Intun libri il rispiet pal bosc, une risorse cence fin

Za fa cualchi setemane un cjâr amì e artist valent intal lavorâ il len mi à puartât un libri burît fûr di un barachin intun marcjât des antigaiis in Austrie. Stant che si rangje avonde ben cul todesc, a ’nt veve capît subit il spirt, ma al veve voie di lâ plui indentri inte comprension. Mi à domandât alore il plasê di voltâjal par talian. E cussì o ai fat. A son za aromai decenis che o voi daûr de filosofie pandude dai tescj di une altre cubie di austriacs, Johanna Paungger e Thomas Poppe, che e insegne a dipuartâsi daûr dai timps de nature, massime des fasis de lune, e o ’nt gusti i vantaçs. Pecjât che chescj tescj a son dibot manuâi rûts e duncje adats par une consultazion câs par câs, impen di une gustose leture.
◆ Il libri che o ai vût fevelât disore, invezit, salacor propit in graciis dal stîl sempliç e une vore dongje dal discorsîf, al regale une leture vierte a ducj, fasintnus jentrâ intal dûr mont dai contadins di alte mont, come chê dal autôr. Si palese cussì cetant atuâl intun moment schizofrenic come il nestri, là che a son inmò elements che – forsit par interès che no son palesâts – a stan demonizant il len a pro di altris materiâi discutibii, seial in cjamp edilizi seial inta chel dal riscjaldament.
◆ L’autôr, Erwin Thoma, al à passade dute la sô vite intal mieç de nature intai boscs dal Tirôl e dal Salon e, daspò di une lungje esperience tant che vuardie forestâl, al continue la gjestion de see de sô famee.
◆ Bielzà il titul dal libri al è inmagant e al pant il spirt profont dal so contignût – “Dich sah ich wachsen” (Ti viodei cressi) – tirât fûr di un viers de splendide “Laude al len” di Pablo Neruda, che e vierç il test e nus fâs capî daurman l’amôr stragrant che al ten dongje l’autôr ai siei boscs e ai siei arbui. Boscs e arbui di tratâ simpri cun rispiet infinît, stant che – cussì nus insegne – il bosc al è pe umanitât une risorse cence fin, in stât di autorigjenerâsi di un continui, simpri che a ’nt vegni rispietade la nature, e di cuvierzi lis nestris dibisugnis seial pes costruzions seial pal riscjaldament. Si trate nome di fermâsi un fregul intal convuls che nus à metût intor la corse dal progrès, che salacor nus sta puartant ae distruzion, e di imparâ un altri viaç a vivi daûr dai ritmis de nature, come che a fasevin i nestri vons, lassant al bosc il timp di cressi e al len chel di jessi pront par jessi doprât. Il len, se al ven impleât daûr di chescj cjaveçs, al met in vore un cicli naturâl perfet, de menade de semence ae sô cressite, al tai e ae utilizazion – scomençant dai zuiatui pai canais fin ai imprescj pe vite e pal lavôr di ogni dì, pe edilizie e pe combustion – par tornâ ae fin ae tiere, in forme di cinise e humus, ancje midiant dal ricicli. Ma simpri dome a une cundizion: il rispiet de sô nature, la scolte dai siei ritmis e dai siei timps, sghindant l’ûs di sostancis chimichis e artificiâls.
◆ E la nature, il bosc cui siei arbui, nus ricompensaran cu la durade dai manufats, cu la salubritât dal aiar che o respirìn, regalantnus cussì un bonvivi gjenerâl, ma soredut proferint une sperance aes gjenerazions che a vignaran. ❚