«L’ideâl al sarès dâ une regjie aes scuelis
par judâlis a sigurâ chê che e je
une oportunitât cognitive no di pôc»
«Al è tant ce fâ, nol è timp di pierdi». Nomenade ai 15 di Zenâr, Patrizia Pavatti e à tacât daurman a lavorâ intun clime une vore positîf, cuasi di aprovazion gjenerâl. Femine di scuele, preparade e cuntun stîl felpât, ma decîs, la sô nomine e à vût cussì bon acet parcè che e je considerade la persone juste intal puest just: ma cussì tant gradiment, no ise ancje une responsabilitât in plui? «Sigûr – nus rispuint – al è un grant plasê vê ogni dì un grum di auguris e di manifestazions di sodisfazion di bande di tancj che o ai cognossût intai agns che o ai dedicât al lavôr inte scuele. Al è ancje di dî dut câs che la stime de int e cree une vore di aspetative: ducj si spietin che la situazion e ledi in miôr, e la responsabilitât e je tante. Jo o cognòs lis mês cualitâts e ancje i miei limits, e par chest o varai bisugne dal jutori di ducj. Il lavôr di scuadre al premie simpri».
__
Diretore, in ce stât isal vuê l’Ufici scolastic regjonâl?
«O sin in soference fuarte, prin di dut intal numar. Tai ultins agns la plante organiche, che e varès di vê 135 dipendents, e je cuvierte dome di 66 unitâts: mancul de metât. Al è clâr che jo o stoi cirint di vê plui personâl par podê tornâ a meti in vore ad implen une machine che fin cumò e à funzionât dome in gracie dal grant valôr dai siei dipendents. Ma ancje vint grandis ideis, cemût si fasial a metilis in vore cuant che il personâl al à di fâ i salts mortâi? Se o rivassin a vê plui dipendents, almancul recuperant ce che o vin pierdût cui pensionaments e il bloc dal turnover, alore si podarès resonâ cun plui trancuilitât su ce che i covente ae scuele furlane».
__
E ce ur covential ai nestris scuelârs? In ce cundizions sino?
«La nestre scuele e je di grande cualitât. Lu confermin ducj i scrutinis talians, des provis Invalsi ai test Ocse Pisa. In medie, e je une scuele di avanvuardie. Dut câs, a son scuelis dulà che al è un risultât pardabon ecelent par vie di un contest che al jude: un teritori che al ten ae istruzion dai fruts, ents publics che a judin, un cuarp docent stabil e coinvolt che al lavore intune direzion univoche. In altris câs nol è cussì: al è di fâ un sfuarç dopli, ven a stâi ridusi i câs dulà che lis scuelis a viazin a velocitât diferenziade, e potenziâ la ufierte formative dai nestris istitûts peantle simpri di plui aes dibisugnis e aes vocazions dal teritori di riferiment».
__
Ciacarant di teritori, o fevelìn di lenghis…
«Clâr. Se o fevelìn di coerence cu la identitât di une tiere, al è incredibil che il patrimoni plurilengâl nol sedi doprât par fâ dal Friûl-Vignesie Julie une regjon speciâl pe competence linguistiche dai siei zovins».
Al sarà di crodii, stant che la Pavatti e je stade referente pal plurilinguisim dal Ufici scolastic regjonâl e e à disvilupadis une vore di iniziativis su chescj temis (ultin il progjet Rush, finanziât intal program Erasmus Plus, cu la partecipazion di partners de Galizie e de Cravuazie, ndr).
__
E la situazion de leç 29/2007 sul furlan a scuele, cemût podìno considerâle? Stant che la nestre int e domande l’insegnament de lenghe, ma i fonts a rivin simpri plui tart, e no simpri si cjatin i insegnants, ce si puedial fâ par miorâ la situazion e par garantî a ducj chei che lu domandin il plen rispiet de leç?
«O cjati che il regolament dal 2011 par vierzi la pussibilitât di insegnâ a ducj chei che a podevin vê titul, ancje cence une preparazion specifiche certificade, al fos la uniche soluzion percoribile: se no o saressin ancjemò in spiete di meti in vore la leç. In chescj agns al è stât fat tant, ma cumò si pues viodi ancje lis robis che a àn funzionât di mancul. Jo stesse o ai relazionât inte suaze de ultime Conference di verifiche sul stât di atuazion de leç 29 su lis problematichis di chest setôr».
__
In ce si puedial incidi?
«I docents tal elenc regjonâl a son tancj, ma no son avonde chei che a son a disposizion par insegnâ fûr dal lôr sît di vore abituâl. Di chê altre bande, e je int titulade a insegnâ, ma che no si è mai metude in elenc: nissun ju à motivâts avonde, ma a laressin coinvolts e sostignûts. A son scuelis che metintsi in rêt a podaressin risolvi chescj problemis, ma a son ducj procès di sburtâ. E soredut di monitorâ, parcè che fin cumò, cu lis fuarcis a disposizion e cun ducj i problemis che o vin za frontât, nol è stât pussibil tignî a ments in timp reâl la situazion. L’ideâl al sarès dâ une regjie aes scuelis par risolvi chescj problemis e judâlis a sigurâ chê che, ancjemò prin che un dirit di leç, e je une oportunitât cognitive no di pôc».
__
Si rivaraial a risolvi il probleme dai dirigjents e dai diretôrs dai servizis aministratîfs?
«Si scuen! La situazion dai nestris istitûts e je une vore dificile. Eroiche, si podarès dî, pensant a chei dirigjents che a àn un grum di scuelis e di ples di vuidâ tant che rezidôrs, e che a mertaressin une medaie. Un bon segnâl al è la grande cuantitât di candidaturis pal concors pai dirigjents pai servizis aministratîfs. Al sarà plui lavôr a corezi lis provis preseletivis, ma dal sigûr a saran avonde lis personis cualificadis par stropâ lis tantis busis tai organics des nestris scuelis. E po, mi somee che ancje pai dirigjents a saran çoncjadis lis proceduris e, se al vignarà ridefinît il lôr percors formatîf, par Setembar jo o speri che i gnûfs dirigjents a saran za tal lôr puest».
__
A nivel di docents, di ce vino bisugne? Si fevele de necessitât di cjatâ i insegnants di sostegn…
«A dî la veretât dispès nol è facil nancje cjatâ insegnants pes scuelis de infanzie e pes primariis. Intes secondariis a laressin cjatâts insegnants di classis di concors tecnichis e ancje di matematiche. Par ce che al inten il sostegn, che al è un teme seri e ineludibil, il probleme nol è dome il numar di chei che ancjemò a coventin, ma ancje la formazion di chei che a son za in servizi. In chest moment, une part dai docents e ven di une classe di concors diferente e bisugne che a vedin un percors formatîf di pueste par davuelzi in maniere otimâl il lôr lavôr di supuart ai students».
__
In ogni câs, la vision di fonde che e doprarà tal so lavôr cuale ise? Se e podès cjalâ indevant e viodi cemût che e varès di jessi la scuele furlane ca di 10 agns, ce speraressie?
«Mi plasarès che la nestre scuele e tignìs dûr intai siei risultâts e inte sô nature, une vore peade ae inovazion, al lavôr in rêt, ai ambients di aprendiment digjitâi e al contat cul mont dal lavôr. Dutis chestis carateristichis a fasin part dai Sustainable development Goals che la Onu nus à dât tant che obietîfs pal 2030. O sin za indevant, ce che nus mancje e je une cussience plui fuarte dal valôr des lenghis intun contest moderni. Il sium al sarès chel di fâ cressi une scuele cun plui lenghis: lis cuatri dal nestri teritori, ma ancje chês de comunicazion globâl».
Une clâf pal nestri avignî, duncje, a judizi de gnove diretore dal Ufici scolastic regjonâl e ven de cognossince dal patrimoni plurilengâl che tai secui si è insedât in cheste regjon. Par jessi bogns di vierzisi un troi tal mont, ma ancje par puartâ indevant la economie des nestris comunitâts, bisugne jessi bogns di fevelâ plui lenghis: par jessi bogns di lâ pal mont e fâ fortune, bisugne prin cognossi lis nestris lidrîs. Par cressi citadins cussients e libars, bisugne vê une scuele di cualitât che e jude a pensâ cul propri cjâf e a risolvi i problemis, no zirantsi di chê altre bande. Al Ufici scolastic regjonâl cumò chestis robis a somein tornâ a contâ. E no je robe di pôc. ❚
Walter Tomada
