Ise daûr murî la scjalade alpine?

Pôc plui di trê agns indaûr si screà intes Alps Cjargnelis une vie di scjalade sul Gabelekopf (pôc daûr de Cjanevate) a 2289 m di altitudin. La parêt e je calcolade une des plui lungjis in Carinzie e dal sigûr no je robe di diletants o par scjaladôrs de domenie. Une falope ur fasarès fâ dal sigûr une brute fin.
◆ Za fa doi agns, sù par jù, dôs vuidis alpinis, par rivâ in ponte, a àn implantât une cuarantine di spits, che a son i ancoraments di sigurece di un cm di diametri che a vegnin ficjâts intal cret par uns vot centimetris indentri, a une distance di 15-20 metris. Ben, nol è tant che i doi alpiniscj a àn cjapât pueste che no si spietavin: a son stâts denunziâts dal paron dal puest. Di in chê volte il mont dal alpinisim al è sot sore. Se i ven dade reson ae part acusadore, si larès dal sigûr incuintri a consecuencis cetant penzis. I doi acusâts si discolpin contindint che chest al puartarès ae muart de scjalade alpine, intal mût che lôr le àn cognossude. Ma ancje in altri câs, une sentence a pro di lôr doi e podarès fâ nassi problemons intai rapuarts jenfri nature, turisim e parons dai fonts, tant che a san ben dutis lis parts in cause.
◆ Intun câs o inta chel altri, za di cumò si pues previodi che la sentence dal tribunâl civîl e segnarà il troi viers la Cort Supreme… e si sta creant un precedent.
◆ La prime udience si je sierade za fa cualchi dì cuntun nuie sul nuie, pa la cuâl il judiç competent al à decidût di fâ un sorelûc, si ben che no si sepi inmò se in machine, a pît o cuntun elicotar: ma chest al dipendarà ancje des cundizions dal timp. Sul puest si varà ancje di sclarî se i doi alpiniscj, sbusant il cret par ficjâ i lôr rimpins, a vedin fat un at ilecit su la proprietât di altris o se il paron de aree al scugnedi tolerâ cheste forme di alpinisim.
◆ Dut câs i doi alpiniscj a pensin di no capî plui chest mont (e no dome lôr!). Lôr, cun di fat, a àn fat meti neri su blanc, intant de udience, di jessi i prins e i unics a finî in tribunâl di cuant che a esistin lis primis scjaladis, e che i spits a son imprescj doprâts zaromai di desenis di agns. Ducj ju varessin doprâts di simpri, tacant dai fradis Huber e di ducj i grancj scjaladôrs. A zontin ancje che no laressin plui sul Gabelekopf par vie che al è masse dificil e che il pericul al è in vuaite dulinvie di ducj i 750 metris di rimpinade di chest percors. Si che duncje, par lôr la esperience e sarès finide, ma alore il judiç al à volût savê il parcè di cetante straçarie di energjie e di pericul; i doi acusâts a varessin rispuindût tirant fûr l’amôr pal alpinisim e la voie di scuvierzi alc di gnûf, e a chest si zontaressin ancje la braùre e il tentimbon. Stant a lôr in Carinzie a saressin restâts une vore pôcs in stât di frontâ cheste scjalade. Par rivâ su la spice, cun di fat, bisugnarès passâ une gnot in parêt, tant che lôr a àn fat intant de prime rimpinade.
◆ L’acusadôr al à pôre che ator a sedin emuladôrs e si sintarès disturbât inte sô ativitât di boscadôr e cjaçadôr. Ancje il pasc al podarès vê cualchi fastidi. Stant a lui, cun cheste prime rimpinade i doi alpiniscj si saressin fats une publicitât personâl sul so teren e int varessin vût ancje un util economic. Un fatôr determinant inte cuistion al podarès jessi ancje il fat che pe scjalade al Gabelekopf nol sedi stât domandât nissun benstâ e si domande che a vegnin gjavâts ducj i spits. Intes discussions di transazion e je saltade fûr, dut câs, la disponibilitât a jessi sodisfats cu la rimozion dai gançs. ❚