àn colaborât cun nô.
◆ La mostre e à visitât Glemone, Peio (TN), Morel (frazion dal Comun di Limana – BL), Resie, Cjaurêt, Bohinj, e cumò e je al Museu etnografic di Udin (dai 15 di Març ai 2 di Jugn). Chest ultin al rapresente un grant risultât par nô, stant che e je la prime volte che un museu e un ecomuseu a colaborin par une iniziative che ju tocje in maniere direte.
◆ Simpri su chest teme, al è stât realizât un documentari cul titul “Latte Nostro” cu la regjie di Michele Trentini, che al è stât presentât ancje in ocasions impuartantis tant che l’event “Terra Madre” di Turin e il Film Festival di Trent.
Par sierâ, o vin organizât, li de latarie turnarie di Lessi, la pussibilitât di fâ visitis pes scuelis, e o organizarìn ancje cercis di formadis cun chê di fâ cognossi la cualitât di chestis produzions sanis e tradizionâls.” ❚
